佢去咗旅行嗰排

我每日就喺度諗

究竟點樣表白先好呢

話就話我有信心成功啫

不過我覺得女仔睇嘅野同男仔唔同



可能我睇得電視太多中咗毒

成日覺得要好浪漫先至得

所以我就喺度左諗右諗

究竟應該要點做先好

買啲好貴嘅飾物又好似誇張咗



再加上我冇錢

同埋買返嚟唔知佢會點

呢樣已經唔得啦

自己用手整又唔知整乜好

已經唔講我手工藝好差



定係就咁戇居居同佢講就算,

萬一佢覺得我冇誠意咪大鑊

左諗右諗都諗唔到一個方案

不過佢嗰排真係日日喺面書搵我

有時影完啲相就send俾我睇

的而且確冇走數

不過大家都知啦,

我喺香港佢喺英國,



係有時差架嘛

佢多數係夜晚搵我

所以我就早啲起身同佢傾計

仲勤力過返學

當然啦其實我可以唔需要咁樣嘅

不過我覺得傾計個氣氛就係要大家你一句我一言

咁樣先至爽



離線訊息我覺得營造唔到個氣氛

所以辛苦啲都要架喇

佢真係好無聊,

乜都影一餐

最記得佢無啦啦偷拍一個大隻佬

晞澄:「勁大隻呀佢

我:「我唔係基佬呀

你影俾我睇冇用



晞澄:「你知唔知我一見到佢

就喺度諗你會唔會有一日變到咁哈哈

我:「咁大隻我就覺得冇乜美感

話咗你掛住我啦

咁都諗起我

晞澄:「咁啱啫唔好亂估

我:「真係冇



晞澄:「有我都話冇哈哈

我:「即係有啦

晞澄:「講真話喇

有啲啲啲啲啲啦

我:「啲啲啲啲啲好過冇

晞澄:「係呀

我:「你都講到出口,

最多你落機嗰日我嚟機場喇

晞澄:「買定菠蘿油俾我食

已經好耐冇食過

我:「你幾點機呀

晞澄:「晏晝三四點我返到嚟喇應該

我:「好,

不過淋晒唔好鬧我

晞澄:「唔好走數呀

我都眼瞓啦聽日先傾啦拜拜

我:「拜拜

其實之前都知佢邊一日返嚟

原本都喺度諗緊去唔去機場好,

依家佢講到咁我冇得唔去啦

你問我有冇爽

聽到自己嘅女仔話掛住你

我諗各位巴打都知我咩感覺啦

嘴角含春咁樣你話有冇爽喇

有一日我照例早起身

跟住就好似平時咁開電腦,

坐喺電腦前面等佢搵我

點知我等咗成朝佢都冇搵

我就覺得有啲怪

因為之前佢真係日日都有搵我

同埋識咗佢幾年以嚟佢好少走數

嗰陣我就以為佢病咗呀又或者太攰,

所以今日冇搵我

咁樣唔緊要啦一日半日啫,

我咪當早啲起身

順便落去食個早餐囉

因為平時朝早會同佢傾計

多數都係喺屋企飲杯咖啡就算

行唔開丫嘛

其實我就好鍾意食樓下嗰個雪菜肉絲米

而且佢杯奶茶好正

平時因為要同佢傾計所以冇落去食

我呢啲咁戇居嘅人係咁架啦

永遠都唔會將自己擺喺第一位,

首選嘅梗係屋企人,

又或者係自己鍾意嘅女仔

即係晞澄啦.