[真人真事][校園][純愛]《總有一天，會再次遇見》: 第四十章

其實去到呢一刻,

我對晞澄都未去到有好感嘅階段

最多只係比較好嘅朋友

同埋覺得佢笑得好靚,

就係咁多啫



呢個係講真嘅

當然啦,

冇幾耐之後發生咗一件事

就令到我對佢開始有好感

其實依家諗返起,



都真係幾搞笑

不過我唔係幫自己辯護,

鍾意一個人,

又或者對一個人有好感,

嗰啲原因就梗係得自己先知架啦



你同其他人講係唔會明

我好相信嘅係,

每個人鍾意一個人

當中嘅原因,

一定係自己先有體會

或者嗰個契機係好搞笑,

甚至係好微不足道

但正正係因為呢啲事,



你可能先至會鍾意嗰個人

我諗我都唔例外

竟然會因為呢件事,

而對佢有好感

有時我都喺度諗,

如果當日冇呢件事,

會唔會有之後嘅劇情發生呢



你知啦,

人無聊嗰陣就梗係會亂諗野

不過當然冇結論啦

因為現實唔係好似打機咁樣,

有得save and load,

過咗去就係過咗去

我地應該做嘅唔係諗埋啲無聊野,

而係慶幸腦裏面有呢啲回憶



當然啦如果你話呢啲野你係唔鍾意嘅,

咁就盡快拋諸腦後啦,

對於我嚟講,

無論結果如唔如意都好,

都冇嫌棄過擁有呢啲片段

又或者咁講,

我並冇後悔當日因為呢啲咁搞笑嘅原因,



而鍾意呢個人.

咁究竟係咩原因呢

話說嗰陣係十二月頭,

即係秋季旅行冇幾耐之後嘅事

我好記得有一晚,

禮拜日嚟嘅

我同屋企人嘈咗幾句

咁樣嘈完之後夜晚上床就喺度流馬尿

其實我都係嗰啲大男人嚟


唔鍾意喺人前喊,

鍾意匿埋匿埋釋放情緒

咁去到第日星期一嗰朝,

我再望下自己隻眼都唔算好腫

我自己就睇到有分別嘅

但你話係咪好明顯腫就唔係,

其實返到去都冇人知

完全冇人提出有異樣,

咁樣大家都知啦,

星期一放學之後我會同晞澄去溫書

咁樣同佢溫完之後,

就決定返屋企

行出去學校門口之後,

晞澄:「尋晚你係咪喊嚟 」

我個刻真係呆咗一呆

我估唔到佢竟然會留意到

我返咗成日學係冇人問我,

又或者佢地費事問我呢個毒男

反正冇人在乎

不過晞澄嘅觀察力真係好入微

晞澄:「你唔想講可以唔講

不過有時情緒真係要釋放出嚟 」

唔知點解,

嗰一刻我選擇將我尋日喊嘅原因講晒出嚟

平時嘅我係絕對唔會咁樣做

晞澄:「咁啦

我諗冇一個屋企人會想自己個仔唔好嘅

當然我都知你好嬲同埋唔開心,

不過一家人邊有隔夜仇

至少我冇啦

呢啲問題好易解決啫 」

原本我都唔知返到屋企點算

聽晞澄講完之後,

成個人終於有返方向

知道要做啲乜

我:「多謝你聽我講咗咁耐廢話 」

晞澄:「其實我唔係好慣你咁認真講野 」

我:「總之多謝晒你啦 」

晞澄:「笑返咪好囉 」

唔知各位有冇同感啦,

其實喺唔開心嗰陣,

有個人喺你隔離俾你訴苦,

已經勝過千言萬語

老實講佢冇義務咁樣做,

佢大可以唔理你

話趕時間返屋企,

你估朋友真係大晒咩

所以各位真係要珍惜,

喺你隔離真心聽你訴苦嘅嗰個人

因為真係唔多,

或者我就係因為咁樣,

所以開始對晞澄有好感

有時鍾意嘅野就係好兒嬉架喇,

一個行為又或者一句說話,

就足以成為一個契機,

令你傾心

你依家問返我,

我都唔知當日因咩事同屋企人嘈,

但我就係好記得嗰日係得晞澄察覺到同埋做咗一個樹窿.