[真人真事][校園][純愛]《總有一天，會再次遇見》: 第二章

之前都講左,
故事係發生喺中學時代
我仲記得嗰年我讀緊中四
當時嘅我,
係一個啱啱升上嚟高中嘅傻仔
嗰陣我仲未知,
讀書係好緊要,
成日覺得會考甚至A Level,
咪又係普通考試咁樣
考試前一兩日溫咪得


使乜咁緊張
成日笑考得高分嗰啲人做書蟲
可能我覺得咁樣自己會安樂啲掛
同埋有一個藉口俾自己,
就係我唔溫咋,
我一溫,
你地成班友食塵
當然啦,
大個先知咁樣真係好傻仔
不過嗰陣真係唔知成績表有幾重要


所以一直以嚟讀書都係得過且過
每次都合格,
但係每一次都唔高分
夠升班就得,
呢種諗法直至上到嚟中四初都係咁樣諗,
可能你地會問,
咁點解後來會讀到大學嘅
當然唔係因為我醒啦
而係中學真係有好多變化
有時講出嚟都真係冇人信.



我地學校就分文科班,理科班,仲有商科班
每一個科有兩班,
我就係讀理科嘅
我仲好記得嗰年嘅九月一號,
一返到學校,
即刻衝出去操場嗰度睇下
我嗰班究竟係喺邊個課室
睇完一輪終於見到我想見嘅野,
咁我就朝著目的地進發
一上到去班房,
咁就梗係睇下應該坐邊度啦
通常呢個情況都係睇下邊個望落去係玩開,
見到通常就係坐嗰個嘅隔離
咁我好快就見到喇,


座位嗰方面已經冇問題,
值得一提,
我見到嘅嗰條友叫做呀邦
中一至中三有傾過計,
大家算係幾啱傾
不過未去到好熟,
因為我地未試過同班,
去到後來我上到高中開始同佢同班,
大家接觸多左
慢慢就變左好朋友,
直至到今時今日都係
我:「頂你今日冇遲到喎 」
呀邦:「收皮啦不嬲都冇遲到
你都係呢班 」
我:「唔通我入錯咩聰明 」


呀邦:「點知你,
不過咁,
好彩有你喺度咁就冇咁悶 」
我:「大家咁話啦契弟 」
的而且確,
上到嚟新環境,
有一個識嘅人喺度係幫助好大
起碼有計傾先,
同埋以前同佢唔熟嗰陣都已經幾啱傾,
嗰陣我嘅直覺覺得呢條友應該唔錯
事實證明都係
返返嚟先,
大家讀過中學都知,
中學生傾嚟傾去不外乎嗰幾樣,
最常傾就梗係女仔


我:「知唔知呢班多唔多靚女 」
呀邦:「q知咩
希望多啦 」
我:「咁我希望你唔好烏鴉口 」
呀邦:「痴線點會 」
跟住陸陸續續就開始多人返嚟,
好彩呀邦條契弟冇烏鴉口,
又真係有唔少靚女
唔好話靚女,
起碼個樣正常先
咁就已經得啦
不過嗰陣嘅我,
做左咁耐人,
其實未試過鍾意女仔
可能我真係毒,


我話唔係你地都唔信啦
但真係覺得拍拖好煩
冇晒自己啲私人時間,
既然唔想拍拖,
咁點解仲鍾意女仔
我嗰陣個諗法就係咁,
事後睇返梗係好戇居啦,
不過又有邊個冇戇居過架
當然見到靚女都會望,
但唔會對佢地有好大興趣
溝女
不了,
依家諗返起,
可能嗰陣做左咁多年人,
都冇出現過一個例外嘅女仔啦
或者唔係唔鍾意拍拖,
只係冇一個咁嘅人喺度,
但係個世界每一秒都喺度轉緊
你永遠都唔知下一秒係咩事,
意外意外,
亦即係意料之外,
可能就係咁,
先至發生日後嘅故事.