[真人真事][校園][純愛]《總有一天，會再次遇見》: 第七十六章
贏完第一場就入咗八強
之前都預告咗八強都係打魚腩
話得係魚腩就梗係贏埋啦
不過谷鬼氣
我都係一球都入唔到
又係全部助攻咁濟
之後想獨食嗰陣又頭頭碰著黑
撞柱射中龍飛機乜都有
唉希望四強可以打破悶局啦
之前都講啦,
踢校內嗰啲騎呢比賽,
入波先至係犀利
助攻有q用咩
結果好快去到四強
老實講大家信心都冇乜
係希望唔好輸得咁難睇
因為對手真係好強
而原本我地都預期咗入到去四強就差唔多
唔係話我地冇大志
而係事實上始終係貼地啲好
諗咁多天花龍鳳嘅畫面係冇用
最後搞著嘅咪自己
話說我地係放學踢,
上緊放學前最後一堂嗰陣
晞澄:「你地加油呀
」我:「多謝先
不過期望唔好咁大
」晞澄:「我都有聽講過對面好勁
」我:「你知就好
」晞澄:「不過同贏唔贏冇關係
一日未聽過一樣都未知呢
」我:「你諗野都幾樂觀
」晞澄:「咁唔通一嚟就話輸咩
」我:「老實講本身都係諗住入四強就算
依家都叫做完成目標
」晞澄:「或者會爆冷
加油啦
」我:「到時你嗌大聲啲
成班隊友聽完之後戰鬥力大增
」晞澄:「又喺度吹水
」我:「可能真係呢
」晞澄:「我先唔信呀
」其實經歷過呢排踢班際之後,
我可以好肯定漫畫嗰啲女主角打氣男主角聽到嘅情節係假嘅
個場咁q多人點聽呀
真係有心靈感應咩
抑或有第二個原因,
就係我從來都唔係男主角,
所以我完全聽唔到晞澄嘅吶喊
之前踢咗兩場,
去到第二日,
我都見到佢有時私底下,
會同其他男仔講踢得幾好呀等等
唯獨我真係一句都未聽過
一定係關我冇入波事
所以陣間最大目標唔係贏
入到波就得喇哈哈.
踢波場面就唔講咁多喇
不過踢落去發覺唔係差好遠
我地係下風但唔算係捱打狀態
當然啦,
雖然我成日都話要入波,
不過去到呢啲場合當然唔會罔顧團隊利益
有時自己去唔到,
多數唔會夾硬嚟
你知啦萬一扭失波,
一陣俾人打反擊,
我就做千古罪人
我真係冇勇氣去面對群眾壓力
結果上半場大家零比零
原本諗住上半場我地已經輸咗,
依家零比零都算係咁
嗰場我地班啲打氣聲,
好似比之前得更加勁
我見到晞澄都有嗌
有冇嗌我個名就唔知
因為我都好投入去踢
不過愈踢得愈耐,
我地隊啲體力就愈差
結果去到下半場中段時間就俾人入波
呢個時候士氣梗係差啦
不過我見到成班隊友好似冇野咁
繼續好勤力咁踢
其中有一球我見到班隊友mark死晒
又聽到成班隊友話叫我自己去
咁我就扭咗兩個人
又俾我我符碌撞棍咁扭到
跟住就射埋去,
睇見個龍門喺度望住個波嗰陣
我都以為入
點知都係柱邊出界
講真真係差少少
一個半波位咋
呢球或者係我喺呢幾場入面,
最接近入波嘅一次
跟住我都真係好俾心機去踢
你就當我嗰陣低能,
自己對自己承諾,
一定要喺晞澄面前入波
即使係一球咁少都好,
抑或係擺定喺度嘅十二碼都好
甚至係符碌到冇得再符碌嘅入波
我都想入
但呢個世界唔係你話乜就乜
去到最後都係入唔到,
跟住無情嘅完場聲終於響起
我始終喺今次呢個班際足球比賽入面,
一球都入唔到
重點係我今年已經係中七,
冇下一次嘅機會
完咗場之後我就坐咗喺另一邊,
當然唔係喺度喊啦
我都係嗰啲大男人性格,
唔鍾意睇人面前喊
我只係喺度抱怨自己,
頭先唔再做好啲
如果再射得準啲,
個球已經可以入
跟住我見到晞澄行過嚟坐咗喺度
佢唔知我好想入波俾佢睇,
喺到許埋啲騎呢承諾
晞澄:「唔好唔開心啦
你地踢得已經好好
」我:「都贏唔到有咩用
」晞澄:「你知唔知頭先你個樣幾認真呀
」我心諗梗係認真啦
因為好想證明俾你睇,
我未至於一無是處
雖然咁都唔係叻,
跟住佢繼續講
晞澄:「其實嗰球真係好大機會呀,
如果我晏晝同你一齊落去搖下條柱
可能就已經入
」呢個時候我都笑咗一笑
我:「頂
」晞澄:「最衰都係我啦
搞到入唔到
」我:「做乜今次講埋啲咁嘅野
」晞澄:「係咪好好笑先
」我:「係呀
」晞澄:「梗係啦我諗咗好耐
」我:「唔使喺度講埋啲咁嘅野喎
」晞澄:「頭先見你粒聲唔出走埋嚟坐
以為你唔知咩事呀
」我:「冇野
想坐低靜下啫,
同埋想抖下
」晞澄:「咁依家抖完未
好想食菠蘿油呀
最多我好大方咁樣請你食一個
當係獎勵你咁勤力踢波
」我:「多謝喎晞澄姐
」晞澄:「咁麻煩我地xx(學校名)嘅碧咸起身啦
」我:「終於話我係喇咩
」晞澄:「至少今日係啦
咁好波搞到我以為真嘅碧咸嚟左
」一聽到佢讚我,
頭先唔開心嗰啲野已經唔記得
男仔就係咁傻架啦
只要自己鍾意嘅女仔做咗啲野令你喜出望外,
咁就好輕易將頭先嘅鎖碎野,
撥開雲霧咁唔記得晒
原來真係會飄飄然.