[真人真事][校園][純愛]《總有一天，會再次遇見》: 第七十八章

運動會之後,

其實好快就到我地嘅last day

我記得嗰年一月尾就新年

去到新年前幾日就放新年假

我地呢批中七學生,



放完新年假就唔需要返學

因為要準備A Level,

即係所謂嘅study leave

換句話講,

即係放新年假之前嗰日,



就係我地last day

講真,

last day對我嚟講係咪好大感覺

其實我就覺得唔係嘅

咪又係咁



以我所見,

嗰日好多人都好傷感

喊晒口咁滯

可能佢地覺得遲啲冇得見掛

基本上嗰一日冇人上堂,

老師都喺度講佢啲肺腑之言

話A Level點樣重要呀

跟住亦都即刻喺度兜,



A Level成績唔係一切

大把升學途徑,

唔使咁驚等等

當然因為嗰個miss都跟咗我地四年

我諗唔多唔少都有啲感情掛

所以嗰日佢都逐個喺度講,

有啲女仔眼淺就喊到面都紅埋



就連平時上堂成日搞事嘅男仔,

嗰一刻都鴉雀無聲

全部聚精會神聽miss喺度講

我都隱約見到miss眼有淚光,

可能佢都好感觸掛

講完一輪之後又去咗影相,

例牌同晞澄去影啦

基本上每一個地方都去影,



佢話最後一日喎

今日係最後一次著住校服,

唔爭在走勻全場啦

一路陪住佢,

將所有地方再經歷一次

其實嗰陣我就唔係話有好大共鳴

唔覺得呢啲地方有乜特別



依家再諗返起,

邊度係第一次傾計,

第一次接觸,

第一次嗌交,

原來全部野都已經收埋咗喺個腦度

其實我冇刻意去記住,

呢個係講真嘅

但有時俾人問起中學係點嘅時候,

就會自自然然諗起頭先講嗰啲野

當然我只係諗啦冇講出口,

我都唔係好鍾意將以前啲野周圍同人講

所以都係一笑置之就算數

但有時自己一個嗰陣,

總係會不其然諗起中學嘅事

發覺以前嘅自己真係好愚昧

又講遠咗返返嚟先

影完相之後,

佢話臨尾要一齊去食菠蘿油

因為今次係最後一次著校服去買

我同佢講其實你想著都可以隨時著啫

點會係最後一次呢

晞澄:「唔係啦

到時意義都唔同 」

我:「有咩分別呀 」

晞澄:「同你講真係嘥氣

不嬲我地都係放完學去食菠蘿油

今日係我地最後一日喺中學返學,

過埋今日就唔會有中學嘅放學

咁你話同唔同喇 」

我:「係咩 」

我見佢咁執著

就冇同佢拗落去,

但係我自己喺度諗,

乜真係有分別咩

可能嗰陣我仲未參透到咩叫「意義」,

所以先唔明掛

食埋跟住就照例行佢屋企個方向

真係最後一次著住校服送佢返屋企喇.

跟住準備A Level嗰陣,

就同之前準備會考差唔多

都係不停不停溫書

星期一三五就同晞澄去開嗰間圖書館,

講開又講,

我不嬲想同佢Jupas揀埋同一科同一間U

事關我地之前已經傾過,

好多次序都係一樣

邊間u就唔講喇

總之唔係三大

而且嗰陣教大仲係叫教院,

附近又有火車站,

咁應該大家都知啦

恕我講到呢度就算喇

佢都有問我點解咁做,

冇自己興趣嘅科咩

講真真係冇,

只要嗰個科目我唔反感就冇問題

晞澄:「傻仔

唉又要對住你幾年 」

我:「可能我升唔到大學呢 」

晞澄:「我見你依家成績同我差唔多

你升唔到咪即係我都唔得

你咒我啫 」

我:「咁呀,

大家準備又再同學囉 」

晞澄:「你唔會失驚無神去外國下話 」

我:「我係會呀依家就唔溫書啦聰明 」

晞澄:「又係喎哈哈 」

我:「唔好同我講你會呀 」

晞澄:「我係會呀依家就唔溫書啦聰明 」

我:「又係喎哈哈 」

晞澄:「抄我 」

我:「你抄先囉好冇 」

晞澄:「你抄先囉好冇 」

我:「小學雞 」

晞澄:「你唔係 」

我:「我真係唔係呀 」

晞澄:「你係你係你係

邊間u都跟埋我

仲唔認你抄我 」

我:「咁啱啫

可能我地有緣囉 」

晞澄:「咁樣唔係一件好事 」

我:「未來啲功課project靠你喇 」

晞澄:「依家溫書先啦

到時考得唔好講咩都冇用 」

我:「你又有你嘅道理 」

嚇得我,

幾驚好似電視劇咁,

無啦啦去外國讀書

好彩唔係啫

記得嗰年晞澄都有問我今年情人節食唔食朱古力

咁我見今年都唔得閒,

就極力叫佢唔好整

費事嘥佢時間啦

朱古力呢家野,

一年半年好閒啫

雖然佢整得好好食

不過既然 A Level重要咁多,

又唔係話非食不可

就叫佢下一年先整啦,

當時我係咁諗.