愛是恆久忍耐: 第六十三章

第六十三章

宜家重未到食飯時間嘅關係，車廂人流唔算太多，雖然冇位坐但打廂入面都唔算太過擠迫，我總算有個位可以企一下。

為左避免阻礙到其他乘客上落車，所以我選擇左近車廂門口有扶手的位置挨好。

我企左一陣間，有一個年輕媽媽見到我拎住拐仗好似企得好辛苦，就同佢幾歲大嘅囡囡講話要讓座俾我。

其實我想聽從醫生指示，訓練下自己身體平衡從而加快康復進度。再加上我搭去九龍塘其實都只係搭多兩三個站就落車，所以我拒絕左呢位媽媽嘅好意。





見到我拒絕坐低之後，Ashley決定左同我一齊在車廂門呢個位置〝罰企〞。

我企嘅呢個位置剛剛好有扶手形成左一個凹入去嘅位置， 所以Ashley同我平排好擠迫咁企埋一齊。

唔知道係車廂空氣不足定還是Ashley真係太過攰嘅關係，佢上車冇耐就冇再同我傾偈，然後佢經過石硤尾站嘅時候，竟然企喺度挨住座椅玻璃屏風瞓著左。

在下一個站就到九龍塘需要轉車嘅情況之下，我雖然想叫醒佢唔好瞓覺要落車，但我見到佢咁攰都專登出嚟陪左我幾個鐘頭的情況之下，就算好快就到九龍塘站，我最後都係唔忍心叫醒佢。

不過企喺度瞓覺呢一個情況，如果列車緊急剎車的話，她隨時有機會失去平衡跌倒，所以我不再與她平排而企，我輕輕移動了自己的位置擋在她的面前，然後握住扶手站好。





當列車就快來到觀塘站的時候，車廂突如其來的劇烈搖晃下，為避免她失平衡跌倒，我不自覺咁大力攬住左佢。

可能因為差啲失平衡加上我一下大力攬住佢嘅關係，Ashley喺睡夢之中清醒過來。

未知她是怕失平衡撞倒我還是其他的原因，她下意識咁攬返住我。隔左一秒時間，她與我同時鬆手，突如其來的身體緊密接觸的情況之下，我彷彿感受到我同佢兩個人嘅心跳聲。

「我哋宜家去緊邊個站?」當Ashley回復清醒，劈頭第一句就問我呢個問題。

「下一個站觀塘站。」





「冇理由，啱啱唔係石硤尾站咩?做咩突然之間下個站就到觀塘。」照呢個情況睇，佢應該意識唔到自己企喺度瞓著左一段時間，所以唔明白點解過左石硤尾站合埋隻眼一陣之後，擘大眼一下就跳過左中途一大堆站去到觀塘。

「你過左石硤尾站冇耐之後，就企喺度瞓著左，所以咪由石硤尾站一下就跳到觀塘站。」

「Sorry，乜我原來瞓著左咁耐，咁一陣觀塘站落車我同你搭返對頭車返去九龍塘啦!」對於自己瞓過龍導致我冇喺九龍塘轉車，佢明顯有少少內疚。

「唔洗咁麻煩啦 ，我其實在觀塘站有巴士可以搭返屋企。你反正都住附近，我見你其實都好攰，不如你一陣陪我等完車之後，返屋企好好休息重好啦!」
見到佢咁攰，我其實唔忍心要佢陪我再搭返九龍塘然後先再返自己屋企。

「咁好啦!我送埋你去巴士站，當你上車之後，就會返屋企抖下。」

講完之後，列車剛好埋站，然後我就同佢一齊落車行去巴士站等車。