[真人真事][校園][純愛]《總有一天，會再次遇見》: 第九十二章
睇到呢度大家可能會問
究竟咁耐以嚟我有冇去過晞澄個靈位
咁當然有啦
佢用嗰張相仲係紮住馬尾添
早幾年我就係同呀穎一齊去嘅
結咗婚之後我就多數自己一個去
就再冇同過呀穎一齊去,
點講都好始終真係有咗一個家室
呀穎或者以為我已經唔記得咗啦,
唔緊要啦就由佢誤會
有時大個真係會調返轉,
我細細個嗰陣極都唔鍾意俾人誤會
就算係啲極度雞毛蒜皮嘅事,
我都一定要同人解釋返清楚
不過原來依家唔係咁,
可能我覺得掛住一個唔應該掛住嘅人唔係一件值得炫耀嘅事啦
所以唔係好想俾人知
寧願俾呀穎誤會我已經唔記得咗呢件事,
咁樣我覺得會更加好
甚至乎以前啲同學搞聚會我都冇去過
因為我直覺上佢地會問晞澄啲野,
咁當然有可能係我諗多咗
邊有人理我呢條蛋散丫
不過無謂冒險啦
每一年嘅9月1號我都會去佢個靈位
如果嗰日放假,
我就一早同屋企人又或者老婆講嗰日唔得閒,
當然我老友呀邦會夾口供架啦
應該點做大家知啦
好彩我老婆都唔係嗰種好鍾意追問嘅女人
變相方便好多
早幾年仲返學嘅話,
我放咗學就會去,
近呢幾年出嚟做野就多數會請假
咪當清下假囉
點解要係9月1號
唔知大家仲記唔記得啦,
其實我地係喺呢一日認識
2005年嘅9月1號,
有時人太好記性真係唔係一件好事
至於佢嘅生忌同死忌我就唔去喇
因為一定會撞到佢嘅屋企人又或者好朋友,
我唔想俾人見到我呢條蛋散喺嗰度
所以淨係9月1號先至會去
每一次探佢嗰陣我都會同佢講野
咁先決條件梗係隔離冇人啦,
如果唔係一定以為我係痴線佬
對住個靈位講野
俾人捉就唔好啦
當然都係講埋啲無聊野啦,
咁多年都係咁冇變過
「上到u喇
原來同中學真係好唔同
不過返學放學時間彈性咗嘅
有時唔使咁早起身囉,
係咪想知更多呢
我估你想啦
你今晚報夢俾我聽,
我同你講多啲
」下一年
「知唔知有件好得意嘅事發生咗
就係原來有條友同你個名一樣
當然寫法唔同啦,
佢係希望個希,晴天個晴
唔知呢個名係咪有魔力,
叫得呢個名嘅女仔都係靚女
知你條友小氣呀
費事喺度講佢咁多
純粹覺得好得意想同你分享啫
咁快就year two,
其實呢原本我想同你講好多野架
不過唔知點解臨時又好似冇乜野講
都係嗰句啦,
你今晚報夢俾我啦
到時我面對面同你講應該講到好多嘅,
就好似以前咁
」又一年
「知唔知呢我地去開嗰間麵包舖唔做喇
老闆娘成日問起我,
知唔知你去咗邊
你知我啦邊度講得出口啫
我就話你出去讀書,
唔好嬲我講大話啦
反正都係善意
俾我自把自為講一次,
依家先知菠蘿油真係幾好食
我一諗唔到食乜嗰陣就係食菠蘿油
唔好話我抄你呀
乜我唔準食嘅咩
仲有呀,
msn已經收咗檔喇
冇得再玩旋轉泡泡球嚕,
你就好野丫,
驚輸驚到咁
唔俾機會我報仇
講真今晚同我玩一次,
咁當然係用報夢形式啦,
如果唔係三更半夜真係搵呀水同你玩
」前後只係幾年,
不過已經好多野唔同咗,
遊戲執笠都算
最重要係,
佢帶走埋同我玩嗰個人
未贏過佢就真係未贏過
呢樣野已經改變唔到,
跟住再一年
「小弟拍拖喇
你當我冇野講就講呢樣囉,
個女仔就係我早幾年講
話同你同名嗰個
不過你地唔似樣唔使好奇
你無啦啦咁樣走咗去,
咁我都係男人,
我都會想做男人嘅責任,
亦即係無條件咁樣對一個女仔好
知唔知原本呢個位係你
放心我唔係想怪你,
只係好想同你講呢單野啫
我依家先知原來對一個女仔好
其實內心嘅成功感真係幾重,
可惜美中不足
你知我講咩嘅,
同埋呀我年年叫你報夢俾我,
次次你都走數
」再過多幾年
「我上年年尾結咗婚喇,
依家老婆仲大緊肚
照到係女仔嚟
我諗住將個女叫Charlotte呀
我知你又想話我抄你
放心今次我認
我覺得唔好聽就唔會改啦
係咪先
其實都咁多年,
唔知你依家喺邊度呢
係咪要我講出口你先肯報夢啫
」其實我都唔知自己點解要咁樣做
可能我都痴痴地線,
明知佢唔會聽到,
都仲喺度講
不過有時人都係鍾意做埋啲無謂野架啦,
大家都見,
每次我都講叫佢夜晚報夢俾我
我已經唔會強求任何野,
淨係想俾我見多一眼
即使係夢境都好,
都已經好心滿意足
可惜丫,
佢次次夜晚都冇嚟
我又唔識控制夢境
年復年都係講埋同一句野,
不過始終唔可以如我所願.
其實我依家仲有收埋佢啲野嘅
不過多數都係用電腦儲存
有啲唔可以用電腦收埋嘅好似信呀,貼紙相,情人節卡咁樣,
就擺咗落去一個櫃度
當然唔會擺面啦
想俾我老婆見到咩
不過佢都好少自己摷野
我咁做只係自己保險啲啫
其他野好似相呀,msn紀錄咁樣,
我全部都擺喺電腦嗰度
咁當然唔會赤裸咁樣擺喺度啦
搏俾人睇咩
各位巴打都知互聯網上面好多保密軟件架啦
我就用開Wise Folder Hider
點用
佢可以係將一切同晞澄有關嘅野喺電腦上隱藏
以防萬一再設定埋密碼
密碼就唔使講啦,
梗係關於晞澄
所以唔會有人撞到
同埋本身我老婆電腦都唔係話好叻
佢唔會搵到我個保密軟件喺邊度嘅
咁當然會做埋backup啦
就係將呢啲野擺喺Google drive,
開左一個資料夾
「後資的角」,
各位自己諗下點解叫呢個名
我當自己唔記得登出Google drive ac,
我老婆唔覺意睇到都好啦,
第一眼睇肯定唔會明
點解要咁誇張
因為呢啲野對於我嚟講已經係歷史
晞澄同我有關嘅野就係得咁多啫
呢啲係證明我同佢曾經相識嘅證據
唔係我個腦喺度幻想出嚟,
所以一定要好珍而重之
唔見咗就唔見咗架喇
有錢都買唔返,
我好記得我老婆未大肚嗰陣,
佢有時會出外國做野,
得返我一個喺度嗰陣
有時自己無聊就會睇返喺保密軟件入面嘅野
可能我都有啲變態
鍾意自虐
我唔會否認呢點,
不過對比起呢樣,
其實我更加想見到佢個樣
真係好耐冇見過喇
再加上我老婆唔係成日都會出去做野,
機會無多之下,
有時自己真係忍唔住開嚟睇
一見到佢啲相嗰陣我就會諗返起相入面嘅情節,
見到一張喺操場影嘅相
就會記得初初相識嘅畫面
見到一張喺圖書館影嘅相,
就會記得我地點樣喺會考,A Level奮鬥
見到一張喺聖誕節影嘅相,
就會記得我地點樣捉緊對方雙手嘅溫度
見到一張喺運動會影嘅相,
就會記得我地點樣喺運動場你追我逐
一張一張咁樣望,
直至去到最後一張喺飛機場影嘅相,
就會記得我地最後一次見面嘅時候係幾咁期待再見
可惜呢刻嘅再見唔係再次見面咁嘅意思,
而係離別
睇完之後嗰一晚,
夜晚瞇埋眼就自自然然會諗起佢
依家我叻咗呀
唔會好似以前咁渣,
任由眼淚滴出嚟
搞到隻眼腫晒慌死人唔知咁樣,
我可以控制到佢地停留喺眼眶入面,
訓練有素丫嘛哈哈,
當然如果我老婆喺間屋嗰度我就唔會睇啦,
因為我知睇完之後我一定會有啲蛛絲馬跡俾佢見到
我依家已經做到自動波