好多人都話人生如戲,戲如人生

原本我就不敢苟同,

我覺得好多野都只會喺電影電視先至發生

我地成日講架啦

「你估拍戲咩,



有冇咁啱呀.」

基本上現實係冇呢啲情節出現

最少喺我身上冇一啲好特別嘅情節啦

不過依家睇返轉頭,

我只會話今天的我打倒昨天的我



原來真係乜都有可能

正如我開頭所講,

點解各位睇電影會咁記得某啲情節

仲產生唔少共鳴

因為嗰啲作家,編劇,導演諗出嚟嘅野,



根本就係用現實嚟做藍本

可能係喺佢身上發生嘅事,

又或者喺其他人口中聽返嚟

夠真實先至容易令人有共鳴

「你估拍戲咩,

有冇咁啱呀.」

偏偏就係咁啱.

之後嗰幾日,



晞澄都係完全冇搵過我,

唔知點解驟然萌生一種不安感

一日兩日三日一路落去,

大家facebook顯示嘅對話都仲係上個禮拜嘅事

當時嘅我亦都冇睇報紙嘅習慣

跟住終於忍唔住搵佢,

講起上嚟其實我就好少主動搵人



咁多年以嚟都係

因為自己都唔鍾意有野忙緊嗰陣俾人煩

咁樣真係好滋擾

所以我多數都係同人講定,

你搞掂就搵我啦

不過今次我破例主動搵晞澄

連msn都開埋

佢都係冇online,



完全唔知咩事

有時自己喺度亂諗野,

會唔會係出咗大鑊野呢

因為佢不嬲都唔係咁冇交帶

一日冇搵好正常,

差唔多一個禮拜都係咁就已經係第二回事

跟住突然間靈機一觸



唔通佢條友想俾驚喜我

會唔會呢

我再望一望個月曆,

原來好快佢就返嚟

之前佢同我講咗邊日會返

仲叫我買定菠蘿油等佢,

一定係想俾驚喜我

或者我嗰陣其實都喺度自欺欺人,

其實人不嬲都係咁架啦

永遠只會接受自己想接受嘅野,

其實我嗰陣已經諗到好多野,

有好嘅亦都有唔好嘅,

只係我一廂情願諗咗係好嗰邊

特登唔去諗壞嗰邊,

可能我知自己接受唔到掛.

晞澄之前喺面書話晏晝三四點就會返到香港

咁樣喺佢原本話返到香港嗰日,

我特登去返平時買開嗰間買一個菠蘿油

跟住就去機場,

兩三個禮拜之前先嚟過

所以印象都唔陌生

我好記得兩點十已經去到,

跟住問埋啲職員應該喺邊度等

佢話你去嗰邊啦就得架喇咁樣,

跟住就一路望住出口嗰個位

每次見到有一班人出嚟嗰陣,

我就係咁望下有冇邊條馬尾似佢

我好有信心講,

我係唔會認錯佢條馬尾

幾時問我都係咁樣答

不過每一次都係失望而回

有時我連有冇邊個人似呀穎都望埋一份

係喎點解咁蠢

我返到去問呀穎咪得囉

反正我都有佢面書

嗰陣唔同依家,

我部電話冇得上網

所以只可以返到屋企先問

當然最好就梗係唔使問佢

一陣喺出口見到晞澄

咁就最理想

不過時間一分一秒咁樣過去,

我都仲係見唔到晞澄

曾經我以為自己去錯地方,

又問返其他職員,

會唔會唔係喺呢度等

點知佢話唔會喎

係咪你個朋友冇搭呢班飛機呀

去到呢個時候我連自己都呃唔到自己,

可以肯定佢真係出咗問題

如果唔係點會香港都唔返

結果我嗰日等到九點鐘就走咗,

成個下晝淨係喺度等佢

因為唔敢行開,

所以成個下晝冇食野

咁樣自不然就覺得肚餓啦,

跟住終於忍唔住食咗自己拎住嘅菠蘿油

一個原本買嚟俾晞澄落機即刻食嘅菠蘿油,

呢個菠蘿油我晏晝買定,

依家九點先食,

一擺落口嗰陣,

真係唔好食

不過真係好肚餓所以先夾硬食埋去

啲皮已經完全唔脆

又縮晒水,

或者喺呢幾年食咗咁多個菠蘿油入面,

以呢一個係最難食

無論係味道抑或係環境都係最差,

首先我未試過買咗咁耐依家先食啦

但最緊要嘅係,

我更加未試過食菠蘿油嗰陣,

隔離係冇晞澄喺度,

而當時嘅我並未知道,

依家只係開始.