[真人真事][校園][純愛]《總有一天，會再次遇見》: 第五十六章

一落到車就見到晞澄佢地喺巴士站嗰度

晞澄今日著咗件米白色大褸

下身係一條裙加黑色絲襪,

再加對啡色boot

你問我就唔使講啦,





梗係覺得靚女啦

講起聖誕我又諗起上年除夕

都係差唔多時期

唔知各位讀者仲記唔記得啦,

上年除夕我地咪去某某同學屋企嘅,





之後一開門嗰陣就見到晞澄嗰個背影

兩秒之後佢即刻擰過嚟,

我同佢嘅視線就係咁對上咗

原來咁就一年嚕

不過以我所知今年除夕唔會好似上年咁





成班同學一齊去某某同學嘅屋企,

因為嗰個屋主就係其中一個去外國讀書嘅人

講返依家先

之後愈嚟愈近嗰陣,

晞澄佢地終於見到我地

大家傾幾句之後就開始喺尖沙咀亂咁行

見商場就入

行行下嗰陣,





唔知點解真係覺得有啲凍

咁我就梗係即刻去搵晞澄

問佢拎佢嗰對聖誕手套啦

我:「大佬又話有聖誕手套嘅 」

晞澄:「咁快要嘅

覺得凍 」

我:「係呀 」





晞澄:「你真係潺鬼

俾你喇 」

跟住我就戴啦

喺度講下先,

事關我對手呢就比較論盡

即係極度唔靈活嗰隻

咁我就先戴左手嘅,

戴完左手自然就梗係戴右手,





呢個時候問題就嚟喇

因為我隻左手本身已經唔靈活

依家仲要戴咗手套,

咁就更加論盡

所以準備戴右手嗰陣,

就搞咗好耐都搞唔掂

我承認自己隻手真係虧





完全冇得否認哈哈

呢個時候我就見到晞澄捉住我隻右手幫我戴,

佢第一下掂嗰陣個心真係離一離

因為嗰陣我完全估唔到佢會咁做

晞澄:「我幫你啦 」

不出幾秒之後佢就幫我搞掂

喺整緊嗰陣,

我望住好認真嘅佢

我之前都講過啦,

我覺得認真做野嘅女仔好有吸引力

即使嗰樣野冇乜特別都好,

我自己都好鍾意睇

當然我唔敢同其他人講啦,

費事以為我係怪叔叔

我:「唔該晒 」

晞澄:「唔使 」

講完之後佢仲笑一笑

個畫面的確幾吸引.

行咗幾個鐘之後,

就決定去海旁嗰度睇燈飾

嗰陣都就嚟去到夜晚十二點正

大約仲有十個字左右啦,

之後途中我地去到一間七仔

我即刻醒起講過尋日嘅野

跟住我就即刻叫晞澄跟我過嚟

佢嗰刻都唔知好似咩事咁樣

淨係戇居居咁樣跟咗我過嚟,

跟住我就叫其他人行住先

之後先再會合返

入到去我就拎咗支維他奶俾佢,

跟住佢就開始明

晞澄:「原來你記得呀

我都唔記得咗添 」

我:「唔好講到我記性咁差 」

晞澄:「係咩

不過今次算你啦 」

我:「飲啦 」

晞澄:「嗯 」

買完之後出到去,

已經變到好擠迫

好多人搞到好似塞車咁樣

我:「點搵返佢地 」

晞澄:「唔知呀,

行住先啦咁樣 」

之後我見佢打電話俾其他人,

大家都同意依家太迫,

行住先啦

如果夾硬搵唔係好方便

咁大家都知啦,

成條街咁迫果陣,

我同晞澄總不免會有身體接觸

成日唔小心掂到佢,

當然唔係嗰啲私人部位啦哈哈

我嗰陣亦都冇諗呢啲野

只係大家隻手成日互相掂到

因為我同佢隻手都係擺喺側邊,

咁當然冇拖到啦,

邊度有呢個勇氣

我唔知佢有咩感覺啦,

嗰陣我就幾緊張

好彩戴咗手套,

如果唔係嗰個觸感就更加犀利

分分鐘隻手已經係咁出手汗

依家都有出不過佢唔知啦

戴咗手套點樣見到

晞澄:「真係好多人呀.」

我:「正常啦 」

晞澄:「不過一去到零時零分嗰陣,

啲燈飾真係好靚

我覺得值得嘅 」

就係我地傾緊計嗰陣,

就發生咗一件小插曲

晞澄:「哎呀.」