[真人真事][校園][純愛]《總有一天，會再次遇見》: 第三十九章
之後我地就返去集合
搞咗一輪,
大約三點幾就上旅遊巴返學校
回程途中咁啱我坐喺晞澄後面
其實原本我係唔知
因為一上車我就同隔離嘅呀邦玩
完全冇留意有邊個坐喺我前後
係坐坐下車我見到條馬尾先至認得係晞澄
各位冇睇錯呀,
我係因為條馬尾先至知係佢
大佬呀,
話晒坐佢隔離出咗咁耐
再加上平時間唔中會整蠱下佢
玩佢條馬尾
點會認唔到係佢
講起呢度可能大家會問,
點解我仲坐緊喺佢隔離
話說我地班主任就係教英文嘅
老老實實其實我想調位架
唔係我死都要留喺佢隔離
而係嗰次老師話見到我英文好咗咁多
佢直覺係晞澄幫到我
所以佢就一直安排晞澄坐我隔離
我真係有叫過佢調位
不過佢唔肯
之後我同返晞澄講
佢仲話我賣唔甩佢
叫我死咗條心佢啦
極度囂張
所以成績好真係好著數,
老師都會特別偏幫佢地
講返依家先,
咁佢feel到自己條馬尾俾人整
就即刻講:「xx賢你又玩啦
」我:「點解你會知係我
」晞澄:「你估我係你咩
一坐落嚟就見到你坐我後面
係你拾下拾下唔知咋嘛
」我:「放心我洗乾淨隻手先玩
鬼叫你條馬尾吸引咩
」晞澄:「落車你就死
」呢個時候,
坐我隔離嘅呀邦就梗係喺度抽水啦
我都講咗十幾萬次係玩
完全唔係佢諗嘅咁樣
點知佢唔信
我話知佢信唔信啦,
總之我打死都會否認架喇
唔知坐我前面嘅晞澄聽唔聽到呢哈哈
我見佢冇乜反應,
應該唔知掛.
落到車
成班人話不如去食糖水,
咁我呢啲跟大隊嘅就梗係冇所謂啦
同埋真係有少少肚餓
呀邦條蛋散話返屋企打機
所以佢就冇去
佢唔喺度我就梗係搵平時同我玩開嗰班男仔
點知佢地都話唔去
最後我就搵咗晞澄
好彩佢話去啫
如果連佢都唔去我就諗住返屋企食自己
依家就好啲
之後成班人去咗我同晞澄平時成日去嗰間糖水舖嗰度,
點知一開門就俾老闆娘認得我地
跟住唔使問,
梗係又俾人抽水啦
明明我同晞澄都唔係成日去
點解嗰個老闆娘會認得架
唔好理啦
不過好彩嘅係,
我同晞澄冇因為緋聞而疏遠
如果唔係我會考真係冇著落
好彩啫好彩啫
食完之後就各散東西
之後晞澄同埋呀穎問我喺唔喺附近行下先,
老實講我就冇所謂
不過初頭我都有啲卻步
係因為平時淨係我同埋晞澄行,
不過今次就多咗呀穎喺度
唔知會點架嘛
不過好彩行落又冇問題
大家有傾有講氣氛好好
同我當初諗落去係兩回事,
一路行嘅時候睇得出晞澄同埋呀穎真係好好朋友
嗰種默契真係唔係講笑
同埋佢地有樣野好
就係唔會自己喺度傾密偈
你知啦有時咁樣真係好尷尬
三條友喺度,
但係當中有兩個係講得佢兩個先至明嘅野,
另一個就硬膠膠咁樣棟喺度
呢啲人真係好黑人憎
好彩佢地唔係咁
行咗一陣我地就先送呀穎返屋企
送完佢之後就到我送晞澄
一嚟嗰陣都六七點
你知啦秋天嘅六七點已經黑晒,
二嚟呢個都係慣常動作
其實冇乜特別
咁樣喺過程途中,
晞澄無啦啦俾首歌我聽
晞澄:「近排我聽到有首歌好好聽呀
」我:「新歌嚟
」晞澄:「係呀
」我:「邊個唱架
」晞澄:「Eason囉
」我:「你就搵啱人喇
話說我就係Eason fans
」晞澄:「真係
考呀你識唔識先
」之後我地一人戴一邊耳筒,
呢次應該係我第一次同人戴同一個耳筒
因為本身我係唔鍾意咁樣嘅
覺得好麻煩
咁依家佢話俾首歌我聽,
部mp3機又係佢嘅,
我邊有話事權
咁咪照用囉
一聽嗰陣,
原來係粵語殘片
當時呢一首歌係新歌嚟
同埋唔似依家咁多人識,
因為嗰陣moving on stage仲未舉行
印象中係因為Eason喺moving on stage唱過先至開始流行
同埋嗰陣嗰隻碟最出名應該係富士山下
跟住就應該係裙下之臣,黑擇明,
粵語殘片絕對唔多人識
不過嗰陣嘅我就幾鍾意呢首歌
純粹係旋律上啫,
去到後來先明白歌詞點解,
之後我哼咗幾句
晞澄:「真係識唱喎
」我:「唔係你估
」晞澄:「我問啲人,
啲人都係淨係識富士山下
現實嚟講你係第一個識呢首歌
」我:「呢首歌旋律正呀丫
」晞澄:「唱多幾句啦
頭先見你哼得似模似樣
」我:「唔識唱歌咪盞俾你笑
」晞澄:「唔會笑唔會笑
」我:「唔唱
」晞澄:「唱少少啦
」我:「不如你唱啦
突然之間唔記得歌詞
」晞澄:「你唔想就無謂迫你
不過頭先聽你哼真心覺得幾好聽
」我:「唔知你係咪想潤我
」晞澄:「講真呀
」我:「有機會先啦
」晞澄:「好
」今天看那段歷史 像褪色午夜殘片
笑話情節 此刻變窩心故事
現時大了 那種心跳難重演
極燦爛時光一去難再遇上一次
以前聽嗰陣就純粹覺得係旋律好,
當去到再大個嗰陣,
先至明白呢首歌唔止係旋律好
啲詞仲好到肉
講開又講,
識咗我老婆以嚟咁多年,
同佢唱過咁多次k
我從來冇喺佢面前唱過呢首歌,
佢問親我識唔識唱,
我都話唔識
好彩佢冇查過我手機嗰個歌list,
如果唔係就大鑊
老實講丫,
有邊個會想講大話,
你估真係好好玩咩
不過喺呢件事上面,
對比起講大話,
我更加唔想講真話.