[真人真事][校園][純愛]《總有一天，會再次遇見》: 第八十九章

睇完封信之後

我成個人可以用崩潰嚟形容

究竟依家個世界發生咩事

明明我一個月之前仲同佢有講有笑

幾個禮拜之前喺面書聯絡緊,



點解短短幾日會帶走咗晞澄

千算萬算都估唔到件事會咁

明明就好期待一齊讀大學,

等佢返嚟就講我一直都好想講嘅野

今次我唔係講笑,



我真係會諗住同佢表白

知道應該點樣做架喇,

可惜,

已經唔會再有呢個機會

不過佢真係好了解我



竟然估到我會自責,

都唔知係好事定唔好事

我記得嗰晚,

成晚都喺間房度,

咁當然冇同屋企人講呢件事啦

我淨係話我好飽好攰,

但其實落到床我係冇瞓過覺

我淨係喺度諗呢幾年同佢嘅一點一滴



點樣認識,

點樣熟落,

點樣鬧交,

點樣和好,

甚至乎係佢把聲

全部野都好記得

眼淚真係冇停過



其實我真係唔想喊

你估我好想俾人見到

我成隻眼腫晒咩,

但真係不由自主咁樣流出嚟,

我都真係好失敗

一個男人連淚水都控制唔到

其實我曾經諗過,

會唔會依家只係一個夢境



去到聽日,

晞澄會無啦啦返嚟

跟住喺度屈我請佢食菠蘿油

又或者係咁撩我玩旋轉泡泡球

但係呢個時候我自己搣自己大髀

好痛

咁樣我就知唔係夢境,



不過咁,

大髀點樣痛都好,

都唔夠個心鬱住鬱住滲出嚟嗰種感覺咁難頂

唔好玩啦兩個完全唔同層次

當時係我第一次咁接近去體驗生離死別,

依家講緊係一個我識咗三年嘅人

仲要喺呢三年入面,

週不時都喺我身邊

嗰一刻嘅我有冇亂諗野

話冇你都唔信啦

最簡單一樣野,

死,

我係絕對有諗過嘅,

講得出嚟我都預咗俾你地笑

當然依家諗返轉頭,

呢個諗法可能好幼稚啦

但我想講嘅係,

點解我今時今日仲可以喺度而冇建基於我嘅諗法去做呢

我唔係話怕死

亦唔係話怕乜野負擔

我最驚就係,

我死咗都唔會見到晞澄,

呢個先至係重點,

如果當時有人可以同我保證,

我一定可以見到晞澄

咁樣今時今日就唔會喺度見到呢個故仔.



跟住過幾日呀邦上咗我屋企搵我

當然之前佢問我去邊度等啦

我話唔想出街,

跟住佢就自己上嚟,

呀邦:「呀穎搵過我

大約知咩事,

頂住呀 」

我:「得啦

唔使驚喎 」

呀邦:「唔識講乜野去安慰你,

不過如果你有野想同我講就講啦 」

我都唔止一次講過啦,

我真係典型嘅大男人

真係唔鍾意喺其他人面前示弱

亦都唔會好似拍戲咁樣攬住朋友喺度號啕痛哭,

我唔係呢種人

我:「放心啦

冇事喎 」

呀邦:「係真先好呀,

總之有需要就同我講

隨傳隨到

唔講咁多你明架啦 」

我:「嗯 」

雖然我最後都冇去麻煩呀邦,

不過真係好感激當日呢一份心意

總算冇識錯佢,

你見依家仲keep到就知

基本上晚晚都一齊打機,

當然依家結咗婚生埋仔,

晚晚打機呢啲機會唔係成日有啦

不過一得閒就會約出嚟,

我結婚嗰陣佢都係做兄弟

仲要係二話不說嗰種,

真係好多謝佢嘅

返返嚟先,

你估頭先佢問我係咪冇野嗰陣,

我真係完全冇野咩

頭先嗰啲假象嚟嘅啫

記得收到封信嗰晚我就係咁喊,

一兩日之後就完全收哂眼淚

一嚟唔想俾其他人知我係咁啦,

費事要其他人擔心,

二嚟嗰陣已經冇乜感覺

平時習慣晒會同晞澄一齊做嘅野,

依家已經成為絕響

人最唔鍾意就係適應

當一個習慣因為某啲原因而冇得再做嗰陣,

自己先會知自己有幾辛苦,

其他人唔會明白

你估真係話改就改咩,

我地係人嚟唔係機器,

唔係寫條program就可以解決哂所有問題,

係就好啦話唔記得就唔記得

去到今日我先至領悟到一樣野,

以前啲人成日問最唔開心會點,

嗰陣我以為咪喊囉

個個都係咁講架啦

但係依家自己經歷過,

先知唔係喊,

你喊即係代表你仲有感覺

想要發洩出嚟

不過從來最唔開心嗰陣,

自己都係唔會知,

因為已經麻木咗,

咁又點會有感受呢

所以我覺得,

識去喊嘅人,

某程度上應該要感到慶幸.