[真人真事][校園][純愛]《總有一天，會再次遇見》: 第六十五章

結果我真係冇估錯

嗰晚呀邦就打咗俾我

呀邦:「你同charlotte點呀 」

我:「估到你條八掛友啦 」

呀邦:「唔係呀



今日你地咁樣,

喺呀穎話不如一人睇住一邊

佢叫我唔好同你講添

你條友記住我今晚係冇打過俾你呀 」

我:「得啦呢家野



我地有邊次係衰 」

呀邦:「咁又係哈哈

咪講呢啲廢話先

咁你究竟同charlotte點啫 」

我:「佢好嬲咁樣走咗囉 」



呀邦:「跟住你冇追返人咩 」

我:「冇喎

你見我咁快可以同你打機就知啦 」

呀邦:「做乜唔去追返人 」

我:「講真嗰句,

乜你覺得我真係有做錯咩

唔講嗰句都講埋

今朝凌晨三點幾嗰陣我就起咗身要去醫院 」



呀邦:「做咩事呀

腎虧 」

我:「你就腎虧

我呀公有事入咗去,

今朝十一點左右就走咗.」

呀邦:「嘩乜咁大件事

節哀順變 」



我:「你地搵我嗰陣我仲喺醫院

我又熄咗電話,

咁樣就梗係收唔到訊息 」

呀邦:「原來你真係有野

係囉平時你都唔係乜都冇講唔出現嗰種人

咁你頭先唔講 」

我:「唔通我將我呀公走咗呢件事周圍講咩

又唔係馨香野 」



呀邦:「不過你又真係唔好彩

睇你個死人樣嗰陣都係嬲得滯先至亂講嘢啫 」

我:「係嘅

依家冷靜落嚟就諗返起,

其實晞澄都叫咗我好耐

可能佢真係好重視 」

呀邦:「梗係重視啦 」



我:「我知你又想抽水 」

呀邦:「頂

禮拜一同人講返對唔住啦 」

我:「但我真心覺得唔係好錯咋喎 」

呀邦:「唔通要好似城市論壇咁樣

喺度傾邊個啱邊個錯咩

男人老狗認下低威就得架啦 」

我:「如果你下晝同我講呢番說話,

我未必理你

不過依家ok啦 」

呀邦:「最緊要係冷靜落嚟 」

我:「可能晏晝太嬲,

無啦啦俾你地講到好似我錯晒咁樣 」

呀邦:「依家冇野喇 」

我:「冇掛

打機啦 」

禮拜日嗰日我都冇搵過晞澄

始終我覺得呢啲野用sms又或者msn講,

好似唔知點咁

所以我都係等禮拜一先

禮拜一返到去,

原本都仲喺度諗,

隔咗幾日應該冇事啦

點知一上到去班房完全係兩回事

大家放低咗書包,

如果係平時嘅晞澄,

應該就已經係咁喺度同我講野

不過今日唔係

一上到嚟我諗住同佢講嗰陣,

佢就即刻擰轉第二面同第二個同學傾計

原本我都懷疑,

可能佢地有急事要趕住傾呢

之後上堂,

佢全程都係望前面

塊面唧都唔笑

根本就唔係平時嘅晞澄

咁我就知佢仲嬲緊

就連我想抄功課嗰陣,

都係問第二個同學就算

費事問佢嗰本

當然代價就係我抄得慢咗啦

因為我都唔知嗰條友寫乜春

嗰啲字核突到呢

同晞澄手字冇得比

我好記得禮拜一嗰日,

我同佢完全冇傾過計

眼神交流都冇,

佢好似好唔想坐我隔離咁樣

當然呢個只係我估計,

冇傾過計點知呀

不過我覺得係咁囉

一去到小息,食飯佢就正常返

咁大家都知啦,

我地係逢禮拜一三五就會喺學校圖書館溫書,

咁嗰日我都有落去溫

始終習慣咗一個生活模式,

就唔會咁易可以改變

落到去嗰陣我都見到晞澄

我仲以為佢唔嚟添,

平時我就梗係坐佢張枱啦

今日

我自己醒水坐第二張啦

我唔知佢有冇望我,

我淨係扮到好似好型咁樣一個人坐第二張枱

咁當然啦,

溫緊書期間我都有望過去

佢都好似平時咁專心

證明我唔坐過去係正確嘅

平時我地溫到五點半就走,

咁樣嗰日晞澄都係相約時間走

我就決定坐多三個字先走

費事撞到正一正啦

夜晚我自己喺度諗,

其實同自己鍾意嘅女仔冷戰真係唔好受

如果我太主動行過去道歉,

我又覺得佢會唔鍾意

費事阻住佢啦,

但如果我維持咁樣又覺得唔舒服

大佬呀唔好話鍾意嘅女仔丫,

你同一條友坐但成日都冇傾過計,

個感覺係點大家都知啦

我都唔知點算好,

次次見佢板起塊面

我就冇乜勇氣同佢講野.