[真人真事][校園][純愛]《總有一天，會再次遇見》: 第十三章

放完聖誕假返嚟第一日,
成班就梗係多野講啦
話晒都耐冇見,
呢個現象正常嘅
加上嗰陣仲係中四,
邊度會有咁多中學生諗得咁長遠,
知道仲有一年就會考丫
老師都明白呢點,
所以如果唔係傾得好大聲嘅話,
都盡量忍啦


我同晞澄都唔例外
我:「日本有咩玩 」
晞澄:「去左睇雪呀,
真係好靚
同埋啲拉麵,壽司好好食 」
我:「有錢真係好 」
晞澄:「你都可以架你唔去咋嘛 」
我:「唔好玩啦姐姐仔
似你咁富貴咩 」
晞澄:「兩年先去一次咁就好富貴,


你即係串我啫 」
我:「我十幾年都未去過一次
你同我講你兩年去一次,
根本就係你喺度串我
點呀有冇手信 」
晞澄:「估到你條友問咁耐就係想要手信 」
我:「其實你個人有時真係幾醒 」
晞澄:「唔係有時,
係時時都係咁醒 」
我:「係喇係喇


有咩手信呀 」
晞澄:「擺得落口啱唔啱 」
我:「梗係啱啦 」
跟住佢個喺個書包嗰度攞左一包餅出嚟,
晞澄:「呢個好好食
特登益你呀 」
我:「咁我依家開架喇 」
晞澄:「開啦 」
跟住食落原來真係幾好食
我:「冇買錯喎頂你 」
晞澄:「使乜講,
整塊嚟唔好咁孤寒 」
跟住我地就喺度上堂食野
食足一堂,
唔係講笑,


中學生上堂偷食真係好正
驚俾人發現,
但係又忍唔到口
可能平時喺屋企食完全唔覺咁好食,
但就係因為上堂要心驚膽顫咁樣食,
就會份外覺得好味
食完之後,
晞澄:「你唔好諗住走數 」
我:「你講乜野
無啦啦走咩數 」
晞澄:「差我一個菠蘿油呀 」
我:「痴線咁樣屈人請食野都有嘅
呢啲唔係話係手信嚟架咩 」
晞澄:「唔係呢啲呀,
芒果布甸呀


你上次話請架
唔好諗住呃我 」
我:「乜有件咁嘅事咩
又好似係喎
定係其實你想幾蚊都慳 」
晞澄:「係呀係呀你又知嘅 」
我:「唉,
算數喇
反正啲芒果布甸又真係幾好食,
當我用錢買啦咁樣 」
晞澄:「咁我就唔客氣 」

跟住放咗學之後,
我地就去咗嗰間麵包鋪嗰度買菠蘿油
我:「兩個菠蘿油呀唔該 」


老闆娘:「又係你呀哥哥仔
澄澄都喺度喎 」
晞澄:「係呀姨姨 」
老闆娘:「你地仲話冇野
成日嚟呢度拍拖買野食 」
晞澄:「佢就想呀哈哈 」
我:「唔係呀我唔係幾想咋
我當買包嚟餵雀 」
老闆娘:「你地又喺度鬥氣 」
我:「唔講邊有得笑
係咁架啦 」
跟住我地就一路行一路食,
我:「你同老闆娘識左好耐
點解成日叫你做澄澄 」
晞澄:「細細個成日嚟買


同埋佢識得我媽咪 」
我:「唔怪得啦
喂係喇你有冇msn 」
晞澄:「無啦啦做乜咁問 」
我:「冇呀,
我諗住想抄功課嗰陣都可以早啲問你丫嘛 」
晞澄:「唔通你係想 」
我:「想乜春 」
晞澄:「你蠱惑呀你 」
跟住我就知佢講乜
我:「係呀係呀,
我要做埋你隻兵溝你
受唔受# 」
晞澄:「唔受喎
不過攞隻手出嚟啦 」
我:「又做乜 」
晞澄:「叫你攞就攞啦 」
跟住佢喺佢書包嗰度拎支筆出嚟,
喺我隻手上面寫野
我:「頂你原來咁無聊
喺我隻手嗰度畫公仔
仲要畫得咁大力
痛呀 」
晞澄:「叫左你帶埋隻眼出街
我想問呢隻係咩公仔 」
跟住我一望原來係一個電郵地址
我:「呢個唔通係 」
晞澄:「今晚add我啦拜拜 」
原來呢個就係佢嘅msn
當日呢個電郵地址,
去到十幾年之後嘅今日,
我唔使望就可以喺電腦打到出嚟
好可惜嘅係msn已經收皮
或者咁講,
有時唔係淨係件事,物件有改變,
其實人都會
桃花依舊,人面全非,
縱使件事唔係好似msn咁樣,
我當佢係歷久不衰先
但係唔等於人物係完全冇改變,
不過可以肯定嘅係,
嗰個感覺,
係唯一一樣可以保持嘅野,
我諗我都可以成為當中嘅例子,
過左咁多年,
我都仲係咁響往,
同呢個電郵地址嘅主人一齊時嗰個感覺,
你唔會成日掛喺口邊
周圍同人講,
反而會將佢收埋喺腦入面最深入嘅位置,
唔係因為你唔記得所以先擺咁入,
調返轉頭正正係因為你太深刻
所以先放心擺喺一個咁隱蔽嘅位置,
去到一個人放空嘅時候,
就會自自然然喺腦入面拎出嚟懷緬
當日隻手俾人畫嘅嗰個痛楚,
已經不知不覺間轉化成腦入面嘅思念,
依家嘅我先知道,
原來虛擬嘅思念,
比起實在嘅痛楚,
更加刻骨銘心.