[真人真事][校園][純愛]《總有一天，會再次遇見》: 第九章

跟住一路落嚟我同佢都冇乜太大變化,
關係有冇好到
持續咁樣好轉掛
好多時上堂我都係同佢傾計,
咁當然啦老師係唔知
呢啲大家識做啦,
好快就考完第一次試
咁樣我地都會調位啦,
我終於同呀邦分開左坐
晞澄亦都唔近我




起碼呢個距離唔可以傾計先,
嗰陣有冇失望
我諗冇啩,
畢竟對我嚟講,
同邊個坐都冇乜大分別
咁當然有女好過冇女啦,
我唔鍾意拍拖啫,
唔代表我唔鍾意同靚女坐
跟住發生左件好搞笑嘅事
原本同晞澄坐嘅嗰個男仔,




因為掛住同佢前面嗰個人傾計,
仲要傾得好大聲,
叫極都唔停
咁樣老師就梗係忍唔住啦
就決定調走佢,
仲要調去一個比較遠嘅位,
等佢地兩個唔可以傾計,
跟住老師話:「xx賢(我全名)你調過去啦 」
就係咁,
嗰陣我就同晞澄一齊坐喇




依家諗返起,
唔通嗰陣我地真係咁有緣
咁都可以一齊坐,
但係嗰陣我就冇咁樣諗
我就好簡單拎埋個書包行過去佢嗰個位,
跟住就坐低,
成件事好似好平常咁樣
晞澄:「哈佬 」
我:「今次再一次做鄰居 」
晞澄:「係呀,
你上堂唔好撩我傾計嘈到我呀 」
我:「畫埋條線好似小學雞咁玩唔好過界丫笨 」
晞澄:「又好喎 」
之後佢真係畫左
我:「頂你真係畫 」




晞澄:「係架,
你過界就罰你請我食菠蘿油 」
我:「菠蘿包算啦
平兩蚊呀大佬 」
晞澄:「菠蘿油呀
最多嗰兩蚊我貼 」
我:「好好好,
調返轉一樣呀 」
晞澄:「驚你有牙 」
我:「試試佢囉 」
大個睇返,
中學時代就係咁無聊,
咁都可以玩一餐,
不過你又吹唔脹,
因為真係幾開心




樂在其中就係咁樣解.

同晞澄一齊坐,
都真係算係咁
起碼我有時發夢嗰陣,
我都可以睇返佢抄左啲乜野
我再自己抄返落去我自己本書度,
當然唔少得俾佢串啦
不過佢條友都係口硬嗰隻
講兩講就俾抄,
有時仲好煩,
叫我上堂唔好發夢
我心諗你梗係唔知啦
你呢啲高材生,
點會明我呢啲咁懶嘅學生




晞澄:「上堂又發夢
跟住又麻煩到我借俾你抄,
專心啲啦 」
我:「唔該丫唔好咁小器啦
你又靚又叻,
又大量,
我知你唔會介意嘅 」
晞澄:「你講到咁我就唔介意啦 」
我:「死要面 」
晞澄:「係架
鬼叫你有求於我
咁叻抄第二個囉 」
我:「咁又唔好 」
講開又講,
晞澄嗰手字真係幾靚




有時我抄第二啲人嗰陣,
頂你我真係睇唔明
問一問就抄一抄
咁樣我不如自己做,
睇晞澄份野好好多
起碼一睇就知佢寫乜,
我:「你啲字又真係幾鬼靚
都算係你唯一優點 」
晞澄:「我仲有好多優點你未知啫 」
我:「又靚又叻又大量丫嘛
啱啱先讚完你 」
晞澄:「雖然明知你唔係真心,
不過都多謝喎 」
我:「心水幾清 」
鬼叫我嗰陣真係太戇居,
成日都以為自己睇得清,
但其實就亂咁噏,
不過,
當我睇得清嗰陣,
時間已經不動聲色咁樣流逝,
再一次後知後覺.