愛是恆久忍耐: 第六十一章

第六十一章

過咗唔知幾耐，電話又再次響起， 係Ashley打電話俾我。

「喂！做咩事打俾我嘅」明明一陣就會見面，我好好奇佢做咩要特登打電話俾我。

「我啱啱旺角落咗車，但我醒唔起嗰間Cafe叫咩名同埋地址，所以打電話嚟想問你。」

「Sorry，我一直以為你記得，所以冇俾返個地址俾你，你朝早做咩唔問我嘅。」





原來Ashley唔記得咗呢間Cafe嘅名同地址，個一刻我有少少唔開心。但諗深一層，間Cafe係我帶佢過嚟，加上Ashley可能唔覺得呢間Cafe係第一次同我約會嘅場地，所以對呢間Cafe冇深刻回憶都好正常。

「係我唔好意思先真，我本身都諗住自己會記得，但出咗閘就諗極都諗唔起間Cafe嘅地址同埋個名。」

「唔緊要啦！我其實都有責任要一開始講個地址俾你知，你等我一陣，我WhatsApp 返間Cafe嘅地址俾你。」

「好，唔該曬你。」講完之後Ashley就收線。

收咗線之後我問侍應拎咗cafe地址，然後WhatsApp返個地址俾佢。





隔咗三個字左右， 佢終於喺cafe門口出現。

可能係因為新年嘅關係，佢著返第一次嚟cafe個一件長䄂紅色格仔恤衫。

見到佢出現喺大門口之後，我揮手叫佢埋嚟。

佢行埋去梳化側邊，正想將個斜揹袋放低嘅時候，佢眼利咁第一眼就見到我放喺梳化上面嘅無印良品紙袋。

「你上嚟之前去左無印良品？」





我無諗過佢劈頭第一句，就問我關於個紙袋嘅問題，攪到我之前預先彩排的對白，變到完全冇用。

「唔係呀！我冇去到無印良品，我對朗豪坊條扶手電梯有恐懼，點會單獨一個人走上去無印啫。我只係見到屋企有個紙袋咪借住先，用佢嚟裝住啲嘢啫。」

「咁你裝住嘅係咩嘢嚟？」

Ashley坐喺我側邊，然後偷偷哋想睇下個紙袋入面裝住嘅係咩嘢。

「既然你咁想知，咁我攞出嚟俾你望一望呀！」 於是我從個紙袋拎咗我織條頸巾出嚟。

「邊個織條頸巾俾你，攪到你要咁珍而重之咁放落個紙袋度，重要唔捨得戴上身。」 就咁聽佢把聲，同埋睇咗佢個表情，感覺上佢好似有少少不滿。我完全估唔到佢語氣竟然一秒就轉變咗。

我點都估唔到，條頸巾都未正式送俾佢，佢就誤會咗我，宜家重好似激嬲咗佢。

「我朝早約完你就立即出嚟，點會有可能有時間去約其他女仔，同埋除咗你之外，我都冇女仔嘅朋友，又點有可能會有女仔送頸巾俾我。」俾佢問嘅語氣嚇親之後，我儘量去解釋條頸巾唔係其他女仔送俾我。





「我都冇講過條頸巾係女仔送，你做咩咁緊張講話唔係女仔送，咁你講我知點解你要摺得咁整齊。」

當下我反駁嘅能力完全hang機咗幾秒，好似感覺上係越描越黑，但我冇理由令到誤會再加深，所以我唔再理之前諗好嘅對白，直接講出條頸巾係送俾佢呢個嘅重點。

「其實條頸巾係我織俾你，因為係我第一次織， 我好驚會唔小心整爛佢， 所以先咁樣小心好好保管住佢。」 講完之後我直接將條頸巾交到佢手上。

「送俾我?點解送俾我嘅！同埋真係你親手織㗎?」Ashley接過條頸巾，面上流露出難以置信嘅表情，語氣都好似溫和咗好多。佢攤開條頸巾在梳化上面再對摺一半，然後好似驗貨咁前揭後揭咁去檢查我送俾佢嘅呢條頸巾。

「單純係手部復康訓練做得悶，所以先想轉個形式去訓練返自己。最重要嘅係我見你平時都好似著好少衫，驚你會凍親先會諗住順手織條頸巾俾你。」我講嘅其實都有一半係事實，但我最主要都係想送份情人節禮物俾佢，雖然我同佢之間並唔係情侶關係。

「我想問下，呢條頸巾你織咗幾耐?」佢終於檢查完條頸巾，然後一面不停用手去磨擦條頸巾一面同我講嘢。

「我10號開始織，織到啱啱尋晚就埋到尾，所以織咗3日左右啦！」





「初學者嚟講三日起到貨其實都算織得快，我啱啱檢查過都冇話出現漏針嘅情況，呢條頸巾你真係可以送俾我？」講完之後佢就企起身將我織嘅頸巾戴上條頸，佢戴上身之後我先發現頸巾嘅長度好似有少少偏長，因為我織嘅時候係用我嘅身高去量度，唔記得咗佢比我矮得多，我冇諗過用佢嘅身高去量度，我覺得自己真係好大意。

「條頸巾我真係送俾你，但係個長度係唔係長咗少少？」當我見到條頸巾好似長得滯差少少就會拖地，我真係有啲驚佢唔鐘意條頸巾。

「唔會呀，我覺得啱啱好。好多謝你送條頸巾俾我。」
聽到佢咁樣講之後，我即刻鬆咗口氣。

「你鐘意就好啦！不過宜家呢度咁暖，應該唔洗戴住條頸巾住你不如除低佢先。」

「都好，今日出面比較凍，呢條頸巾可以一陣用。」講完之後Ashley將條頸巾除低放返入去無印良品的紙袋入面。
然後坐低睇mean點餐。