[真人真事][校園][純愛]《總有一天，會再次遇見》: 第三十四章

跟住我地就去咗吉野家嗰度打邊爐

一般學生哥都係咁架啦

你估好似依家咁樣搵到錢

可以食豪啲咩

好死唔死,





打打下邊爐嗰陣

見到有幾個同班同學

你知架啦,

中學雞一俾人見到一齊出街,

返到學校嗰陣就一定有緋聞





當然啦,

喺嗰陣我同佢已經有緋聞

不過打句問句,

我呢啲毒男就梗係唔想有呢啲野啦

唔好打擾我平靜嘅生活





至於晞澄點諗就唔知喇

同學a:「你地喺度打邊爐呀 」

我:「你問啲野真係有建設性

唔係呀我地唔係打緊邊爐呀 」

真係頂你個肺

成張枱兩個爐擺咗喺度,

都仲問我地係咪打邊爐

R水吹都問過第二樣呀





同學b:「都估到你地有蠱惑啦 」

晞澄:「只係咁啱撞到啫 」

我:「係囉,

咪就係咁啱撞到咋嘛

如果咁啱撞到你我諗我都會同你一齊打邊爐 」

同學a:「實係咁啦唔阻你地啦拜拜 」

之後嗰兩條蛋散就走咗





呢兩條友講嗰啲野真係無聊到極

都係一般傻仔嚟唔使理佢

當然啦可能係佢地心目中我都係一個傻仔

我:「返到班房可能又係咁傳嚕 」

晞澄:「係咩唔緊要啦 」

我:「係喎話時話你好似對呢啲緋聞冇乜野 」

晞澄:「你想可以有啲乜野 」

我:「我以為個個女仔都唔鍾意啫 」





晞澄:「點解咁講 」

我:「以前小學又或者中二中三嗰陣,

我見到傳緋聞嗰啲女主角

好多時都唔鍾意人地講 」

晞澄:「個個女仔都唔同嘅

點知人地點解 」

我:「可能係你厚面皮呢 」





晞澄:「你講你 」

我:「我就不嬲都認嘅 」

晞澄:「咁就啱

幾驚你話你自己唔係 」

之後我地就投入咁樣去打邊爐.

打完邊爐

正當我諗住返屋企嗰陣,

點知佢又叫停咗我

晞澄:「今日都未 ?」

我:「你仲想有咩節目 」

晞澄:「喺附近行下先啦

未夠時間呀 」

我:「唔明咩叫未夠時間 」

晞澄:「一陣你咪知囉豬頭丙 」

之後我地喺附近又行過,

但係大家都知啦,

行得多都悶

佢又話一陣仲有野搞(各位唔好諗錯隔離)

仲有咩行先得架

結果我地就去咗影貼紙相

我:「唔影呀 」

晞澄:「乖啦影一次啦 」

我:「都唔知有乜好影

又唔係平喎 」

晞澄:「呢度已經算平喇

唔知就唔好出聲啦 」

我:「你啱你啱

不過都係唔影 」

晞澄:「請埋你喇屎忽鬼 」

我:「唔影 」

晞澄:「影啦 」

我:「唔影 」

晞澄:「影啦 」

我:「好喇好喇 」

晞澄:「yeah 」

其實真係好難拒絕佢嘅,

我都知自己衰仔唔夠堅持

不過冇所謂啦

入到去做埋啲騎呢表情真係好尷尬

依家一定唔會做先囉

晞澄:「你望下你個樣幾傻仔 」

我:「你睇下你

話人 」

晞澄:「係喎點解我個樣咁架 」

我:「冇計啦本身你個樣係咁丫嘛 」

晞澄:「唔好笑呀 」

我:「不過最靚好似係呢張 」

晞澄:「又係喎好似 」

我:「咁我都keep張

比返錢你喇 」

晞澄:「唔使啦頭先都話我請你 」

我:「唔係幾好意思嘅要你靚女請

我個心過意唔去呀 」

晞澄:「你講野再假啲丫 」

跟住我就一手俾咗一張相嘅錢佢

晞澄:「張相你要keep住呀 」

我:「痴線我買得就梗係會啦

不過可能返到屋企又唔知擺咗邊 」

晞澄:「擺落銀包到 」

我:「睇下點先啦 」

晞澄:「都唔知你係咪得個講字 」

我:「唉依家擺喇咁多野講 」

晞澄:「唔錯唔錯 」

我:「你真係麻鬼煩 」

晞澄:「唔理你講啲乜啦嘻嘻 」

的而且確去到之後,

張相我一直都擺咗落去我自己銀包度

就算換咗銀包都冇變到,

直至依家張相都仲喺度

咁當然就唔會再擺喺銀包嗰度啦,

有咗老婆丫嘛哈哈.