[真人真事][校園][純愛]《總有一天，會再次遇見》: 第六十六章

喺嗰兩個禮拜,

我地真係一句野都冇講過

每日返到去班房就係坐

跟住就上堂,

上完就落堂





溫書都係好似嗰次咁,

一人坐一邊

有時我唔識嘅話,

如果有其他人問就問佢地,

冇嘅話就算數喇都係





寧願第二日晏晝問老師

咁你諗下個情況係點

有時返到屋企,

見到佢個msn係綠色狀態嗰陣

我真係想搵佢架





「玩唔玩旋轉泡泡球 」

咁樣又好似唔係咁好

「對唔住呀唔好嬲啦 」

一陣間唔覆嘅話仲大鑊

聽日面對面都唔知點

所以諗諗下都係淆底

毒男就係咁架啦

成日都諗左諗右,





最後就乜都唔做

好聽啲就聽天由命,

唔好聽就浪費光陰

我知你地可能會問,

坐隔離點會完全冇野講

平時同學收功課又或者收回條嗰陣,

點都會講野掛





最多可能係講得唔多啫

又或者唔會私底下吹水,

一句野都冇講真唔真呀

我可以答你係真事

頭先講嘅收功課又或者收回條嗰個情況,

其實係有出現過

不過個情況就好似以下咁

當時係小息啱啱開始,





各位同學準備離開班房嗰陣

回條科科長:「charlotte唔好走住先

你有冇回條呀 」

晞澄:「有呀

俾你啦 」

回條科科長:「唔該晒

幫手問埋xx賢有冇丫





有就唔該拎埋過嚟 」

晞澄:「你自己問佢啦,

我趕時間落去呀.」

跟住佢就離開咗班房

個情況就係咁喇

跟住我咪死死氣拎過去俾嗰條友囉

回條科科長:「你地呢排係咪有野 」

我:「冇呀邊度有 」

回條科科長:「見你地好似傾少咗計咁樣嘅 」

我:「錯覺嚟啫哈哈 」

嗰句哈哈幾生硬呀

回條科科長佢唔熟我地就呃到啫

熟我地嘅呀邦就梗係呃唔到啦

呀邦:「點呀仲未搞掂呀 」

我:「梗係未啦

我同佢起碼有兩個禮拜冇講過野 」

呀邦:「咁耐唔係下話 」

我:「佢條友真係好鬼小氣 」

呀邦:「佢出晒名好人都咁樣

睇嚟今次真係好嬲 」

我:「我都唔知點做好

只要佢一坐我隔離,

佢個樣就即刻黑 」

呀邦:「但你一路唔講落去唔係辦法喎 」

我:「我都知唔係辦法,

但真係無計可施 」

呀邦:「如果一路等,

等下等下就會愈等愈耐,

到時唔好後悔呀 」

我:「頂我依家冇咗一個渠道抄功課

第二個人啲字又冇佢咁靚,

抄抄下就要拎埋嚟睇下呢個係咩字

咁樣梗係慢啦 」

呀邦:「我講嘅後悔係咪指功課你應該明嘅 」

我:「講真真係講功課

都唔知點算好,

有時上堂聽唔明啲野又冇得問

上親堂我又好似啞咗咁冇得傾計,

你估我又好爽咩 」

呀邦:「我幫你問下呀穎囉 」

我:「咁又唔好,

呀穎一定會同返晞澄講 」

呀邦:「咁又係喎 」

我:「見步行步啦 」

講真,

我又點會想同自己鍾意嘅女仔搞到咁樣,

但真係冇晒辦法

有時上堂,

我望黑板嗰陣,

其實都會特登喺眼尾望一望佢

曾經好熟悉嘅側面,

估唔到要淪落到去偷望

以前佢成日喺我面前綻放嘅笑容,

依家我都會見到,

不過距離就唔會係以前咁近囉

只要佢一喺我隔離,

就會變到好冷漠

真係唔知點做好.