愛是恆久忍耐: 第六十七章

我喺巴士下層靠窗的位置坐低，Ashley喺巴士站同我揮手，目送我架巴士離開。
我都喺車廂望出去，當她的身影完全消失時，我電話同時間響起。
「喂!」電話另一邊傳來Ashley的聲音。
「係，我聽到。」
「我想講，最近為左應付會考，其實好大壓力，本身如果唔係你約我的話，我其實諗住閉關繼續讀書。好多謝你約我出街，俾個機會我放鬆叉下電。」電話裡頭Ashley爽朗嘅聲線好明顯係聽到佢個心情好輕鬆。
「你可以放鬆就最好，我冇諗過你係會想溫書，重約左你去玩，好彩冇影響到你。」
「傻佬，適當放鬆對於溫習都有幫助，如果真係有影響到我嘅話，我一早就拒絕左你啦!反而我係擔心你一個人搭車返屋企有冇問題啫!你又唔俾我陪你搭車。」
「我見到你攰到瞓著左，我都唔忍心要你咁辛苦送我，宜家最重要係你快啲返屋企休息下。」
「頭先我在cafe瞓左一段時間了，宜家好精神，我諗返到屋企我會再操下pass paper先休息。」
「最緊要唔好迫得自已太緊，同埋出面好凍呀，你快啲返屋企唔好凍親。」




「放心啦!我頭先食左熱番薯，再加埋你親手織嘅頸巾，我宜家個人暖粒粒，反而係你，頭先你隻手凍冰冰成條雪條咁，我反而擔心你會唔會凍親。」
「我冇事你唔洗擔心我，你頭先捽我隻手已經令到我個人暖返好多。」事實係我今日低估左天氣著少左衫，但係我為左唔令佢擔心，我唯有死頂同佢講我冇事。
「冇事就最好啦!如果俾我知道你呃我你就知味道!」
我唔知Ashley係唔係發現左我死頂，定還是佢只係講笑，但呢一刻我感受到佢關心同緊張我，係令到我有溫暖嘅感覺。
「知道啦!我咁大個人唔舒服會識得照顧自已，我如果有咩頭暈身㷫會第一時間話你知，你都快啲去搭車，記得返到屋企whatsapp我報個平安。」
「我架車到左啦！我一陣返到屋企再massag俾你，byebye啦！」
「好啦！byebye。」講完呢句之後佢收左線，而我就睇住車廂出面嘅風景發呆，但腦海入面就回想起今日同佢相處嘅回憶。