「啱啱醒...呀!要番工呀!」我即刻跑去廁所
「得得得...你慢慢嚟~我喺樓下等你。」
呢個人係周樂恆,佢見我過咗時間都未落去就特登打比我
我換番套suit,拎埋電話,着埋鞋就即刻出門口
我一出大廈就見到佢架車,我即刻跑過去
「Alvin早晨!Sorry呀!」我一打開車門就話
「早晨呀!」佢望向我微微笑,「好心你着住高踭鞋就唔好跑啦,你驚我唔等你咩...」
「咁我遲到嘛!」我扣好安全帶
「唔驚啦,平時番工都早咗成半個鐘,今日唔會太遲。」佢話
方芷諾!你點可以遲到㗎!


我拍拍自己塊面
「你不如宜家講一講今日嘅schedule先。」佢話
「好呀。」我拎咗本schedule book出嚟
「你仲會用schedule book㗎。」佢望一望我手上拎住嗰本嘢
「我手機都有記低,但都要寫一寫先得,慣咗。」我打開到寫住今日日期嗰日
「果然係方芷諾呀!」佢笑咗一笑
「今日你唔洗見客,但你今日約咗Stephen Li食lunch嘅,而今日上午11點約咗班董事開會,傾下嚟緊下半年公司嘅發展。」我望住本簿,睇清楚有冇嘢漏
「唉~唔該晒。」佢微微一笑,「你做晒D文件未?」
「差兩份,未計好數。其他都做好,差你簽名。另外琴日財政部嘅Tony拎咗兩份文件過嚟要你簽名,有份budget要你批嘅。」我諗起琴日做嗰疊文件
「你真係...工作狂嚟㗎喎...琴日你枱頭有成疊文件喺度,你做得咁快嘅...」佢一臉無言咁望住我,「陣間番去print個會議議程。」


「好。」我點頭
番到公司,一嚟就坐低做嘢
有時都幾懷念以前讀書嘅日子,以前讀書嘅時候係幾開心嘅
就算每日再辛苦都好啦,同班friend一齊就唔覺得攰
日日都覺得時間過得好快
高中嘅生活雖然好辛苦,但勝在有班人上堂嗰陣搞下gag,講下笑
每一堂都好歡樂咁就過咗,呢排成日都會懷念以前
諗起以前,就會覺得宜家真係唔太好
人始終會長大,邊有可能永遠只留喺開心嘅日子?
以前為讀書,宜家為番工


人生仲有咩意義?
我行到去影印房
拎晒嗰疊print好咗嘅議程去會議室
我一打開會議室度門嗰下,突然比D唔知咩絆到
「嘩...」
喺我向前絆到嗰下,突然有人喺我後面拉住咗我
「唔該...」我即刻講唔該,講完唔該先知原來嗰個人係周樂恆
「小心D啦...」佢細聲咁講咗句,我微微點點頭
......
同班董事開完會,成個人都輕鬆晒
晏就出去食完個lunch,番到公司又繼續博殺
今晚就約咗葉子朗食飯,好耐都冇見佢啦!
去到6點,收工!
「葉子朗!」我一出到公司門口就見到佢企喺一邊㩒電話,「你等咗好耐啦?」
「唔係呀...」佢即刻收起手機


「你做咩呀?好似好攰咁嘅?」我問佢
「冇呀。」佢搖搖頭
今日嘅佢...同平時好似好唔同咁嘅...
「食呢間好唔好呀?」我企喺間日本餐廳門前
「好呀。」佢點點頭
我地入到去,搵咗個位坐低,佢就開始睇手機
突然有個電話打嚟,佢即刻拎起手機接聽
「喂...晏D先啦...嗯...好啦...」佢細聲咁講
「邊個打嚟呀?」我問佢
「冇,朋友啫。」佢微微一笑
「哦...」見佢話係朋友,我都冇講D咩,都冇再追問落去
今日好似...邊度怪怪地咁...
但應該冇事嘅~
「係呢~你最近點呀?我地好似好耐都冇見啦~」佢抬頭望我
「冇呀...都係咁啦~番工放工啦~」我微微一笑


「你上次呢,咪話想去睇戲嘅~我買咗飛,陣間去睇呀!」佢從銀包度拎咗兩張飛出嚟
「好呀!錫晒你呀!」我點頭
「係至好講呀!」佢伸手掐我塊面
「喂呀!」我推開佢隻手
都話係我多心㗎啦~
佢先唔會有D咩事~
「你知唔知呀,我最近撞番洛天恩。」葉子朗突然提起佢
洛天恩...呢個熟悉又陌生嘅名
中學時代同我打對頭嘅人,葉子朗嘅前女友
「係咩...」我冇咩反應,對洛天恩我真係冇咩興趣
「佢好似同你喺同一個大廈度番工。」佢話
「嗯...」我點點頭,「你又會突然撞到佢嘅?」
「哦...係呀,嗰日咁啱經過嗰陣,就撞到佢,唔係佢叫我,我都認唔到佢。」佢笑咗一笑
「係咩...咁唔認得都好...」「Venus!?」
突然有把聲喺我後面傳嚟


回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link