[真人真事][校園][純愛]《總有一天，會再次遇見》: 第四十四章

之後除夕嗰日嘅下晝

我地成班就去咗嗰個同學嘅屋企

我仲記得我地玩開嗰幾個係好遲先到

約咗三點,

好似兩點五十七分先至到門口



最衰都係打多咗鋪機先走

一去到嗰陣已經好多人

正當我搵緊晞澄喺邊度嗰陣

我見到有個女仔著得好靚

嗰刻我係俾佢嘅衣著吸引咗眼球先,



著住一件紅色大褸

下身係一條黑色裙再加黑色legging

之後再望上去就係一條馬尾

因為我見到佢嗰刻係背面嚟,

好自然見唔到佢個樣淨係見到佢個髮型



呢個時候我就知呢個女仔係邊個

跟住佢可能聽到後邊有聲,

就擰轉頭望住我個方向

咁啱得咁蹺同我個視線對上咗

望咗一兩秒之後我就下意識望去第二度

跟住覺得有啲唔自然

我好少有呢個反應

所以我就唔知點解會有呢種感覺



當然啦過咗一陣之後就自然返

不過間唔中會望過去玩緊嘅晞澄嗰邊

以前我係唔會咁樣做

邊度會偷雞望佢丫

不過今日就例外

跟住係去到成班一齊食野嗰陣,

我同佢先有啲互動



晞澄:「做乜啱啱唔過嚟玩 」

我:「你地玩緊鋤dee又夠四個人

我過嚟做乜 」

晞澄:「你想玩我可以讓個位俾你丫嘛 」

我:「如果你唔玩我點樣頂你啲牌

你都傻嘅 」

晞澄:「你真係好賤

玩個鋤大dee都要做啲咁嘅野 」



我:「唔頂人牌不如唔好玩 」

晞澄:「咁囂張一陣坐我上家囉

我就唔信俾你頂死 」

我:「你叫多兩個人先啦 」

晞澄:「你慌死冇人玩咩 」

之後佢就真係叫多咗兩個人嚟 ,

頭幾鋪真係次次都頂死晞澄



係咁焗佢出A同dee

佢又真係出咗喎

晞澄:「我以為你講下笑

點知真係咁樣做 」

我:「對敵人仁慈即係對自己殘忍呀

你都傻嘅唔頂你

俾你慢慢出好冇 」

話說小弟鋤大dee技術就唔算好犀利

不過如果對住學校嗰班傻仔,

應該佔到啲甜頭嘅

話晒一直有玩開你估流架

所以玩咗一陣之後我好似贏咗六七蚊到

呢個時候我竟然心軟

明明頭先我先至話敵人仁慈即係對自己殘忍,

喺嗰一刻我竟然放棄頂死晞澄

可能我自己覺得唔好意思掛

費事一個人贏咁多啦哈哈

嗰陣我係咁樣同自己講,

實則係咪因為呢個原因,

依家我好清楚係定唔係嘅

跟住就慢慢俾晞澄追返上嚟

咁都冇所謂啦

起碼有得睇佢招牌笑容,

都算係安慰獎嚟嘅.

玩完一陣之後

大家諗住去到十二點,

倒數完之後就各自歸家

因為好快就要返學

唔想顛倒時間

嗰次應該係我第一次同咁大棚人一齊倒數

原來氣氛真係有唔同

的確係濃厚好多

以前我唔覺,

咪又係咁冇乜特別

有啲野真係要試過先知

未試過真係唔好妄下判斷

呢句野喺任何時間都係好適用,

倒數完就返屋企喇

原本我就諗住同呀邦佢地一齊返嘅,

點知我見到呀穎同埋佢男朋友已經一齊走咗

唔通晞澄要自己一個返

其實按道理我嗰區個治安就冇問題

就算係一個人返,

都唔會有乜野危險

不過咁夜仲要佢係女仔,

正常都識做啦

況且我又送慣佢返屋企,

冇理由今日唔送

跟住我就即刻行去搵晞澄

我:「一齊走 」

晞澄:「你唔係同呀邦佢地一齊返屋企咩 」

我:「佢地幾條友點會俾色魔睇中丫

唔驚啦 」

晞澄:「你又知有色魔?

莫非你就係 」

我:「係呀我係色魔呀

唔好走丫笨

如果唔係你就大鑊 」

晞澄:「無聊鬼

行啦 」

之後我同佢就一齊走喇,

晞澄:「點解頭先玩玩下唔頂我牌嘅 」

原來佢察覺到

我:「係咩

冇牌點樣頂你呀 」

晞澄:「實係咁啦.

我:「費事贏咁多啦

你知你幾記仇

又俾你講幾年就唔好啦 」

晞澄:「原來係咁 」

我:「做乜無啦啦笑 」

晞澄:「冇呀

想笑咪笑囉 」

之後行行下愈嚟愈凍

我同佢都頂唔順

晞澄:「好似有啲凍呀可 」

我:「係呀

你地啲女仔唔係隨身帶著暖蛋嘅咩 」

晞澄:「冇呀我都唔鍾意用呢啲野 」

我見佢凍到震晒

仲誇張過我

跟住呢個時候,

我就根據我睇電影學返嚟嘅野,

套用喺現實

即係乜野

依家會講架喇

我:「拎隻手出嚟啦 」

晞澄:「係咪傻咗

咁凍仲叫我拎隻手出嚟 」

我:「拎啦

包你之後唔凍 」

晞澄:「信多你一次 」

跟住我一手捉住佢隻手

你問我有咩感覺,

我真係答你唔到

因為已經凍到麻木晒

冇晒感覺

晞澄:「你做咩呀 」

我:「聽人講話咁樣冇咁凍

咁就啱啦你又凍我又凍

大家捉住咪可以取暖 」

之後佢將我地對手,

放咗落佢衫袋嗰度

晞澄:「咁先至暖架嘛傻仔

就咁拖住邊度會暖 」

老老實實又真係幾暖

慢慢暖返我隻手就開始有啲感覺

原來佢隻手好滑

唔通呢個就係女仔手個觸感

以前我冇拖過女仔手架嘛,

晞澄:「係喎邊個教你咁樣做

係咪以前咁樣拖住女朋友 」

我:「邊有女朋友

我都係睇戲學返嚟

話如果凍嘅話咁樣做可以暖返啲,

又好似真係 」

其實我講啲唔講啲啫

依家覺得咁暖,

其實可能係來自於緊張

第一次拖女仔手邊個會唔緊張呀

唔係話我幫唔幫自己講說話,

當然我唔可以俾佢知我緊張啦

晞澄:「嗯

又真係好暖 」

我地起碼拖手拖咗三個字左右,

去到佢屋企樓下就分開咗

晞澄:「多謝你呀暖晒喇 」

我:「幾驚你真係當咗我係色魔

唔俾我咁樣做

走先喇拜拜 」

晞澄:「咪走住.」

我:「又做乜 」

晞澄:「2007新年快樂呀 」

我:「以為有啲乜重要野

新年快樂 」

之後就真係走咗喇.