係咁易講下比賽制度啦

話說分開咗高級組同埋低級組

高級組就中四至中七,

低級組就中一至中三,

我淨係講高級組啦



有十六隊一齊踢,

就當十六強咁樣處理

行淘汰制,

每場打四十分鐘

上下半場各二十分鐘,



中間有五分鐘休息

話說抽籤嗰日,

我呢啲擔當唔到大旗嘅

就梗係唔會我抽啦

結果我地幾好彩



頭兩輪打啲弱隊仲要係師弟

基本上穩入四強咁滯

不過之後就要打一隊勁旅

同我地一樣都係中七

老實講大家都勝算覺得唔高

都係入四強當贏就算架喇

跟住嗰個禮拜我都同晞澄講唔溫書住

就當俾我玩埋呢一次



跟住就真係收心養性,

咁佢都話冇問題

因為我地喺學校練波,

所以唔使踢嗰班同學,

有時都會嚟睇我地練波

而晞澄就係其中一個

平時隊友喺個場叫我嗰陣,



都係叫我全名

點知俾晞澄聽到

晞澄:「又話係碧咸嘅

我:「佢地一定係失咗憶

唔係平時踢開嗰個場就第二個叫法

晞澄:「實係咁啦

我:「講真真係冇吹水

晞澄:「快啲表演下啦



我:「費事嚇親人啦

到時人地見到潛水唔踢就唔好啦

晞澄:「哦

講真我踢波又唔係好叻

係叫做識扭下波,

同埋識點樣因應對友位置而傳波啫

夠恰新手咁囉,



我知晞澄到時會嚟睇

我最想梗係入波俾佢睇啦

你知女仔好膚淺,

入波就係勁

講到尾我都係想試下嗰種飄飄然嘅感覺

睇下俾自己鍾意嘅女仔讚係咪咁樣

不過咁有時晞澄都真係好識做

如果佢有嚟睇我地練波的話,

佢多數會買定啲寶礦力喺度等我,

呢個人真係唔話得

我:「醒目喎呢排真係

晞澄:「係不嬲都咁醒

唔似得你豬頭炳

我:「頂你仲押埋韻添

晞澄:「其實諗咗好耐

我:「無聊

晞澄:「我估你會口渴先至咁咋

竟然俾人話無聊

多謝都冇句

我:「多謝晞澄姐

晞澄:「咁就差唔多

當然少不免會有其他同學抽水

不過我地都慣晒

影響唔到我地就得啦

好快就到踢第一場嘅時候

講真原來真係有啲緊張

始終對住咁多人,

唔係話我賴皮

動作真係冇平時咁靈活

不過一切都係講適應嘅啫

踢耐啲入到局就冇問題喇,

最後我地贏4比0

頂你個肺我一球都冇入到

其實有幾球有機會獨食

我亦都覺得可以自己搞掂

始終對面都唔係好叻仲要細過我地,

不過嗰陣竟然為大局著想

係咁傳波俾其他隊友

最後就搞到食白果

真係離晒譜

睇嚟我都係改唔到呢啲優柔寡斷嘅性格

明明比賽之前係咁同自己講要入波

去到最後竟然選擇做助攻

喺呢啲咁嘅比賽助攻係完全唔搶眼

你估真係大型比賽咩,

喺學校啲人淨係識睇入波

跟住就冇架喇

不過贏就算啦

總好過輸嘅,

晞澄:「你地好勁喎

我:「還可以啦輕輕鬆鬆

晞澄:「係囉我都見你喺嗰球場度講笑

跟住自己又係咁笑

我:「好留意我喎

晞澄:「你個傻仔傻得太搶眼

冇得唔望

我:「仲以為你會欣賞我高超嘅球技添

晞澄:「ok啦

不過唔係碧咸囉

我:「我係碧咸就唔會喺度啦下話

晞澄:「咁又係喎

睇嚟下次我要加緊勤力去入波

等晞澄冇得再抽水

心悅誠服叫我一次碧咸

當然如果話我淨係個樣似佢,

我都唔會反對嘅.