愛是恆久忍耐: 第六十二章

第六十二章

呢一次，Ashley最後冇再中途走咗去，我哋喺cafe逗留咗好長時間。

唔知道係唔係一早起身拜年嘅關係，佢睇睇下漫畫瞓著咗。

張梳化唔大，所以我同佢嘅距離好近，佢瞓著嘅時候，挨咗落我膊頭度。

佢挨住我膊頭嘅時候，我全身都僵硬曬，雖然平時我同佢都有身體接觸，但個種接觸只係單純地我行嘅時候佢扶一扶住我。





就算之前在呢間cafe坐，我都只係膊頭貼住膊頭咁坐，宜家佢個頭挨住我膊頭嘅身體距離，接近頭貼住頭呢個距離，係我認識佢咁耐嘅第一次。

自從我入院到呢個時候，佢經常過嚟探病同時又要返學應付即將來臨嘅會考，我有諗過到底佢有冇好好休息過。

所以佢呢一刻挨住我膊頭瞓著，我都儘量唔想騷擾到佢嘅休息。

我諗宜家應該係佢呢幾個月嚟最放鬆嘅時間，所以我都靜靜咁坐喺度陪住佢。

「我啱啱瞓咗幾耐？」瞓咗一段時間之後，佢瞓醒第一句就問我呢個問題。





「大概兩個鐘頭左右，不過你可以繼續瞓都得。」

「兩個鐘頭咁耐，你做咩唔叫醒我？我突然間好眼瞓先會瞓著咗。挨住咗你膊頭瞓咗咁耐，有冇覺得唔舒服，你抬下隻手睇下會唔會好痺？」佢講完之後，一定要我做抬高隻手嘅動作。

「冇事，我隻手冇痺到。」我抬起隻左手俾佢睇，證明我隻手好正常冇因為佢壓住而麻痺。

「如果唔舒服記得話我知，唔好死頂。」雖然我抬起隻手證明我真係冇事，但佢都好似唔多信，然後幫手按摩啱啱俾佢挨住嘅左面膊頭同埋隻手。

「我冇死頂呀!反而你真係攰嘅話，洗唔洗早啲返屋企休息一下。」雖然我好想再同佢一齊多一陣，但我見到佢咁攰，又唔忍心要佢陪我，宜家我嘅心情極度矛盾。





「啱啱瞓醒我宜家好精神，同埋冇理由你叫我出嚟，然後我瞓咗兩個鐘就返屋企。」

「你咁攰我都重要迫你陪我，勉強你我其實唔會開心。其實時間都唔早，我都想返屋企休息，不如埋單好唔好。」

講真，條頸巾送出，我都算完成任務。呢兩個鐘頭佢挨住我膊頭咁訓，我其實覺得心滿意足，我真心想佢好好休息一下。

「我其實冇勉強，宜家真係精神好多，不過你如果覺得攰的話，咁埋單啦!」

講完之後，Ashley叫左侍應埋單，本身我諗住埋單嘅，但係Ashley堅持話收到我條頸巾做禮物，唔應該再請佢，所以就一手搶咗張單由佢埋單。

埋完單我同佢離開cafe，然後走去地鐵站準備搭車離開。