[真人真事][校園][純愛]《總有一天，會再次遇見》: 第二十五章

你知中學時代架啦,
根本就冇秘密可言
一有啲乜野風吹草動,
好快就會被公開
我同晞澄都唔例外
話說唔知點解冇幾耐之後,
喺班上面有人傳我同晞澄私底下有路
肯定係嗰隻狗公亂咁噏
自己溝唔到晞澄就喺度亂講野
喺我地班嗰度,


就連班主任都知呢件事
班主任:「唔怪得賢仔近排嗰啲功課咁好
原來有人教路」
我:「唔係喎,
不嬲都咁醒 」
班主任:「慳返啖氣啦
我都做過中學生我都知咩事
冇問題嘅冇問題嘅 」
班主任咁樣講法,
即係間接送我落地獄


今鋪真係水洗都唔清
我同晞澄真係冇野架
佢只係搵我嚟過蹺避開啲狗公
我地身邊嘅朋友就知道係咩一回事,
但係其他人唔知丫嘛
但我見晞澄好似平時咁樣,
每次俾人講起都笑口噬噬
完全唔尷尬
我:「你好似完全冇野咁嘅 」
晞澄:「點解要有野 」


我:「我地俾人老屈喎 」
晞澄:「我地知咩事咪得囉
不如就將計就計,
以後有啲人搵我,
我就話約咗你
咁就唔使俾人煩
爽 」
我:「你就真係爽得過
益咗你啦 」
晞澄:「唔係應該調返轉咩 」
我:「又唔係喎
搞到我打少咗機 」
晞澄:「真係難為你喇賢哥 」
喺嗰排呀邦都係咁問我係咪有路
講咗幾多次冇


又要再講多次,
唉
唔係話我唔鍾意俾人傳,
而係事實上真係唔係
好明顯佢只係利用我趕走啲狗公
一有人約晞澄,
晞澄就已經話約咗我
搞到班狗公好冇癮
不過有時睇佢地個失落樣又真係幾抵死
唔使錢就有花生食,
都算係欣慰嚟嘅.

之後有一日,
晞澄放咗學話想食野
點知嗰日佢個姊妹呀穎就冇返學


又咁啱嗰日有狗公問佢得唔得閒,
呢個時候唔使問,
就梗係我出馬啦
我仲記得嗰日係去茶餐廳食西多
你知啦西多士好頂胃
所以我就打電話返屋企,
叫老娘唔好咁快煮夜晚飯
點食得落
順便喺附近商場行下,
當我知會咗呀媽之後
晞澄:「新電話喎 」
我:「頂你唔通舊咩 」
晞澄:「使唔使呀
講句野都窒住晒 」
我:「咁真係丫嘛 」


晞澄:「幾時買架 」
我:「咪上個禮拜六,
難得老媽子肯出錢 」
你知啦,
嗰個年代電話冇依家咁普及
依家小學生都用緊生活態度
喺嗰陣唔係個個中學生都有一部電話,
我都係上到中四先有
世界唔同咯
晞澄:「你咩台呀 」
我:「人囝 」
晞澄:「好喎,
同台sms爽 」
我:「做乜抄我 」
晞澄:「你抄我囉好唔好 」


我:「肯定係你太想同我sms
所以未卜先知就上人囝 」
晞澄:「幻想力真係唔錯 」
我:「都幾架 」
晞澄:「無聊
得閒搵你啦下 」
去到夜晚晞澄真係搵咗我
嗰次應該係我第一次sms
有時人就係咁,
永遠對第一次都係咁眷戀
一提起第一次就會好有印象,
但其實平時可能記性好差,
尋晚食咗乜都唔記得
但係就會記得十幾年前,
一啲咁鎖碎嘅事
晞澄:「變態佬 」
我:「痴線無啦啦屈人變態佬 」
晞澄:「唔係屈,
根本你就係 」
我:「你隻眼都唔知睇乜 」
晞澄:「做咗功課未 」
我:「話題轉得咁快 」
晞澄:「唔好接丫笨 」
我:「做晒啦等你咩 」
晞澄:「唔係喎,
老師話要做埋第18頁 」
我:「頂你唔好遲啲先講 」
晞澄:「唔係我提你,
聽日你戇居居俾人罰咋 」
我:「真係好乸多謝喎 」
晞澄:「識唔識呀 」
我:「拎緊出嚟 」
跟住做做下有一條真係唔識,
我:「認真有一條真係唔識 」
晞澄:「講嚟聽下 」
我:「不如打電話啦
用sms有排都未做完 」
跟住佢就打過嚟,
晞澄:「喂.」
我:「你把聲同真人差唔多 」
晞澄:「廢話
梗係啦 」
我:「唔係呀我見過有啲人差好遠 」
晞澄:「你隻耳有問題啫下話 」
我:「講真,
下次我地用屋企電話玩三人會議試俾你睇 」
晞澄:「好
邊條唔識呀 」
我:「呢條呀 」
晞澄:「好易啫 」
講完一輪終於做完
晞澄:「訓覺啦聽日仲要早醒 」
我:「真係唔該晒 」
晞澄:「終於講返句人話 」
我:「拜拜啦 」
晞澄:「拜拜 」
跟住我就save低佢個電話,
呢八個數字真係好奇妙
原來當日,
我唔止save低喺部nokia電話度,
仲已經收埋左喺個腦度
有時人真係好犯賤,
明知有啲野都唔會再用得著,
衰啲講已經係冇用,
根本就係攞嚟衰,
但偏偏唔捨得刪除.