愛是恆久忍耐: 第五十四章

第五十四章

手提電話傳來的電話鈴聲，扔完粒回家玉，我就放低部遊戲機然後聽電話。

「我放學啦!有冇咩野需要我買上來?」Ashley放學之後打電話俾我。

「唔洗買野啦!我同阿康一早買齊所有野，你過來附近先，我同阿康過來接你。」阿康聽到之後，閂左部遊戲機，準備同我一齊落街。

「唔洗接我啦!你都俾左個地址俾我，同學校咁近，唔洗專登接我，我直接上來就可以了。」





「OK!咁一陣見。」講完之後佢就收線。

「佢話一陣自己上嚟，唔洗我哋去接佢。」我轉述返Ashley啱啱講嘅嘢俾阿康知。

「人哋話唔洗你就真係唔落呀？你識唔識㗎，你唔搵佢，都最起碼落樓等佢啦！反正都係我推你落樓，快快手上你架戰車，我哋落樓等佢。」阿康堅持要我落樓，於是乎我哋兩個就落左樓等佢。

等左大約15分鐘，Ashley在我哋面前出現。佢對於我哋都落咗樓感到十分驚訝。

「我唔係講咗話你哋在樓上等咩？呢個天氣咁凍，你兩個在樓下吹風，一陣病咗點算呀！」佢第一句就立即鬧咗我哋兩個一餐。





「我本身都有同阿Full講，叫佢在樓上等，但佢頭先收線之後，話驚你蕩失路，所以先同我講話要落嚟等你。」阿康隨口就作咗個大話出嚟，明明就喺佢叫我落嚟。

「我睇穿咗你哋兩個，我先唔信喺阿Full講話要落嚟，要在樓下等我嘅，一定喺你諗嘅屎橋。」

睇嚟一切都逃唔過Ashley嘅法眼，我的確冇諗過落樓迎接佢。但阿康順水推舟送咗個大禮俾我，我冇理由辜負佢嘅一番好意。

「唔緊要啦！我唔覺得凍，啱啱阿康屋企有少少焗，所以我叫佢推我落嚟抖抖氣，你唔洗咁勞氣，有咩嘢要講，上樓先再講啦！」

呢個時候，我出面做一做和事佬，等阿康唔洗食我呢隻死貓。





「係囉！上樓再講啦！阿Full幫你拎住個書包，你幫我拉住度門，等我推佢入大堂。」

講完之後阿康除底咗Ashley嘅書包，然後放咗上我大脾度。而Ashley則拉住度大堂門，等阿康推我入電梯大堂。