[真人真事][校園][純愛]《總有一天，會再次遇見》: 第二十六章
之後都冇乜特別,
都係繼續返學嘅日子
日日都係差唔多咁
有時有人嚟搵晞澄,
但晞澄又唔想嘅話,
咁嗰日多數都係由我陪佢放學
最記得有一次,
有條痴漢真係跟住佢
點解我地會知
因為真係咁啱得咁蹺
晞澄甩咗鞋帶
停喺度綁返嗰陣,
我喺條街個鏡嗰度見到有條友又咁啱停低咗
嗰條友好似就係晞澄其中一個追求者
但我真係唔肯定,
所以就細細聲問晞澄
我:「你識唔識後面企定定嗰條友
擰轉頭嗰陣唔好咁大動作呀
」晞澄:「望下先
」望完之後佢同我講,
晞澄:「咪就係今日想約我嗰條友囉
做咩呀
」我:「佢應該係跟住你
頭先你喺度綁鞋帶嗰陣,
佢又停喺度
」晞澄:「唔係咁痴線下話
」我:「我地唔好理照行先,
一陣轉彎嗰陣再睇下係咪
」跟住我轉彎就乘機望望佢
原來嗰條變態佬真係跟蹤晞澄
鬼鬼鼠鼠咁樣
咁我就梗係同佢講返,
我:「真係喎
點算好
」晞澄:「原來佢係變態佬
」我:「證明你幾受歡迎
」晞澄:「唔好笑呀
」我:「我諗到樣野玩
應該可以激走佢
」晞澄:「玩乜先
」我:「陣間先講你知啦,
依家去食野先
最好去一間可以喺出面望入嚟嘅餐廳
」晞澄:「街市嗰間餐廳囉
」我:「咁就入去啦
」入到去坐低叫完野食之後,
我就望出面睇下嗰條痴漢喺唔喺度
點知嗰條友真係喺度
真係變態架
證明愛一個人有幾偉大,
寧願犧牲自己時間,
都要跟蹤一個冇乜機會嘅人
某程度上都服咗佢嘅
我:「仲喺度喎
」晞澄:「唔係掛
佢條友會唔會跟到返屋企
」我:「係咁嘅話你咪試下接受佢
你睇下佢幾鍾意你
」晞澄:「咁樣做只會令我更加反感
」我:「佢以為你唔知丫嘛依家
」晞澄:「你究竟想玩咩啫
」我:「啲野食嚟嗰陣你就知
」晞澄:「古古怪怪咁樣
」跟住啲野終於嚟咗
晞澄:「嚟咗喇
你想玩咩
」我:「餵我食野啦
」晞澄:「痴線無啦啦做咩咁做
」我:「你諗下如果佢見到佢自己個女神餵其他人食野,
仲唔激到上心口
」晞澄:「做第二啲野都得嘅啫
」我:「打茄輪囉
不過唔好話你我都做唔出
」晞澄:「痴線
」我:「玩唔玩呀
好想睇佢個崩潰樣
」晞澄:「好啦
希望佢會知難而退啦
」利申我嗰陣真係唔係想晞澄餵我食野
只係想激嗰條痴漢
淨係覺得好好玩啫
由於我同佢係坐對面,
大家都係食甜品,
係咩我就唔記得咗
你當係西米露啦,
張枱又係得兩個人
所以其實幾方便,
晞澄:「擘大你個口啦
」跟住我就如佢所言啦,
我:「你識唔識餵架
搞到我滴晒出嚟
」晞澄:「我連我個妹都未餵過
你仲喺度咁多野講
」我:「你有個妹咩
」晞澄:「有呀,
今年中一不過唔同學校
」我:「你地好friend架
」晞澄:「ok啦
始終得一個妹
」跟住我地開始愈嚟愈有默契,
佢條友真係餵得唔錯
晞澄:「唔公平
有乜理由淨係我餵你
」我:「我唔識餵人架
」晞澄:「我夠唔識
」我:「唔係呀頭先你唔錯呀
肯定平時訓練有素啦
」晞澄:「都話冇
快啲到你喇
我隻手好攰
」我:「餵得唔好唔好鬧呀下
當餵狗
」晞澄:「其實頭先我都係當餵狗
」我:「係咩
你咁犀利咩,
狗都識餵狗
」晞澄:「快啲啦咁多野講
」我:「等陣啦
」跟住我就開始餵,
其實我真係唔識
見佢瞇埋眼個樣,
我有一秒想整蠱佢
不過都係算啦,
費事又整嬲佢
都係好地地咁樣餵佢算喇
晞澄:「唔錯唔錯
都算合格
」我:「平時落街都鍾意俾啲麵包雀仔食
同一個道理
」晞澄:「係咪餵得女仔多
」我:「冇餵過
」晞澄:「信住你先啦
」跟住我見到嗰個痴漢行近咗
我:「嗰條友行近咗,
你個樣食得滿足啲啦
佢呢個位應該見到你個樣
」晞澄:「好
」跟住嗰下我餵佢,
佢食完之後喺度微笑
嗰一刻我望住佢,
唔知點解成個人好緊張
好熱咁樣,
應該係我第二次覺得佢好靚,
對上一次應該係我第一次請佢食菠蘿油嗰陣
我望到定晒格,
之後佢望返住我,
大家四目交投,
幾秒之後,
晞澄:「我個嘴有野
」我:「係呀
你用紙巾整一整啦
」晞澄:「都冇野
你又玩我
無聊
」我:「玩下啫
」晞澄:「嗰條友仲未走
」我:「未呀,
我送埋你返屋企啦
」晞澄:「嗯
」跟住我就送咗佢返屋企,
我:「係喎點解你個妹同你唔同一間學校
」晞澄:「呢間係佢第二選擇,
佢入到首選咪俾佢入囉
」我:「其實有個妹生活係點
你知我啦冇兄弟姊妹
」晞澄:「其實都係咁啦,
不過叫做有個人陪你傾計
細個嗰陣咪帶佢落去玩
」我:「依家你地生活個模式點
」晞澄:「冇乜特別,
不過有野會買埋俾佢囉哈哈
」我:「原來係咁
佢唔會煩住你咩
」晞澄:「唔會呀
佢好識做
」我:「係咩,
都返到屋企門口喇
聽日見啦拜拜
」晞澄:「拜拜
」跟住我就走咗,
行返轉頭嗰陣真係見到嗰條痴漢喺度
佢扮晒嘢企喺到等人
嗰下真係忍唔住笑
估唔到有人真係咁痴線
走去跟蹤一個女仔,
但淨係望住佢而冇進一步嘅行動
當然大個咗就明白,
鍾意一個人真係可以好瘋狂
其實佢冇錯,
只係單純鍾意一個人
每個人嘅方法都唔同,
不過佢選擇用一個世人唔接受嘅方法啫,
我有啲想恥笑當日年少無知嘅自己,
講遠咗
返到屋企,
夜晚上床嗰陣,
唔知點解,
我諗返起晏晝我餵晞澄食野嗰個畫面
依家我就梗係知點解,
但係嗰陣唔知丫嘛,
當時腦入面個畫面真係好靚,
應該係我第一次夜晚諗起佢,
嗰陣應該未係鍾意佢嘅
可能係叫做有少少好感啦.