[真人真事][校園][純愛]《總有一天，會再次遇見》: 第六十七章

青春除咗會帶嚟好多好奇怪嘅嗌霎之外

同時間令雙方和好嘅契機,

亦都係好莫名其妙

好多時都好無厘頭

凡事都有兩面,

或者以前真係比較容易有無謂嘅拗撬

不過和好個機會相對亦都大啲

以前同依家最大嘅分別,

可能係面子掛

我知你地會諗,

我呢條蛋散係咪喺度神化中學生活又或者以前

其實我唔否認

人,

總係覺得自己緬懷嘅野係最好

不知不覺間就會更加主觀去認為依家不及以前

就好似踢波咁,

好多巴打都可能覺得,

以前喺佢地成長階段踢波嘅球星,

係吸引過依家呢批

其實我都唔例外

正正係因為咁,

所以我係好明白呢一種諗法,

如果自己覺得唔係最好,

又點會去緬懷呢

無啦啦講起和好,

就梗係同晞澄有關啦

其實嗰陣我同佢都係好似之前咁樣

大家不瞅不睬,

SMS msn完全冇傾過計

有時自己想玩旋轉泡泡球都唔敢搵佢

見佢聽緊歌,

你知以前msn係可以顯示你聽緊咩歌架啦

如果未鬧翻嗰陣,

我就即刻喺msn搵佢撩佢傾計啦

跟住咁就可以一晚

生活習慣最衰就係,

一適應咗就返唔到轉頭

所以我好怕去改變,

咁啱依家我地關係咁樣,

都冇得唔改變啦

其實當時我都擔心會唔會以後形同陌路

有時呀穎同埋呀邦都有叫我氹返人,

你估我唔想咩

但真係唔知點做丫嘛,

正當我喺度苦惱緊嗰陣,

就好似我上文所講,

出現咗一個莫名其妙嘅契機

依家諗返起都係幾兒戲.

話說有一日,

嗰日最後嗰堂就係作文

老師話作晒先俾走

當然亦都會計平時分,

所以即使我好想快啲返屋企打機,

不過都要認真作埋

都唔爭在啦

咁啱嗰陣就有一班人提早作完,

仲有半班人未搞掂

我同晞澄就係未搞掂嗰批

突然間有條友拎書包準備出門口,

當佢經過我個位嗰陣,

佢一kick

就掃冧我個書包

我成個書包啲野就跌咗落嚟

跟住好死唔死,

我有啲野就飛咗去前面嘅地下

佢仲一腳踩咗落去

咁究竟佢踩咗啲咩

就係晞澄寫俾我嘅嗰張卡

可能你地一時諗唔起邊張,

我喺度講下先啦,

有一年情人節佢咪整咗三粒杏仁朱古力俾我嘅

不過佢就唔係當面俾,

而係喺msn嗰度叫我幫佢搵野

我順便睇到啫,

嗰陣除咗有三粒朱古力外,

佢仲自己寫咗一張卡

詳細可以睇返第十八章,

第二日我仲想俾返張卡佢,

佢就叫我自己袋住

我:「俾返張卡你先.」

晞澄:「你袋住啦,

邊有人自己寫完張卡,

會係自己收返架.」

我:「乜係嘅咩.」

晞澄:「咁有紀念價值唔好扔咗佢,

知唔知.」

我:「痴線,

我真係扔你都唔知啦叻仔.」

晞澄:「扔咗你就知味道.」

我:「唔係下話,

咁我袋住喺書包喇,

滿意未.」

晞澄:「咁就差唔多.」

我:「都唔知點解你要咁樣做,

痴線喺度管人地點樣對待張卡.」

晞澄:「講你都唔明啦.」

我:「我真係唔明.」

自此嗰張卡我就一路擺喺書包嗰度

一嚟我就梗係懶費事拎出嚟啦,

二嚟我知佢好無聊

我驚佢有時會屎忽痕問我張卡喺邊

如果到時我拎唔到出嚟,

佢條友分分鐘屈我請食野