[真人真事][校園][純愛]《總有一天，會再次遇見》: 第五十八章

之後我見到晞澄打返俾佢地,

佢話佢整到隻腳

所以就想我同佢一齊返去先

叫佢地唔使擔心玩得開心啲啦

我會唔會返過去會合佢地



梗係唔會啦

晞澄依家跛下跛下咁樣,

叫佢一個人返去咪即係天光都返唔到

所以就一如佢所講,

我送佢返屋企啦



晞澄:「唔好意思呀搞到你冇得去玩 」

我:「傷者大晒架嘛 」

晞澄:「估唔到今日最後嘅發展係咁

仲以為可以玩耐啲添 」

我:「我都同你講咗



其實玩唔玩都冇乜所謂

你依家整到更加要返屋企啦,

容乜易到時你賴我搞到你行唔到

晞澄:「你條友真係

個腦淨係諗埋啲咁嘅野 」

我:「以防萬一梗係返去先啦 」

晞澄:「你都有道理嘅 」

見到自己鍾意嘅女仔受傷,



講真你話完全冇野就呃你

一路行嘅時候我都喺度諗,

其實我係咪可以留意多啲呢

如果小心啲嘅話望多幾陣,

睇下多唔多人亂咁衝上嚟,

佢應該可以避到嗰班大陸人

冇得玩幾咁奇啫,



佢受傷事大丫嘛

當然呢啲係我冇講出口啦

事實上亦都唔知點講,

講咗出嚟都係於事無補,

唔傷都傷咗咯,

咁以後咪小心啲囉

我知你地可能會問,

其實呢件事完全唔關我事



又或者小心啲都會有意外,

點解要咁自責

可能呢啲就係我潛在嘅大男人性格

見到晞澄整到,

自不然覺得自己點都係責無旁貸

對住其他人,

我諗我可以做到事不關己咁樣



仲可以大聲講關我叉事

不過對住晞澄,

態度就完全唔同,

或者呢個就係鍾意同埋唔鍾意嘅分別啦.

之後我地就搭小巴返屋企

因為搭小巴可以總站先落兼且比較近佢屋企

佢依家整到隻腳,

好自然就佢啦

一上到車我就見佢瞇埋咗隻眼

咁跟住我都一樣啦,

我估佢都係想休息

咁就無謂阻住人,

喺度講下先

我搭車就唔會瞓覺

第一我瞓覺就好麻煩

一定要瞓自己張床先瞓到

除非真係好眼瞓嗰陣

第二就係如果我依家瞓咗嘅話,

一陣間返到屋企再瞓就好難

因為我一定會變得好精神

我唔係嗰啲話瞓就瞓嘅人,

所以基本上我每日只係瞓一次

就係夜晚上床嗰下

其他時候我都唔會瞓

無論我眼唔眼瞓都好

就喺我瞇埋眼嗰陣,

我feel到晞澄瞓咗落我左邊膊頭,

正常都feel到啦有重量丫嘛

咁我就更加唔可以亂郁啦

你問我嗰陣有冇特別感覺

我就真係冇,

我只係一心想保持我個姿勢

費事整到佢唔舒服

跟住過咗陣我就聽到佢講野,

晞澄:「你呢個變態佬

啱啱識落嗰陣真係覺得你好賤,

我仲好記得你唔賣個菠蘿油俾我食嗰個樣,

不過同你相處落去又唔係咁呀哈哈

好多謝你丫 」

佢九成九以為我瞓咗覺

所以先至咁樣講野,

平時佢點會讚我

一於就趁依家玩下佢先

我:「多謝你喎 」

晞澄:「下

你唔係瞓咗覺嘅咩 」

我:「邊個人講 」

之後我見佢面都紅埋,

好少見佢呢個樣哈哈

晞澄:「變態佬變態佬

偷聽人講野

冇話錯你呀變態佬 」

我:「痴線我光明正大同你講返

我明明喺你隔離又點算係偷聽 」

晞澄:「冇品

變態佬變態佬 」

我:「小姐面紅喎 」

晞澄:「冇呀你睇錯 」

我:「咁都睇錯 」

晞澄:「我啱啱用聖誕手套掂到塊面,

個手套甩色咋嘛 」

我:「頂你個大話有幾盞鬼

聖誕手套都甩色

又唔見我嗰個係咁 」

晞澄:「唔知呀,

總之係咁就咁啦

偷聽人講野嘅變態佬

好彩我冇講多咗啫.」

我:「講多啲嚟聽下

我都想知喎 」

晞澄:「冇呀冇呀 」

仲唔俾我玩返你一鑊