咁不如講下之後嘅事

就當喺度聽下我講廢話咁啦

其實上到u第一年真係冇乜好講

雖然模式同中學嗰陣完全唔同,

不過有啲野都係講時間嘅啫



唔到你唔適應啦,

各位明白我講咩嘅

只係我有時真係好鍾意做埋啲多餘野

每次見到社會科學嘅同學嗰陣,

我個腦都係不其然會諗起一啲冇可能會發生嘅情節



簡單講即係ff

我會喺度諗,

如果晞澄喺度,

究竟依家會點呢

會唔會都係喺門口等佢放學,



跟住一齊食野,搭車返屋企

一啲以前成日可以做嘅野,

原來今日已經唔會再發生

其實我係喺度逼自己唔記得,

不過大家都知啦,

你愈要提住自己唔記得,

就愈會加深你嘅記憶

可能嗰陣細個,



唔識呢個道理呱

只要見到某啲野係同晞澄有關,

我就好易聯想到

例如每年生日,

我都會諗起以前有個女仔扮作不經意咁樣,

整個生日蛋糕俾我食

又例如每年電視講起公開試,



我都會諗起以前會考同埋A-Level嗰陣,

同一個女仔喺圖書館拼搏

甚至乎見到啲中學生返學嗰陣,

我都會諗起以前兩小無猜嗰個時光

你估我自己想咁敏感嘅咩,

其實我都真係唔想喺度亂諗野

而大家都知上到u,

好多同學都會問你中學點,



男仔最簡單就梗係問有冇溝女啦

有啲就好自豪,

係咁發表溝女偉論

有啲望落去都知好毒

話自己中學最遺憾就係冇溝過女

我點樣答

梗係答毒男常用嘅答案啦



有時有啲人唔信,

成日都會再問一句,

「咁曖昧嘅女仔呢

我都係例牌咁樣講,

「冇呀邊度有

你估我好似你咁靚仔咩

跟住講講下就會轉話題,

咁就好喇

或者我真係唔想同其他人講起晞澄嘅野,

全部人問我中學點,

我都係講返頭先講嗰啲野,

唔想喺呢個話題上面糾纏

古巨基都話啦,

一講起你已經,

等於再殺死我.

第一年好快就過咗,

而第二年係好特別嘅一年

因為我就係喺呢一年,

識到我老婆

其實佢係第二年插班嚟嘅,

所以上年完全唔識佢

如果大家仲記得,

我開頭嗰陣講過,

話我接受我老婆,

又或者對佢有興趣嘅最大原因,

其實唔係佢嘅外貌

當然佢都靚女啦

究竟我係點識佢呢

到今時今日都仲好記得嗰個感覺

話說第二年開學第一日,

見到有個女仔喺出面企喺度

話準備介紹自己,

呀sir話呢個女仔係插班入嚟

嗰陣個個男仔見到,

都話好靚女

正呀正呀咁樣

你問我覺得

ok啦咁樣囉

我就唔係好易動心嗰種人

所以唔係話我冷淡,

而係本身係咁

跟住去到佢自我介紹嗰陣,

就係重點喇

xx:「大家好我叫做x希晴

你地可以叫我做希晴又或者Eunice

當然我係之後先知佢個名係寫做「希晴」

喺嗰一刻,

我成個人呆咗

喺度望住佢,

我喺度係咁問自己有冇聽錯

點解會有一個人叫做「晞澄」

望望下跟住佢feel到有人望住佢

佢就望返住我,

跟住就好靦腆咁笑咗一笑

可能佢覺得好奇怪,

點解有個人好驚訝咁樣望住佢

跟住我就自不然特別留意呢個女仔啦

再加上佢坐喺我前面啫,

跟住幾日先知原來佢係「希晴」而唔係「晞澄」

不過結婚之前我叫佢都係叫Eunice

唔會叫佢中文名,

而令我地開始熟落係因為一個project

你知啦大家坐前後好易搵到人一組,

咁喺我地同組人入面有啲係freerider

我同佢就唔係嗰兩個

所以溝通上就更加緊密,

當時我將我對晞澄嘅感覺完全投射落佢嗰度

其實佢兩個係唔似樣

鍾意嘅野甚至係性格等等都好啦,

都係冇乜關連,

例如晞澄鍾意聽香港嘅楊千樺

Eunice就鍾意聽台灣嘅孫燕姿,

晞澄鍾意食菠蘿油

Eunice就鍾意食藍莓芝士蛋糕,

晞澄樂天啲

Eunice就內斂啲,

基本上係冇一樣相似

但我就係將Eunice當咗係晞澄,

可能第一次聽佢個名太深刻嘅關係

連自己都呃埋自己

將所有對晞澄嘅感情,

投射落佢身上

最記得有一次,

當時大家friend咗不過未係拍拖,

嗰日晏晝我同佢早啲返去做埋啲手尾

佢打俾我問我食唔食野先,

佢話佢都會買埋返去u嗰度

咁我就叫佢買菠蘿油,

其實自從中學開始,

每次我一諗唔到食乜,

就食菠蘿油算

我好記得晞澄以前成日講一樣野,

佢話食野其實係食緊回憶,

以前我唔明佢講乜

跟住佢就會講一句

「遲啲你就明架喇.」

佢真係好有先見之明

俾佢講中咗,

我依家真係明

唔好意思又離咗題,

講返嗰件事先

跟住Eunice就打俾我話冇菠蘿油,

菠蘿包食唔食

跟住我就話唔食,

返到嚟佢就問我

Eunice:「佢話冇晒牛油得返菠蘿包

我以為你會食添

我:「菠蘿包我麻麻地

菠蘿油就鍾意食

Eunice:「唔係差唔多咋咩

我:「梗係唔係啦,

菠蘿油好食好多

最鍾意就係食入面啲牛油,

層次感菠蘿包完全冇得比

Eunice:「咁得意嘅你

我:「好奇怪呀可

以前有個朋友同我咁講

Eunice:「幾搞笑丫

其實我冇講錯,

我同晞澄只係朋友關係,

雖然大家鍾意大家,

我準備講佢亦都準備聽,

不過呢個世界唔係所有野都理所當然

唔係話有準備就一定得,

如果唔係邊有意外呢

的而且確,

去到最後我地只係朋友,

呢點係冇得呃

我連同人講佢係我嘅前度,

都冇資格,

因為我地從來都唔係男女朋友關係,

今生今世都唔會係.