[真人真事][校園][純愛]《總有一天，會再次遇見》: 第七十四章

去到中七,

終於做咗全校最高年級嗰班人

諗返起當年第一次入嚟呢間學校嗰陣,

見到師兄總係會不其然緊張

諗返起真係好鬼低能



依家唔係喇,

輪到自己做最大

有啲咩都可以順便去抽下水

即係好似買野飲咁呢,

見到班師弟喺度即刻打尖



跟住再兇一兇就搞掂

當然我唔否認自己好賤

不過講真做高年級梗係要利用自己嘅優勢啦

我好相信呢班師弟,

去到他日就會做返我今日做嘅野



一代一代咁樣傳落去

除此之外,

成班同學竟然比起上年甚至係會考嗰年更加積極

每日就係操卷同埋對卷

基本上好少會準時走,

即使可以準時走,

都會留低喺度溫多陣書先

可能覺得冇乜時間啦,



所以盡量都去爭取每一分每一秒

講真由細到大一直都受屋企人影響

覺得讀到大學係一件好叻嘅事

同埋啲人成日都話上到去大學就唔使咁勤力

輕鬆好多,

當然你問依家嘅我,

我就梗係完全否定呢一句說話啦



都唔知邊個話讀大學係好輕鬆

喺度誤人子弟

講起中七呢一年,

有一樣特別野可以講下

話說今年學生會搞咗個整月餅課外班

我就梗係冇參加

都唔識煮野食

不過晞澄有丫嘛



以我認識嘅佢,

整野咁鬼好食

梗係叫佢整個俾我啦

我:「我知你肯嘅

最好就冇蛋黃啦 」

晞澄:「睇下點先啦

不過唔好咁大期望



未試過整月餅 」

我:「你又點會令我失望呢 」

晞澄:「唔使賣口乖喇 」

一嚟就俾人秒

結果去到最後佢都有整多個俾我

仲幫我挑埋個蛋黃出嚟

的確係幾細心嘅

我:「多謝喎幫我挑埋個蛋黃 」

晞澄:「你真係太睇少我嘅記性 」

果然,

呢個舉動只係代表佢記性好

唔係特別去記住我鍾意食啲乜

不過我都知架喇

所以其實唔覺得意外.

跟住落嚟,

學校有個班際足球比賽

成班同學話,

反正都係最後一年

而且喺班入面,

平時踢開波嘅人都唔少

不如試下玩下啦

咁成班男仔都話好,

我自然冇拒絕嘅理由

老實講係咪好想贏

其實我都唔知

當然唔係話志在參與嗰種

邊有人玩比賽係志在參與

係睇下想贏個程度多與少啫

不過我印象中記得,

晞澄講過佢覺得男仔做運動好型

其實我想親口聽佢講一句我好型架哈哈

你當係我自己ff

當然啦呢啲野點樣同佢講出口

唔通我係咁話「快啲讚我型啦.」咁樣咩

佢肯定以為我有病啦

即使講出嚟都唔係真心

既然唔係真心咁又有咩用呢

本身我就唔係一個好重視讚賞嘅人

不過從來未試過聽到自己鍾意嘅女仔真心讚自己型

唔知有咩感覺呢

就係因為唔知所以先想試下

不過平時做啲乜野會令到佢讚我丫

今次應該係最好機會

對比起贏輸,

或者我更加著重晞澄講嘅野

晞澄:「係喎你今次有份踢喎 」

我:「你等住嗌xx(我地中學個名)碧咸啦

啲人平時都係咁樣叫我

晞澄:「夠喇賢哥

幻想完喇 」

我:「真係唔信

你可以問下呀邦佢地喎,

佢地親耳聽過 」

晞澄:「全部做媒嘅

我先唔會咁蠢去問呀 」

我:「或者到時你會嗌呢 」

晞澄:「到時先算啦,

xx賢 」

佢條友仔真係唔信我叫做xxx碧咸

咁嘅大話連女仔都呃唔到,

仲有咩用丫.