[真人真事][校園][純愛]《總有一天，會再次遇見》: 第八十三章

唔講咁多廢話喇

直接講大學聯招公佈啦

我仲好記得嗰日睇結果嗰陣係好驚訝

因為我同晞澄係同一間u但係唔同系

佢入咗社會科學,



我乜野系就唔講喇

總之就唔同啦

老實講過下有啲啲唔開心嘅

不過我又咁樣諗

起碼同一間u先啦



都算係不幸中之大幸

有時邊有得要求咁多丫

同一間u已經好好架喇

晞澄:「哎吔我地唔同系添 」

我:「係囉



project冇得靠你嚕 」

晞澄:「仲以為有機會繼續坐隔離添 」

我:「我可唔可以偷雞入嚟陪你sit架 」

晞澄:「唔知呀sir俾唔俾啦 」

我:「唔俾都要架喇 」

晞澄:「你唔好掛住過嚟搞到自己唔去上堂呀

到時唔識冇人幫到你 」

我:「可能到時大把靚女教我呢 」



晞澄:「咁呀,

你搵其他靚女囉

唔好搵我喇 」

我:「講笑啫講笑啫點會 」

晞澄:「依家冇人睇住你

我知你實會放縱架喇 」

我:「點會呀



你想睇住我嘅咪一齊返學囉 」

晞澄:「冇人想睇住你喎 」

我:「你當我想俾你睇住囉得唔得 」

晞澄:「諗下先啦 」

我:「冇得俾你諗

因為我已經決定咗要同你一齊返學 」

晞澄:「你估依家好似中學咩

返學時間係一樣 」



我:「我知呀

咁有乜關係 」

晞澄:「萬一我同你唔同時間點樣一齊返學 」

我:「如果我早過你我就唔返上晝

如果我遲過你就陪你返咗去先 」

晞澄:「低b 」

我:「但我見你笑得好開心喎 」



晞澄:「冇笑

邊有笑呀 」

我:「你個樣出賣咗你喇 」

晞澄:「係咩

唔知嚕 」

我:「即係好唔好啫 」

晞澄:「到時先算啦嘻嘻 」

跟住佢就走咗去,

我又要喺後面追住佢,

始終都係佢行先一步.

過咗個幾禮拜之後

佢就終於去英國玩

當然之前已經搞好晒大學嗰啲野啦

如果唔係未做晒程序,

返到嚟冇得讀就死火

之前已經講好

話佢飛嗰日,

我會去送佢機

不過有個問題,

就係到時會有好多人喺度

晞澄嘅屋企人啦,

仲有呀穎嘅屋企人,

我去到三唔識七

雖然話我見過晞澄嘅媽媽,

但係嗰度咁多人我淨係見過一個

就咁諗都覺得好尷尬

不過打從心底我就好想去送機

所以最後都係唔理啦,

尷尬都要去架喇

今次唔見起碼要兩個禮拜先可以再見返

唯有咁樣說服自己

所以當日我就搭巴士去機場

去到之後就打俾晞澄

問下佢喺邊,

跟住行幾步就見到佢

晞澄:「我地早到咗冇咁快check in呀

係喎你又真係嚟嘅 」

我:「我呢啲識做

知你要去旅行咁咪特登過嚟囉

同埋我仲要靠你拎手信俾我 」

或者我當時仲未有足夠嘅勇氣去同佢講點解我要嚟

又或者唔關勇唔勇氣事,

根本就係自己問題

晞澄:「我地行住先啦 」

我:「其他人知你去邊架喇 」

晞澄:「佢地知呀

陣間佢地會打電話俾我 」

我:「係喎知唔知我係未嚟過機場 」

晞澄:「真係架 」

我:「似你咁有錢咩 」

晞澄:「你有錢唔去啫 」

我:「窮呀

唉 」

晞澄:「一係我每一日去過邊就影相send俾你囉

咁樣你咪好似一齊去囉 」

我:「定係你想曬命咋 」

晞澄:「你個腦都唔知裝乜

係要諗到我咁衰

明明我就好好人 」

我:「講笑啫

好囉影多啲嚟望一望 」

晞澄:「咁我到時facebook send俾你啦 」

嗰陣已經係2009年嘅8月

facebook逐漸興起,

但當然唔算普及啦

但係身邊啲同學好多都有玩,

我呢啲隨波逐流嘅人

梗係唔少得開埋一份啦

跟住我同佢行咗一陣,

佢屋企人就打俾佢叫佢返去準備上飛機啲野

晞澄:「咁我依家走喇 」

我:「嗯 」

晞澄:「拜拜 」

我:「喂係喇 」

晞澄:「做咩呀 」

我:「等你返嚟,

有啲野要準備同你講 」

晞澄:「我一早已經準備好聽架喇 」

點解我無啦啦會想同佢講

因為我好想上到u之後,

我同佢嘅身分,關係會進入另一個層次

咁當然係向好嘅改變啦,

同埋我聽佢嘅口氣,

佢都唔似會拒絕我

所以我先至夠膽咁樣做

嗰陣我覺得好大機會成功架哈哈

跟住大家再對望笑咗一笑,

咁就真係告別喇.