《所有野都因為果日我收到對藍牙耳機而起》: 阿杰與Hexer

阿杰係個種好典型嘅宅男，除左打機之外，佢無其他嗜好，所以平日公司同事有咩出去玩嘅聚會佢都好少出席。同佢雖然做左兩年幾同事，但私下同佢講野應該唔過十句，佢可以好醉心係自己個世界度不斷寫Code，如非必要都唔會同人傾計。

阿杰有個妹叫小林，佢成日會上嚟搵佢哥哥，而小林係個種好有親和力嘅女仔，佢笑起上嚟有對小爆牙，好可愛。聽講小林講佢地兩兄妹係由嫲嫲湊大，所以嫲嫲走左之後，得佢地兩個，而小林仲讀緊書，而阿杰就係一直供緊佢讀書。阿杰佢寫Code係好叻，但係對生活上嘅野就完全無自理能力咁，佢成日都係阿杰要OT嘅時侯帶埋外賣同佢食，通常係小林係度嘅時候先會見阿杰佢笑。

Annual Dinner 係星期五，所以之後我地放左兩日假。到左星期一返工，因為家住大埔村屋每日過海返工都係好漫長嘅征途咁，趕頭趕命返到公司，都已經花左一大半嘅精神，坐底無耐，阿杰就拎住一杯咖啡企住係我個Partition前面，個一刻其實我唔係好肯定自己有無睇錯同聽錯，因為阿杰係從來都唔飲咖啡，更加唔會主動同我地打招呼，再定神一睇，阿杰今日Gel左個All Back，戴左隱形眼鏡，完全同前幾日個毒男唔同，佢再帶點風騷咁講：
「早晨呀，聰仔」
我都應返佢「點呀，杰哥」
阿杰細細聲咁講「喂，你有無用到個對耳機呀？」
我開著眼前的電腦然後淡淡地回應「未開過呀。」
阿杰帶住少少興奮咁講「個對耳機真係好正，一定要快D 試下用。」




「有咩咁特別呀？」
「佢聽個D 聲真係好Sharp 好靚，我睇片個陣帶住，簡直覺得自己係置身係個個環境度咁呀。」
個一刻我望住眼前哩個男人，個腦再Load 左好耐，我依然唔係好能夠相信，我眼前哩個人係阿杰。
佢機關槍式咁樣介紹哩對耳機有咩好，但係個一刻我根本聽唔入耳，佢最後個句係「你真係要親身用左先至Feel到架」
「哦。我廢事拆我個對呀，你依家借你個個嚟聽下啦。」
「唔得！耳機哩樣野真係好Personal 唔可以亂咁俾人戴。」
「有幾呀，耳機Share 係一件好平常嘅事」
「其他耳機可能得，但係哩一對就絕對唔得，你要記住我地係被選中嘅人，先有資格用哩個耳機架」
「咁是旦啦」





我好記得我同阿杰講完哩段野之後，曾經Google過哩對耳機個牌子，但係搵唔到任何一間叫Hex做耳機嘅公司。公司所有同事都覺得阿杰好似變左第二個人咁，好有活力，好識攪氣氛，個一日仲同我地一齊出去食晏，食晏個陣佢好似咩都可以搭到咀，個一刻我覺得好奇怪，哩一個人都好陌生。雖然大家都唔知阿杰受左D 咩刺激，但所有同事都好樂於見到阿杰變成依家哩個狀態。放工嘅時候，我忍唔住走左去問阿杰。

「到底你過左去個兩日受左D咩刺激呀？」
「我咪同你講左囉，因為我知道左我係被選中嘅人呀嘛」
「即係咩呀？」
「Hex呀，我地係俾Hex揀中嘅人呀，We are Hexer.」
「你講乜呀」
阿杰無再答我，只係指一指自己耳仔戴住嘅哩對耳機，跟住就離開左公司。

而我個晚就決定返到屋企就要試下哩對耳機。