[真人真事][校園][純愛]《總有一天，會再次遇見》: 第五十七章

咁究竟係咩事呢

就係晞澄無啦啦失平衡跌埋嚟我嗰度

跟住我就見到幾個大陸人喺人群之中左穿右插,

好似趕住投胎咁樣

咁我就知晞澄佢係俾呢班大陸人撞到喇



晞澄:「嘩

好痛呀 」

我:「班友都傻嘅

趕時間都要睇路架大佬

整到邊度 」



晞澄:「隻左腳呀,

腳腕嗰度有少少痛 」

我:「不如去嗰邊坐下先啦

嗰度有凳,

依家啲人掛住去海旁嗰邊,



應該有位坐 」

跟住我地就去咗嗰邊啲凳嗰度坐喇

我見佢好似好痛咁樣

咁就係不如一齊返屋企啦

我:「一係我陪你返去先喇 」

晞澄:「我地專登出嚟就係睇燈飾

睇埋先啦好冇

你知呢啲野一年一次 」



問心講句,

自己對燈飾就冇乜渴求

覺得ok啦

唔會話特別好想睇咁樣囉

不過既然佢話睇埋先走,

咁咪睇埋先走囉

我:「咁依家行啦



我慢慢扶你,

去到應該差唔多到十二點架喇 」

晞澄:「咁就要勞煩你喇 」

之後我就扶佢一步一步咁樣行

老實講我就未試過扶人嘅

所以我都唔知有咩竅門

反正都唔知就不如慢慢行

咁樣一定唔會令佢再受傷丫嘛



晞澄:「可以快啲喎唔使咁慢 」

我:「嫌慢不如跑好冇 」

晞澄:「死啦你講啲咁嘅野 」

我:「慢慢行唔會傷丫嘛 」

晞澄:「咁好啦你話點就點啦

反正個節奏喺你嗰度 」

好彩佢唔算好重



我扶住佢行都唔算好辛苦

我:「講真好彩你唔肥

如果唔係真係唔得你死 」

晞澄:「真係

但我覺得自己好似肥咗喎 」

我:「冇呀唔係好覺

你地啲女仔最鍾意就係覺得自己肥

咁可能係你食得多菠蘿油呱 」

晞澄:「咁又唔係咁講呀,

菠蘿油係肥都要食 」

我:「真係唔知點解你咁鍾意食 」

晞澄:「或者去到有一日你就會知點解架喇

你細個有冇啲野係好鍾意食丫 」

我:「印象中你好似唔係第一次咁講 」

晞澄:「係呀

將來你會知點解 」

我:「上次你又係咁講

又喺度賣關子 」

晞澄:「呢啲野自己領會感受先至深

我講出嚟你未必有好大感觸 」

我:「或者啦 」

之後我地慢慢行終於去到海旁嗰邊

我:「呢個位實睇到啦 」

晞澄:「嗯 」

冇幾耐之後,

我聽到身邊好多人都話聖誕快樂

咁我就知正式踏入聖誕節

晞澄:「聖誕快樂呀 」

我:「大家咁話啦 」

晞澄:「好靚呀 」

我:「ok啦 」

晞澄:「係咪男仔冇女仔咁鍾意睇燈飾呢

我見你好似唔係好期待咁樣 」

我:「你睇我幾俾面你

平時啲人叫我睇燈飾我走咗喇 」

晞澄:「係咩

咁多謝晒喎 」

我:「不過今年好啲

起碼唔係成班男仔一齊睇

上幾年真係冇乜特別 」

晞澄:「我諗起個畫面都幾搞笑,

成班男仔一齊喺度睇燈飾 」

我:「同埋真係好毒 」

晞澄:「哈哈

今年去咗尖沙咀下年去金紫荊廣場嗰邊囉 」

我:「今年啱啱過聖誕咁快講定下年 」

晞澄:「啱啱諗起啫

你知我約你最鍾意就係早一年約架啦 」

我:「冇人夠你早啦晞澄姐 」

晞澄:「梗係啦 」

晞澄真係好騎呢,

佢真係好鍾意提早約我

好多時都係一早講定先,

不過令我最估唔到嘅係,

原來之後發生嘅事都係咁,

唔好意思我又離咗少少題.