[真人真事][校園][純愛]《總有一天，會再次遇見》: 第三十六章

跟住生活都冇乜點變

我都唔特別講喇

費事又俾人話講廢話喇

去到九月就開學,

咁就過咗兩個月



有啲同學可能耐冇見,

啱啱見返比較多野講

至於我同晞澄,

話晒暑假嘅星期一,三,五都成日見啦

所以都冇乜特別生疏又或者興奮,



咪又係咁

跟住落嚟嗰幾日,

我發覺唔知係咪因為上咗中五嘅關係

成班人突然之間認真起嚟

聽書嗰陣竟然冇人傾計咁濟



有時去到小息有幾個仲喺度研究緊試題

搞到我都開始受到感染,

覺得會考真係幾重要

慢慢開始意識到嗰個危險性

推返晒早幾個月講嘅野

唔知點解嗰一刻開始睇,

我對自己成績冇乜信心

雖然暑假溫咗一個月書,



點都比之前好架喇

但你話係咪一定可以符合到原校升讀中六嗰個條件,

老實講我真係有啲保留

晞澄佢讀書不嬲認真,

所以望落去分別唔係好大

但你知我啦

平時都冇自律性



如果你叫我自己一個溫書,

我可以同你講一定唔會

同呀邦都未必得

因為我一定掛住同佢傾計

咁就前功盡廢啦係咪先

所以有一日我就同晞澄講,

我:「不如我地以後放學好似之前暑假咁囉 」

晞澄:「你想講溫書 」



我:「係呀

我自己一個一定唔會

有你就唔同喇

你咁叻又咁好人

肯定會指點迷津啦 」

晞澄:「做乜賣口乖 」

我:「我諗住問你一唔一齊啫



你知你貴人事忙架啦

咁q多節目 」

晞澄:「其實呢我本身放完學都會溫書嘅

既然你咁懶都講到出口

我實俾面你嘅 」

我:「喺學校溫好唔好

唔使行喎

樓下就係 」

晞澄:「好呀 」

我:「照舊一三五 」

晞澄:「好 」

我都估唔到有一日,

係我自己提出要溫書

真係講都冇人信

的而且確事後證明呢一個決定係正確嘅

講起喺學校溫書有一件趣事可以分享下

印象中嗰陣都係九月

咁我同晞澄就去咗樓下學校圖書館溫書啦,

突然之間溫溫下有個狗公行過嚟

狗公:「charlotte乜咁啱呀

喺度溫書呀 」

呢個人引起話題真係非常之差

竟然問一句咁樣嘅廢話

嚟圖書館攞住本教科書同埋筆記喺度睇,

唔係溫書唔通打邊爐咩叻仔

咁當然我冇鬧佢

我淨係望住佢啫

晞澄:「係呀 」

之後嗰隻狗公望一望我

狗公:「你地一齊

介唔介意加埋我 」

晞澄:「最好就唔好啦

唔鍾意咁多人一齊溫 」

晞澄真係好心狠手辣

一嚟就拒絕佢

真係笑死

狗公:「老實講丫你同xx賢一齊溫都學唔到野架啦

不如同我溫 」

晞澄:「你唔清楚就唔好亂講啦

就算佢(指住我)點樣蠢都應該好過你嘅我諗

起碼佢醒目過你,

俾少少signal就知我要啲乜

咁你話佢仲唔係叻過你

跟住我見到嗰隻狗公塊面黑過包公

狗公:「唔怪得有人話你兩個有野

原來真係 」

之後佢就走咗

我:「好大火氣喎 」

晞澄:「呢條友真係好煩

拒絕咗咁多次佢都仲係嚟搵我

同埋仲要鬧你

唔知頭唔知路就唔好亂講啦 」

我:「唔使咁嬲啦

又唔係你俾人串 」

晞澄:「咁係丫嘛

講真其實你真係一啲都唔蠢,

我講喺讀書嗰度呀

都唔知有乜好串

最唔鍾意就係呢啲人 」

我:「老實講我又冇乜野

俾人講兩句又唔使死

我從來都唔介意啲人係話我唔叻,蠢 」

晞澄:「總之我睇唔過眼就串佢啦 」

我:「點解睇唔過眼 」

晞澄:「因為

得我先可以串你囉嘻嘻 」

我:「呢個係咩解釋 」

晞澄:「你唔好理咁多啦

總之我話係就係 」