第四十四章

除左Ashley會到醫院探我病,其實阿康呢段時間都會隔一個星期探我一次。

如果Ashley係善良既天使的話,咁阿康一定係邪惡既魔鬼。

這一次來探病的時候,佢同我老媽子講推我出去醫院範圍外的空地呼吸一下新鮮空氣。

佢知道我在醫院零娛樂,所以當我推出去既時候,借左佢部psp俾我玩。





經過上次佢叫我道歉既對話之後,這一次探病的時候,佢問我有冇好好道歉。

我將當時既情況同佢講完之後,佢有問我後唔後悔冇表白。

我其實怕表白完連朋友都冇得做,,多過冇表白而令自已後悔。兩害選其輕的情況之下,我覺得不表白這件事我不會後悔,最少我在這一刻想得到Ashley既關心。

「幸福是需要靠雙手去爭取,我還是覺得你應該表白,如果是對你沒有好感,會同你聖誕節出街咩?佢意外之後差不多每一日都會探你病?重會為你準備好筆記?」

「幸福呢兩個字,你唔覺得同我相差好遠咩?萬一我下半生都係要坐輪椅.你覺得我重值得去爭取幸福咩?」





雖然我現在可以用助行架行路,但在別人眼中,需要用助行器的,其實等同於我是一個傷殘人士,我之前都曾經試過帶有歧視既眼光看傷殘人士以及與他同行既人。所以一諗到我如果真喺不能完全康復的情況,需要接受別人的歧視目光,我就覺得幸福離我好遠,而當日細膽沒有表白的決定,可能不是一件壞事。

「幸唔幸福唔係你一個人自己既想像做決定,而係由個現實去幫你決定。與其擔心之後會不良於行,倒不如努力去做康復既訓練,未訓練之前,你唔係連下半身都郁唔到咩?當日如果唔係你自己嘗試去郁動手指,你宜家可能連手指都郁唔到,做咩你咁快就諗住放棄希望。」

「你講話我放棄,係你誤解左我,我身體狀況我自己最了解,訓練我一直冇放棄過,但復康的情況理唔理想我自己知 ,宜家我能夠用助行架行路,我覺得已經到左極限。」我一邊摸住自已隻腳,一邊同阿康講出自己既諗法。

「Sorry,我語氣重左少少,你話你到左極限,但呢一個極限始終係你自己set俾自己,你應該將個極限提升,你睇龍珠你幾時見過悟空會滿足自己既極限,人人都當超級撒亞人係極限,佢最後咪超2超3超4咁樣去突破自已既極限。」

「極限係我自己set俾自己,但你用龍珠呢個比喻好唔現實,係人都知道呢套係漫畫唔係現實。」





「咁我唔用龍珠,咁我用MH去做比喻啦!你重記唔記得第一次打崩龍,我地打到夠鐘佢都未死,但不斷去挑戰既情況下,最後打得死,再到我哋挑戰極限,用比上一次更短既時間去殺死佢。呢個咪就係證明到極限係可以突破得到。」

「點解你可以扯得咁遠,你食錯左咩藥?」

「你就食錯藥,我只係想鼓勵你叫你唔好放棄啫。我哋都出左嚟好一段時間.係時候我推返你入病房。」

「唔好咁快推我返病房,我重想玩多陣MH。」

「唔得呀!你出左咁耐,一陣伯母會鬧我。」

阿康推我返到病房就走左,呢個時候我覺得,認識到阿康呢個朋友,其實都幾幸運,雖然佢份人對女仔會口花花,但呢一刻佢作為兄弟,難得嘅係佢收起佢口花花既性格,咁認真咁去鼓勵我。
已有 0 人追稿