愛是恆久忍耐: 第六十六章

第六十六章

Ashley離開之後，得返我一個人在巴士站等車。

冇佢在我身邊，一陣寒風吹埋我身上，我突然間感覺到極度寒冷，然後忍唔住不停咁打冷震。

好在垃圾桶係喺我等車嘅站頭唔算太遠嘅地方，所以Ashley好快就返到我身邊。

「你係唔係覺得好凍呀？」佢見到我不停打冷震嘅情況之後，摸一摸我隻手，然後不們用手搓我隻手保持溫暖。





同我變左雪條隻手相比，佢隻手嘅溫暖程度就好似一個暖水袋一樣，當佢不停搓我隻手嘅時候，我隻手開始變返溫暖。

「本身有少少凍，但宜家我暖返好多啦！」我本能地想縮手，但Ashley堅持唔放開我隻手。

「咁樣大家捽住大家隻手會冇咁凍，你隻手頭先凍到好似冇血,白雪雪重要凍到成條雪條一樣，宜家先叫有返啲血色到手，所以我keep住捽多一陣比較好。」

「我諗都差唔多啦，你再捽落去我隻手應該好快會噴血。」

到最後佢捽到我隻手好溫暖，但同一時間我隻手都俾佢搓到差唔多要磨擦到出血嘅情況下，我唯有叫停佢。





佢反覆咁摸我隻手，覺得我隻手真係比較溫暖嘅情況下終於停左手。

「我重以為你面皮薄，估唔到你連隻手都比我想像中薄皮。」Ashley停手之後一面睇住我隻手一面講笑。

佢其實講中左我，當佢講完呢句話之後，面皮薄的我立即面紅。

好在冬季寒風的吹襲之下，我塊面好快就降溫。

而等左一段時間嘅巴士都終於埋站，在到站之前，佢有問到我需唔需要陪我一齊搭巴士送到我返屋企，但我見佢頭先在cafe攰到瞓著左，我就唔忍心要佢陪我搭呢一程車。