《所有野都因為果日我收到對藍牙耳機而起》: 抽獎與命運

我唔知之後仲有無機會講，但我諗我要係做決定之前將哩一切都講一次，又或者係仲有意識嘅時候，俾更加多人知道發生緊係我身上嘅事。

我諗所有嗎嘅起點係個一晚公司嘅Annual Dinner ，公司唔算好多人，得20個員工左右，我地專門幫人寫下D無聊Apps/Programme ，攪下D商場活動咁，而我係專做下Graphic同UI 設計。不過我份工唔係重點，重點係個晚嘅抽獎，個晚嘅大獎係藍芽耳機，其實一聽就覺得份禮物好濕鳩，不過係由一直同我地合作解決好多我地 Hardware 問題嘅伙伴送出，可能因為要俾面佢嘅緣故，所以要當頭獎咁抽。個耳機係一個聽都無聽過叫Hex嘅牌子，不過主持嘅同事就介紹到好勁。

「哩份禮物係由我地好好嘅合作伙伴，阿Nick佢送俾我地，HEX係一間德國嘅公司，大家都知德國野出名係正架啦，佢有最新嘅高速傳輸晶片，可以令所以音樂都以無損狀態從裝置傳送到耳機，內建3D虛擬音效技術同環境智能偵測技術，將會帶大家去到另一個層次嘅體驗，亦多謝Nick為我地送出兩對咁高科技嘅產品。」

其實所有同事都對份大獎毫無興趣，因此大家都想中二獎部iPhone 。曾經聽過人嘅運氣係有用盡嘅一日，而命運就係咁樣，當你完全唔想佢浪費你人生嘅運氣時，佢就會係咁嘥左你嘅運氣，叫到我個名時，全枱同事都一齊恥笑同歡呼，而我亦都強顔歡笑咁上台扲左。另一個中嘅係我地全公司最毒個個Programmer同事阿杰。

成班人都起哄，扮到好想要份禮物，但實質其實係恥笑我地抽到全晚最廢嘅野，話就話個耳機係成皮野，但同安慰獎嘅現金一千蚊比，我真係寧願要安慰獎。佢地不斷叫我地拆出嚟試下，因為班仆街想我地拆左之後，放唔到好價錢，雖然我根本唔肯定佢係咪真係值錢，係佢地起哄之下，阿杰就拆左出嚟試下，佢一戴上個下，佢好本能地即刻抆開個耳機，然後摸摸自己個後尾枕，我地當時唔知佢做乜，佢話一帶上就聽到好高音頻嘅聲，然後覺得好似有枝針拮左佢後尾枕一下，因為阿杰不嬲都係我地恥笑嘅對象，所以個刻無太為意佢講嘅野。個晚同班同事都飲到好癲，係咁俾佢地隊，份獎品就咁就收左入袋一直無理佢。





不過之後個一個星期，阿杰變得好奇怪，應該話係好「正常」，同平日嘅佢好唔同。但最奇怪嘅係個一個星期後，佢自殺死左......