《所有野都因為果日我收到對藍牙耳機而起》: 入耳式與連結

個一晚我返左屋企之後就即刻搵返個耳機出嚟，個盒同普通耳機無任何分別。Hex哩一款耳機係入耳式無線耳機。一直以嚟自己對耳機都無乜要求，自問隻耳係垃圾耳，幾百蚊同幾千蚊都無乜分別。不過唯一一樣野係對入耳式耳機有種抗拒，所以一直以嚟都係用Headphone形嘅耳機。

我無好好諗過討厭入耳式嘅原因，不過如果要認真咁諗嘅話，應該係因為進入嘅個種感覺，一件唔屬於自己身體嘅物件進入自己個身體，充滿個耳窿嘅感覺，好唔Secure都好舒服。

Hex哩對耳機外型係六角形，即係如果你帶左入耳之後就會見到一個六角形係度。設計好簡潔，純白色無任何一粒制係個耳機上面。我研究左一陣，都係搵唔到任何一粒制，於是我搵入面嘅說明書，入面只有一張卡，上面寫住 "Put it on"

而係我帶上個一刻，唔知點解有一種難以解釋嘅不安。不過只係一瞬間，但我都無深究。帶上之後就聽到一下刺耳嘅高頻聲音，感覺從左右一齊衝入去，好似一枝針咁係我個後腦拮左一下。我諗起阿杰係Annual Dinner個晚都係咁樣，但我無除落嚟。跟住係聽到一把女人聲講"Connected"。我不得不承認，個耳機真係好勁，因為個把聲個感覺好似好近好真實咁，唔似由個耳機度傳出嚟。

係個一刻我拎部電話出嚟望左望，藍牙都無開到。我係度諗，Connect左乜野。





就係哩個時候，個把女人聲又再出現：「我呀... 同我Connect左呀」