[真人真事][校園][純愛]《總有一天，會再次遇見》: 第七十三章

跟住我地就去書枱嗰度溫書啦

講真我當時冇乜特別感覺

可能我真係戇居啦

對於女仔上嚟自己屋企,

冇話特別興奮



只係當好似朋友上嚟咁樣啫

溫咗個幾兩個鐘之後,

晞澄:「玩電腦好冇 」

我:「你咁樣講我實話好架 」

我知你地可能會諗,



點解會咁順攤俾佢用我部電腦

唔驚佢睇到啲唔應該睇嘅野咩

咁你就好彩喇

事關小弟喺呢方面嘅保安措施做得相當好

唔係我自吹自擂,



除非真係特登又好有時間check我

否則完全唔知我私底下會做啲乜野

上過啲咩網站

好簡單,

我桌面淨係擺咗一個瀏覽器

嗰個就係負責用嚟上正經網

我諗好多巴打都明白,

每部電腦係唔止得一個瀏覽器



咁上冇咁正經嘅網又會點做呢

就會用另一個瀏覽器上

而嗰個瀏覽器就冇任何捷徑

至於嗰啲檔案,

又擺咗喺第二度

當然唔少得改埋資料夾名啦

都係嗰句啦巴打實知咩事



所以我完全唔驚晞澄會偷睇到我啲乜

更加好彩嘅係呢啲野我每一日就清一次

根本就天衣無縫哈哈

同埋我覺得晞澄對於電腦未必好叻啫

所以好放心俾部電腦佢用

晞澄:「原來你有裝跑online 」

記得喺嗰個年代,

冇乜邊個中學生係冇玩過跑online



又話邊間邊間公會

跟住得閒去公園玩

戇居居咁樣都唔知喺度做乜

不過可能就係咁先好玩

一切都俱往矣

返返嚟先,

我:「係呀你有玩咩 」



晞澄:「以前多啲囉

依家少咗嚕 」

我:「我都係

你見我要update就知 」

晞澄:「陣間玩唔玩 」

我:「我得一部電腦點玩 」

晞澄:「你撳方向鍵

我撳加速同埋跳 」

我:「即係搵我笨啫

淨係撳方向鍵 」

晞澄:「大家梅花間竹咪得 」

我:「好

你話點就點囉 」

老實講如果係第二個我睬佢都傻

邊度協調到

打機高手都未必得啦

更何況我玩跑都唔叻

淨係夠恰新手

結果就梗係一仆一碌

全程我地就係喺度講「跳 」

「加速加速 」

「冇氣喇 」

「儲怒氣.」

「左邊右邊 」

雖然成日都輸

不過講真同女仔玩,

認輸我諗都唔係重點啦

都係志在過下癮啫

同埋我唔係睇遊戲成敗好重嗰啲人嚟

可能整定我冇乜鬥心啦

連打機勝敗都唔重視,

晞澄:「你究竟識唔識玩架 」

我:「不嬲打機都屎 」

晞澄:「仲以為你地男仔會好叻添 」

我:「有啲係好叻不過唔係我 」

晞澄:「水皮有水皮好

起碼可以玩下

你知我都唔係好叻哈哈 」

我:「算唔算係讚美 」

晞澄:「我唔阻止你咁樣諗 」

我:「咁我當係喇 」

晞澄有樣野好,

就係唔會上人屋企周圍去

又問呢樣問嗰樣,

問心我就唔鍾意呢啲人

現實生活亦都有遇過咁嘅人

好彩佢唔係咁啫

玩多陣跟住我就送咗佢返屋企,

晞澄:「下次再一齊玩跑丫

即係我講兩個人控制同一個角色

啱啱幾過癮 」

我:「好 」

晞澄:「今日好似玩多過溫書添

下個禮拜要勤力啲 」

我:「當然啦

淨係玩都玩咗幾個鐘 」

晞澄:「星期一見啦拜拜 」

我:「拜拜 」

其實呢日真係好特別

可能你地唔覺得啦,

畢竟特唔特別呢啲咁有個人色彩嘅野真係好主觀

我諗每個人都會有自己懷念嘅野,

呢啲野可能對於其他人嚟講冇乜特別,

只有自己身處其中先至明白

我點解過咗咁多年都仲記得呢日

因為呢次係我第一次俾女仔上嚟我屋企,

亦都係晞澄唯一一次上嚟,

當日我一句好簡單嘅「好.」,

原來都係兌現唔到.