[真人真事][校園][純愛]《總有一天，會再次遇見》: 第四十五章

返到去屋企,

我仲喺度諗緊今日發生嘅事

特別係瞇埋眼想瞓覺嗰陣,

腦裏面第一下個影像

竟然係下晝晞澄擰轉頭望住我嗰個樣



慢慢再聯想起頭先我同佢一齊拖手嘅時候嗰種感覺

老實講當時我都唔知點解會咁樣做

竟然會咁有吉屎

主動去拖晞澄,

亦都好彩佢冇拒絕



如果唔係我就真係瘀死

可能我見到佢凍到震晒,

個心憐憫佢所以先咁樣做

又或者我都係好凍,

大家拖住都係各有所需啫



不過講開又講,

以前我好少夜晚會諗起佢

唔好話淨係佢,

即使係女仔,

我都唔會特別去諗

因為我根本就冇試過鐘意人

完全冇經驗

不過今晚嗰啲片段竟然自動湧上嚟



甚至跟住落嚟嗰幾晚都係

有時間一冇野做嗰陣,

個腦諗嘅就係佢

佢講嗰啲野好,

佢嘅喜好又好,

甚至佢嘅表情,一舉一動,

我都印象好深



或者,

自己對佢已經唔再停留喺有好感嘅階段

應該有進一步嘅感覺

不過以前我真係好低能,

我記得我嗰陣係咁同自己講唔係鍾意佢

全部都係假象

當然呢啲只係自欺欺人

話雖如此,



大家都知我係毒男

點會好似啲mk仔咁樣亂咁表白啫

我最叻都係一路喺佢隔離啫

可能我覺得停留喺佢身邊,

係最安全嘅做法

打從心底嚟講我都唔係一個冒險嘅人,

況且仲有幾年相處,



使乜咁心急表白啫

大個先明白,

原來冇野係必然

唔好以為自己計數好叻,

所有野都係你掌握之中

你自己絕對冇啲乜野咁巴閉,

只係普通凡人一個,

當然啦呢啲都係好後期嘅事嚕.

返到去學校

得返幾個星期上課日

我地就要study leave

嗰排基本上係瘋狂補課,

感覺到全部同學都好認真

即使嗰日遲放學都冇怨言

上堂又係,

好難再見到成班人一齊喺度傾計

全部就係操卷同埋問老師

然之後老師就特別講解下佢覺得今年會考嘅重點課題

總之溫書氣氛就好濃厚

同上年此時此刻係兩回事

我當然都唔例外啦

不過唔知係咪除夕嗰晚,

我對晞澄嘅感覺提升咗唔少,

依家上親堂特別留意佢

以前覺得好無聊

冇吸引力嘅野,

依家都會分外重視

例如我自己會暗地裏留意佢有啲乜野小動作

終於俾我發現到啲野

當佢一遇到比較深嘅題目嗰陣,

佢隻右手就會托住個下巴

左手就會喺度轉筆

一諗到嗰陣,

隻右手會撳返住張紙,

左手亦都唔會轉筆

動作換成係咁寫字,

同埋仲有樣野好特別

就係原來佢一直都用緊我送俾佢嗰支筆

即係喺冒險樂園俾人搵笨嗰支呢

呢啲野以前我唔會留意到

又或者我唔會刻意去留意

因為唔覺得有咩特別,

不過依家唔係

我竟然自動自覺留意佢

身體象徵已經話俾我知我係想點

有一次仲差啲俾佢發現

晞澄:「你望咩呀 」

我:「冇呀我諗住睇下你點樣做咋嘛 」

晞澄:「其實呢條好簡單

你只要......

咁就得 」

我:「唔該晒 」

晞澄:「做乜無啦啦咁客氣 」

我:「乜好出奇咩 」

晞澄:「梗係啦

你係咪有蠱惑又或者有啲野想我幫你做 」

我:「痴線邊度有 」

晞澄:「如果唔係你唔會咁好聲氣嘅 」

我:「可能2007年成個人開竅掛 」

晞澄:「呢個大話好假 」

我:「講真其實覺得奇怪啫

因為見你仲用緊呢支筆 」

跟住我就指住我送俾佢嗰支筆

晞澄:「梗係啦

你用咗二百幾蚊去買

咁貴嘅野買返嚟唔用咪好 .」

我:「唔使咁強調二百幾蚊 」

晞澄:「唔強調點知矜貴 」

我:「好好寫嘅咩 」

晞澄:「唔話你知 」

我:「我頂咁都唔分享 」

就係咁,

我就發現原來晞澄個觸覺都幾敏銳

睇嚟我唔可以改變對佢嘅語氣,

如果唔係佢就會察覺到

好多時都係要諗返轉頭

依家就梗係覺得以前好低b,

不過當時又點諗到呢

淨係知道我唔可以俾佢發現.