[真人真事][校園][純愛]《總有一天，會再次遇見》: 第九十三章(終章)

有一單野好巧合

信就信唔信可以當我吹水

咪當聽下故仔囉

有日好奇怪,

我老婆無啦啦買咗幾粒杏仁朱古力返嚟



當然佢知我鍾意食所以先買俾我啦

老婆:「知你鍾意食呀老公

特登買返嚟俾你食 」

我:「你真係抵錫 」

老婆:「擺喺度喇



你要食嘅自己拎啦 」

我:「好 」

過咗幾個字之後我就拎嚟食,

一食落去

種味道好有熟悉感



好似以前食過

仲要似係一個女仔特登整俾我食嗰啲

當然事隔多年我唔可以話一模一樣

我話分到呀你都唔信啦

係咪咁講先

不過的而且確我一擺落去嗰陣就係呢個感覺

當然都係相似而唔係一樣

我:「你喺邊度買架 」



老婆:「咪喺XX嗰條街囉 」

容許我喺度唔公開個名

因為的確真係有呢間店舖存在

老婆:「你覺得好好食呀 」

我:「係呀.」

老婆:「我買俾你咪得囉 」

我:「唔使你咁辛苦啦



你講俾我聽個地址我自己去買就得 」

知道個地址之後我就即刻去睇

的而且確嗰陣味令到我有好大幻想,

不過咁,

世事又點會如自己所願

頭幾次去嗰陣都只係見到一個普通嘅女職員喺度

唔係好特別啫,

當然我每一次都係去買杏仁朱古力



鍾意食就係鍾意食

如是者買咗幾個月

有一日我照常咁樣去買

入到去就見到我平時見開嗰個職員,

職員:「先生你又嚟買杏仁朱古力呀 」

我:「係呀

照舊俾五粒我丫唔該 」



跟住個女職員喺度講

職員:「老闆娘五粒杏仁朱古力呀 」

跟住我就見到有個女仔出咗嚟

佢出嚟嗰陣我同佢有眼神交流,

我仲目定口呆添

全因佢好似一個人,

晞澄,

咁當然我知佢唔係晞澄啦

佢都係似啫

同埋望落去佢好似後生過我

年紀輕輕就創業

唔簡單唔簡單

老闆娘:「先生你就係成日嚟買杏仁朱古力嗰位客人呀 」

我:「係呀 」

老闆娘:「cherry成日同我提起呀 」

我:「cherry係 」

老闆娘:「哦唔好意思,

即係嗰位女職員 」

我:「明白晒明白晒 」

老闆娘:「先生你介唔介意喺度等一陣呀,

因為啲朱古力仲未整得好 」

我:「好呀冇問題 」

唔係講笑愈望佢愈似晞澄

見過咁多人入面呢一個最似,

等陣先我記得晞澄係有個妹

唔通......

我諗緊啲好奇妙嘅野

我:「你係呢度老闆娘 」

老闆娘:「係呀 」

我:「睇你個樣好細個咋喎

唔簡單 」

老闆娘:「細生意嚟啫邊度係丫

自己由細到大受到屋企人薰陶,

所以就鍾意整甜品

咁啱屋企人都覺得可以試下

咪試下喺度整甜品囉 」

我:「你整得好好食呀 」

老闆娘:「過獎喇

其實杏仁朱古力係呢度唔算係熱賣

係得先生你一個咁鍾意 」

我:「由細到大都係鍾意食杏仁朱古力嘛

咁啱嗰次我老婆喺度買俾我食又覺得幾好味

咁咪係咁嚟囉,

整到個味道好好 」

老闆娘:「其實我就係因為我家姐先至整杏仁朱古力 」

我:「你家姐 」

老闆娘:「係呀,

佢以前成日整杏仁朱古力俾佢鍾意嘅男仔

但係佢本身又唔識整喎,

所以咪係咁搵我試味

久而久之我就識整呢個甜品喇

佢整得最多就係呢個,

我之前講受到屋企人薰陶其實都係因為佢 」

我:「所以就係你同你家姐兩個開呢一間店呀 」

老闆娘:「我家姐......

唔喺度喇

以前細細個我同佢喺度講笑話大個一定要開一間甜品店,

daddy仲話好添

今日我當自己喺度繼承佢嘅遺願 」

我:「乜係咩

原來有啲咁特別嘅野,

唔好意思呀提起你傷心事 」

老闆娘:「唔關你事係我自己講開啫 」

聽完之後我個感覺好奇怪,

直覺上呢單野太巧合

佢話家姐鍾意整杏仁朱古力,

又已經離開人世

再加埋佢個樣,

種種因素都令我相信眼前呢個女仔就係晞澄個妹

最衰我當年上晞澄屋企睇相嗰陣冇望真啲佢細妹個樣係點

係咁嘅話我都可以亂咁估丫

當然,

去到最後我都係冇問呢個女仔係咪晞澄個妹

其實好簡單,

我問佢家姐係咪叫x晞澄,

又或者我問呀穎就可以確定

我喺度諗,

唔通我就咁同呢個女仔講,

係呀

我就係成日食你家姐整嗰啲杏仁朱古力嘅嗰個男仔

大佬依家拍戲咩

至於點解唔問呀穎之前都有講過啦

唔喺到詳述喇

或者係或者唔係啦

都唔會追問落去,

可能呢啲就係叫做朦朧美

有時太清晰都唔係一件好事

講到底其實我過咗咁多年,

都係冇勇氣去面對

講真嘅,

我從來都唔會話自己唔好彩

又或者喺度怨天怨地,

雖然我依家唔算好富裕,

起碼都叫做有瓦遮頭三餐無憂,

有個完整嘅家庭

唔算好好不過亦都未去到谷底啦

起碼有更加多嘅人慘過我先

我又憑乜野喺度怨丫

不過我曾經好天方夜譚喺度諗,

如果我用我依家嘅野,

去換嗰件意外冇發生,

我諗都唔諗就已經知點樣做

不過呢個世界唔係話你想點就點,

你當自己係乜

係咯好似打機咁咯有得交易,

邊度有咁理想丫

好彩我只係天方夜譚咁樣諗,

從來都冇當真,

又或者咁講,

如果當日我係建議佢去日本,

我地今日會點呢

究竟都係逃不過命運

佢依然會走咗去,

定還是大家會一齊行落去

經歷好多階段,

抑或係原來大家係唔啱一齊,

不歡而散

不過無論情況點都好,

我都仲係好想去試

點都好過依家丫,

連試嘅機會都冇,

世上最遙遠嘅距離從來都係生與死

話唔係嗰啲人,

一定係冇經歷過,

我都好羨慕佢地冇呢啲體驗.



我個女依家好鍾意問我

女:「爸爸你鍾唔鍾意Charlotte呀 」

我:「梗係鍾意啦 」

女:「咁希睛媽咪呢 」

我:「都鍾意 」

女:「鍾意邊個多啲呀爸爸 」

我:「兩個都咁鍾意,

我最鍾意就係Charlotte同埋希睛媽咪 」

其實我做咁多無謂野,

目的就係咁,

終於可以光明正大講一句

「我最鍾意就係Charlotte,睎澄.」