[真人真事][校園][純愛]《總有一天，會再次遇見》: 第七十九章

或者自己有考過會考嘅經驗

今次再考反而唔算話有好大心理壓力

接觸過始終差好遠

記得我嗰年考中文oral先,

中文oral我都係入到去亂咁噏啫



都覺得唔係好難,

跟住就開始筆試喇

之前都講我係理科仔,

考完主科就到phy chem bi,

都係硬著頭皮衝架啦



嗰一刻我個腦淨係諗一樣野

我好想同晞澄入同一間u

我已經同自己講,

唔同科都唔係最大鑊,

唔同u先係



我點都唔會俾呢件事發生,

就係呢樣野,

令到每次我溫得好辛苦嗰陣,

都繼續頂埋落去

當然啦呢段期間佢都有係咁sms我

每次朝早考嗰陣就會sms我加油,

考完之後又問我點呀

有時好多野講懶得滯唔想打字嗰陣,



直情打埋俾佢

結果去到五月中間考完英文oral之後,

就考晒所有科

嗰一刻真係如釋重負

唔係誇張嗰陣每一晚喺床度準備入睡嘅時候,

都係喺度記緊今日溫咗啲乜野

雖然我四月尾就已經考晒所有筆試,



但係始終仲有英文oral未考,

心情點都冇咁放肆

依家就唔同喇

真係可以係咁玩

唔需要再諗有關學業嘅野住

真係輕鬆晒

可以好似之前咁同呀邦佢地打成日機

有時呀邦佢地唔玩,



就同下晞澄玩旋轉泡泡球,

頂你都係贏唔到佢

話說我地學校六月頭就會搞謝師宴

成班就梗係諗住入到呃飲呃食啦

我都唔例外,

不過謝師宴就有個麻煩之處喇

就係要著西裝,



你知我啦呢啲毒男,

平時邊有西裝喺身

我都唔知點算好

佢講到明唔著西裝冇得入去

即係話一定要買啦

原本諗住搵個女仔同我去買,

你知女仔對衣著個觸覺係靈敏啲架啦,

邊個女仔大家都知啦,

不過佢竟然一早有飲宴嘅衫

咁又係嘅,

邊個好似我咁毒

屋企一件去飲嘅衫都冇

我:「你買咗衫未 」

晞澄:「咩衫 」

我:「grad din嗰件呀 」

晞澄:「屋企有呀唔使買 .」

我:「點解你會有 」

晞澄:「買咪有囉點解呀 」

我:「頂你就好啦

仲諗住叫你一齊買添 」

晞澄:「呵呵你冇呀 」

我:「有我就唔使買啦 」

晞澄:「去求其買件西裝囉 」

我:「唔使你講我都知 」

晞澄:「未見過你著西裝個樣添

唔知點解好想睇哈哈 」

我:「我驚我型過頭

成村女仔行埋嚟

到時你好難同我行 」

晞澄:「食咗藥未呀 」

我:「你唔信呀 」

晞澄:「呢個大話太假

講真原本我肯同你出嚟買嘅

不過唔知點解我覺得grad din先見到的話,

會更加有驚喜 」

我:「得啦

到時見到我太型仔唔該你盡量控制住 」

晞澄:「你真係飲大咗 」

跟住就出咗去買衫,

屋企人話遲啲件西裝都會有用,

例如第日interview又或者去第二啲飲宴場合,

所以就叫我唔好慳喇

結果衫褲夾埋都買咗兩千幾

都冇乜幾可以用咁多錢去買衫

甚至後來結婚嗰陣都冇買咁貴,

今次真係大手筆.