[真人真事][校園][純愛]《總有一天，會再次遇見》: 第三十七章

開咗學冇幾耐

過多一排就係秋天

秋天就唔使講,

我地呢啲中學雞

一講到秋天,





最鍾意就係秋季旅行架啦

因為唔使返學

第二日仲有學校補假丫嘛

真係十分之爽

大家都知架啦,





學校旅行就要分組嘅

我地呢班就懶啲

男一組女一組就算

我記得嗰陣係禮拜五去旅行,

咁成班就決定咗,





禮拜四放完學之後就一齊去買野食,野飲同埋炭

講真食乜又有乜所謂

成班人都係志在吹水架啦

咁樣喺嗰日放咗學之後,

我就同呀邦仲有幾個男仔一齊去買飮品

老老實實飲品真係好q重

最衰都係呀邦

猜包剪揼猜輸咗





之後入到去百佳定唔知喺惠康,

就即刻去咗飲品嗰一欄

行行下見到一大堆同學喺度

其中一個係晞澄

佢條友竟然淨係負責拎肉

仲要得一袋

我:「你就正啦





我地就拎飲品

你就淨係拎牛扒

仲要一袋

晞澄:「猜輸咗係咁架喇

飲品都唔係好重啫 」

我:「落井下石

賤格 」

晞澄:「辛苦你啦拜拜 」





呢條友行過嚟抽兩句水就走人

真係好可恥

我都唔期望佢幫我拎丫,

都唔使咁樣下話

聽日收起晒啲飲品唔俾佢飲先

買完之後我地都返咗去

唔係講笑半打可樂都幾係野





幾經辛苦都終於返到屋企

夜晚我見到有人msn我,

原來又係晞澄

晞澄:「都拎到返屋企

即係唔係好重啦 」

我:「你唔出聲冇人話你啞

仲話坐隔離

手都唔幫 」

晞澄:「你想點幫先 」

我:「都返咗屋企啦仲有咩用啫 」

晞澄:「玩旋轉泡泡球啦

玩完先答你 」

我:「未驚過

話說上次之後我又苦練咗好耐

今次你一定輸 」

晞澄:「睇下點 」

點知我都係一次都贏唔到

佢條友一定開外掛

玩玩下都玩到成一點幾

晞澄:「聽日幫你拎啲喇

見你今晚咁抵得諗做咗魚腩 」

我:「睇你囂張得幾耐

遲早俾我反底話你聽 」

晞澄:「好 」

我:「不過你想點幫手拎先

老實講我又唔拘呀 」

晞澄:「聽朝麥當勞等啦 」

我:「總算你似返個人 」

晞澄:「唔講咁多喇原來成點幾

最衰都係你搞到我咁夜都未瞓 」

我:「收皮啦明明你撩我玩先 」

晞澄:「係咩

唔知喎 」

我:「你真係調轉咗主客 」

晞澄:「唔知啦聽朝麥當勞先講啦

早抖喇 」

我:「早抖啦你 」

第二朝我再sms佢幾點等

一嚟尋晚冇講幾點等

二嚟順便可以確認下佢有冇起身

如果冇起身我又戇居居出咗去等

到時鬧佢都於事無補啦

點知佢竟然秒回

我心諗你條友竟然知醒

一陣問佢先

之後去到麥當勞,

因為嗰度唔多位,

所以我就叫佢俾錢我

我出去幫佢買埋

佢就負責霸位

買完返嚟之後就開餐,

一般人朝頭早通常都係比較遲鈍

起碼我身邊都有幾個係咁

但係佢又冇呢個徵狀

我:「你好似咁醒神嘅 」

晞澄:「訓醒咗丫嘛

做乜咁問 」

我:「冇我身邊有幾個人都係朝早鈍下鈍下咁啫 」

晞澄:「你都唔知我今朝起身嗰陣幾唔想呀

最衰都係掛住玩 」

我:「牛唔飲水唔撳得牛頭低呀師傅,

夠膽就查紀錄睇下邊個叫玩 」

晞澄:「唔查嚕 」

我:「挑 」

晞澄:「食唔食熱香餅

飽飽地

放心啦我係切出嚟食 」

我:「好喎 」

之後食嗰陣,

我發現竟然好食過平時我自己搽嗰啲

我:「又幾好食我頂你

你竟然話飽飽地 」

晞澄:「咩竟然啫

食你就食啦咁多野講 」

我:「係嘅係嘅 」

嗰塊野好食到令到我做咗死狗

咁你諗下有幾好食

晞澄:「俾啲可樂我喇

我可以放喺背囊 」

我又未去到咁衰嘅

無理由叫個女仔拎晒六罐可樂

所以我就拆開咗

俾咗兩罐佢

我:「咁就唔該晒你喇靚女 」

晞澄:「咁好死竟然唔係全部俾晒我 」

我:「我咁有風度又點會咁樣做呢 」

晞澄:「哦

聽住先啦 」

我:「好心你就讚下我 」

晞澄:「咁呀

多謝你咁益我囉

咁好冇 」

我:「好過冇 」

晞澄:「死啦你 」

之後我地就返學校集合.