[真人真事][校園][純愛]《總有一天，會再次遇見》: 第十四章

返到屋企嗰陣,
搞完一輪,
我再望一望隻手
先記得呢個就係晞澄嘅msn
咁我梗係拿拿臨,
搵張紙寫低先
既然佢話夜晚先搵佢,
咁咪夜晚囉
反正其實我又唔係好急,
你估我好似嗰啲兵仔咁樣咩


拎完msn就喺度自high
當時我嘅感覺就係,
又多左一個人嘅msn喇
就係咁多,
完全冇特別嘅幻想,
唔覺得有咩特別
搵張紙抄完之後就繼續做自己野
直至去到沖完涼嗰陣,
先至拎返張紙出嚟
對住msn個新增聯絡人咁樣打落去,


打完之後咪等囉,
跟住我就見到晞澄佢搵我喇
晞澄:「其實我總係覺得你有陰謀 」
我:「係呀係呀我有好多陰謀呀
咁你唔好俾丫笨 」
晞澄:「所以我都有啲後悔 」
我:「咁你死喇
我一得閒就炸你 」
晞澄:「無聊
呢啲咁嘅野係得你先諗得出 」


我:「我就唔信喇
不過都係講笑啫
邊有咁得閒理你 」
晞澄:「咁你加我做乜啫 」
我:「咪話想方便啲我抄你功課囉 」
晞澄:「白痴點樣抄呀
鏡頭咁濛 」
又係喎
點解我咁樣都諗唔到嘅
仲話自己好醒
拎完返嚟之後原來冇用
我:「頂
係喎 」
晞澄:「想溝女都唔該搵個好啲嘅藉口丫
好彩我仁慈,


冇即時踢爆你嘅詭計 」
我:「小姐你會唔會自視過高 」
晞澄:「學你咁講,
我都係講下笑啫
我都知自己咩料架喇 」
我:「突然間轉死性
咁樣講野唔似你 」
晞澄:「不嬲都係咁講自己架啦 」
我:「最緊要就係自己知道自己喺咩位就得
你算唔錯呀有自知之明 」
晞澄:「真係俾你激死
問我拎野食嗰陣就識氹,
平時就唔識
賤人真係冇叫錯你 」
我:「我無啦啦氹你咪仲驚


係咪先 」
晞澄:「咁又係喎哈哈 」
我:「係喇講開又講,
英文嗰份功課幫幫手丫
咁多樣功課就係差呢一樣
你知聽日第一堂就係英文堂
麻煩聽日早啲返丫唔該 」
晞澄:「點解要我早啲返 」
我:「想抄你丫嘛
我知你肯嘅 」
晞澄:「你都傻嘅梗係唔肯啦 」
我:「一次咁多 」
晞澄:「唔制呀
我想瞓多陣
抵你死啦 」


我:「仲話隔離同學喎
咁都唔肯幫,
心都噏埋 」
晞澄:「等你聽日俾人罰留堂啦屎忽鬼 」
我:「落井下石
冇野喇 」
晞澄:「要我早啲起身就唔得喇,
不過依家勉強講都有少少時間嘅
傾住msn咁樣教你喇
不過聽日要一包野飲 」
我:「殺你 」
我心諗你條友又幾識呃人著數
咁就可以有野飲
不過依家有求於你,
我算.



跟住我地做到夜晚十一點先至收皮
老老實實晞澄真係好有心機
起碼幫左我個幾鐘,
就好似當初佢教我點樣寫閱讀報告咁樣,
雖然今次只係喺msn教
但如果唔係佢,
我諗我做到通宵都未完
所以真係唔該晒佢
調返轉我就唔得喇
衰啲講真係你死你事
同埋估唔到佢條友平時咁多野講,
我問佢嗰陣串都冇串過我
成日都話唔明就問
有時仲打好多字
完全冇嫌過我煩,
真係對佢改觀
嗰一刻係我第一次覺得,
總算冇識錯呢個朋友
我:「唔該晒呀 」
晞澄:「你咁客氣我唔慣
總之聽日你識做啦 」
我:「得啦唔使成日提
我同你一樣都係唔鍾意欠人野 」
晞澄:「咁我等你請我飲喇
我要熱維他奶 」
我:「收到喇大姐 」
晞澄:「咁樣又一晚,
我都瞓覺喇拜拜 」
我:「拜拜 」
跟住就見到佢離線,
依家再望一望佢個icon,
背景好有秋意
佢企左喺一棵金黃色嘅樹隔離影,
塊面掛住佢最擅長嘅表情
亦即係笑,
的而且確係好燦爛嘅
睇睇下我都明白,
點解咁多男仔話佢笑得好靚,
無論係近望,
又或者係影相,
佢都將佢嘅優點表露無遺
以前都唔知,
呢個笑容原來係咁有魔力.