[真人真事][校園][純愛]《總有一天，會再次遇見》: 第三章

大個左再諗深一層,
其實我好慶幸自己冇留班
因為如果留左嘅話,
咁今日應該見唔到我喺度廢噏
有時有啲野就係咁,
真係冥冥中自有安排
每一個人相遇,
其實真係好講求緣分同埋際遇
先唔好講年份,
如果讀第二間學校,


成件事已經唔同晒,
又要咁啱同一年,
選擇嘅科一樣,
大家先至會同一班
所以話真係好奇妙,
有啲野睇就好容易,
但其實係要有好多條件造就
呢啲野以前細個唔會知,
可能真係好戇居
從來唔會諗點解,


如果嗰陣知嘅話,
我諗我會更加珍惜
因為得來不易,
可惜丫,
呢個世界最多就係後知後覺
永遠都係遲,
或者就係咁,
所以咁多人都有遺憾,
屋企人好,情人甚至朋友都好,
每個人身上總會有一個


呢種感覺我諗大家都明,
咁有共鳴,
唔使講太多啦哈哈
你問我有冇
成日都出現架啦,
簡單到好似尋晚我去麥當勞買錯餐,
我都覺得係一個遺憾
因為冇得補救,
而正正就係因為唔可以返轉頭,
所以最痛心疾首嘅地方,
就係喺呢度
從來冇人可以阻止時間前進,
過左去就過左去,
雖然呢句說話好廢,
但其實係金石良言


當然有好多人唔願意去相信啦,
又或者咁講,
其實佢地係知咩事,
點會唔知丫
只不過係唔願意去接受,
如果你見到嗰個人話接受,
我諗佢都只係迫於無奈
唔到自己唔信.

講返時間線先
嗰陣係2005年
係我踏入中四嘅一年
之前都講左啦,
成班人最熟就係呀邦,
加上仲係開學日,


老師話俾我地自己坐
所以好順理成章,
就坐喺呀邦隔離
大家做過中學生都知,
開學日基本上係一個無所事事嘅日子
去完開學禮,
跟住就會返班房,
傾下邊個做邊啲職位等等,
嗰陣我就冇太理會邊條友做邊啲位
淨係掛住同呀邦吹水
識落又覺得佢呢條友幾好傾
講開又講,
我呢條友對呢樣野好敏感,
基本上同嗰條友傾幾句就知啱唔啱傾
我知有啲人會話,


可能慢慢傾落去先至會投契呢,
但我自問自己唔係呢一套
唔啱就係唔啱
所以有時真係唔多朋友
就係咁解,
之後就講完邊個做邊啲職位,
老師話仲有時間
咁就不如開簿,
都係同一般開學日冇乜野分別
講講下我地就愈講愈大聲
我:「一陣返屋企打機先 」
呀邦:「玩開乜野多 」
我:「樣樣玩下啦
有時咪睇下戲咁樣.」
呀邦:「咩戲先 」


我:「鹹片呀 」
呀邦:「今次我信你喎 」
我:「冇得你唔信
因為真係 」
呀邦:「鍾意邊個呀 」
我:「愛田由.」
呀邦:「識貨 」
冇錯,
嗰陣唔係三上悠亞,高橋聖子天下,
講起上嚟,
我地真係老左好多
愛田由都引退左好耐,
步姐亦都已經三十幾歲
一個女優,
一個球星,
就係一路提住男人嘅年紀開始增長嘅證明
講講下,
我地愈講愈興奮,
唔覺意大聲左
仲俾喺我右手邊嘅女仔聽到,
呢個女仔叫做晞澄,
又名Charlotte,
初中嗰陣見過佢
未試過同一班,
老實講幾靚嘅
唔係典型女神樣,
但我覺得係愈望愈襟睇嗰啲,
皮膚白,
有少少baby fat
眼大大,
聽人講過佢笑起上嚟係最靚
點解會聽人講過
以前成班男仔圍埋一齊,
就係傾女仔架啦
據聞好似幾受歡迎,
因為本身性格都係好陽光
又多野講,
唔係冰美人嗰種
聰明嘅讀者,
一定知道我點解會介紹佢
返返嚟先,
頭先咪話我地傾傾下女優俾佢聽到嘅,
之後佢用一個好不屑嘅眼神望住我
明明呀邦都有份講
佢望住我我咪望返住佢囉
之後佢終於出聲,
晞澄:「變態 」
無啦啦俾人鬧
頂你個肺丫,
依家得我一個出聲咩
況且你頭先都同前後同學大大聲咁樣傾計啦,
呢個時候我梗係唔忍佢
即刻鬧返句,
我:「收皮啦 」
晞澄:「哼 」
之後佢就走左,
佢一句變態,
我一句收皮啦,
完全唔浪漫
不過呢個正正就係我地之間個故事嘅開始.