「喂!我沖緊涼呀!」我撇開臉
「呿...驚咩啫?」佢將我推前,然後坐喺我後面
「呿...」我雙腿曲起用手抱住
「講真呀...你今日又會同佢一齊番嘅?」
一到呢D時候,葉子朗就會無啦啦提起周樂恆
「咁啱撞到。」我比咗一個簡單又直接嘅答案佢
「有冇咁啱到咁呀...」佢細聲抱怨
「就係有~」我笑咗一笑
「仲笑!」佢一下打落水度,D水濺起晒
「D水濺起晒啦!」我用手擋住


我沖完涼行咗入房,大字型咁灘咗喺床度
「喂!開冷氣...」「叮噹~」
喺葉子朗行入嚟叫我開冷氣嘅同時,有人㩒門鐘
我同佢同時望向門口
「邊個?」我望住葉子朗問
「你留喺房,我去開門。」佢行咗出去
我將個房門閂埋,我企喺門後面
「咁夜都未瞓嘅?」
「平時都係㗎啦!」
「煲咗湯,飲咗佢。」


「吓!?咁大壺?點飲得晒呀?」
「得㗎啦!理得你呀!有其他人喺度呀?」
「冇呀!」
「做咩淨係開條門縫呀?係咪有人喺度?」
「冇呀!你諗多咗啦!你走啦!」
「好啦好啦!飲咗壺湯佢呀!」
我聽到閂門聲之後就開門行出去
「邊個呀?」我問佢
「我呀媽...」佢一臉無奈,然後放咗個湯壺喺枱面,「你有口福啦,有湯飲。拎兩隻碗出嚟啦!」
「好呀!」我行咗入廚房拎碗


我拎完碗就出去坐低,佢一打開個壺蓋,好香呀~
「其實點解佢地明明都係住上面,但你又唔上去食埋飯?」我問佢
「佢地番嚟都唔定時,成日都唔番嚟食,咁我咪索性自己煮囉~」佢將碗湯放喺我面前
「學埋煲湯嘛!」我開玩笑咁講
「好呀,你想我學我咪去學囉!」佢望住我笑起嚟
「咁...咁又唔係為我去學...」我即刻窒咗,然後耷低頭飲湯
「得你喺度嗰陣我先會煮飯,平時好多時都好少煮,或者間中上去食,咁唔係為你學嘅話,仲可以為邊個學呀?」佢伸手掐我塊面
「喂呀!」我撥開佢隻手,但我笑一笑,「我諗...第時你結婚,你老婆一定好幸福,你咩都肯為佢做,除咗脾氣有D差之外...」
「你都未同我結婚,但已經好幸福~」佢望住我
「我唔會嫁比你囉...」我無奈咁搖搖頭
「你都忍到我D脾氣㗎...」佢話
「咁我都忍到好多人嘅脾氣嘅...咁我咪要嫁比好多人?」我無奈咁講
「唔係喎!嫁比我就夠啦!」佢話
「我唔要呀!你就想呀!」我吐吐舌頭,然後用紙巾抹嘴
「我梗係想啦!」佢見我飲完湯,佢就行過嚟我隔離,一下拉開我張櫈,然後抱起我


「喂!」我一個反應不來
佢一下推開度門,掉咗我落床
「喂!」我坐起身,然後拎咗個枕頭攬住
「你估你攬住個枕頭就得呀?」佢跪咗喺床上面
「嘻嘻…你想點呀?」我用枕頭擋住佢
「你話呢?」佢直接想錫落嚟,我即刻用個枕頭擋住
「你就想呀!」我話
「我梗係想㗎!」佢伸手由我膝頭向上摸
「喂呀!縮手呀!」我捉住佢隻手
「你~就~想~呀~」佢捉起我隻手,然後喺我手心錫咗一啖
佢抬頭望我,然後我突襲佢,一下吻上去
佢壓我喺床上面,雙手㩒住我雙手嘅手腕,我想郁都郁唔到,想走都有D難
激吻之中,佢騰空咗一隻手出嚟,攝落我背脊然後往下掃,掃到我件衫嘅入口,就伸手入嚟
我擺脫咗佢另一隻手,雙手繞到佢頸後攬住佢
正當好戲要上演嘅時候...


「叮噹~」

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link