我叫秋儀幫我睇住個窿,然後我係附近走左一圈,終於俾我見到我想要搵既嘢,就係乾柴同枯葉,然後我就抱住D乾柴枯葉走返黎秋儀旁邊。

「學東哥,你係度做咩啊?點解抱住D樹枝同樹葉返黎既?」
秋儀好奇咁問。

「我唸住燒著D柴同枯葉,然後用燒柴產生既煙,希望可以焗到D老鼠跑出黎。」
我一邊擺好D柴一邊講。

「係喔!都係學東哥最醒。」
秋儀講完就錫左我一啖。



然後我燒著左D乾柴枯葉,D乾柴枯葉開始出煙,我就將D柴同枯葉推入窿裡面,然後再攞舊大石頭頂住依邊個窿,令D米奇只可以係雪兒個邊逃出黎。

過左一陣,感覺D乾柴枯葉應該出唔少煙啦,於是我大嗌:
「雪兒!你個邊有無煙出黎啊?」

「有啊!大陸仔!不過唔係好大煙,睇黎要等多一陣啊。」
雪兒企起身講。

我走到去雪兒個邊,大家同我一樣,都好緊張,又好期待D米奇跑出黎既畫面。


「吱⋯吱⋯」

個窿裡面開始越來越大煙,裡面既米奇亦都開始吱吱喳喳咁叫個不停,睇黎再等多一陣,米奇就會頂唔順,佢地準備要離開米奇妙妙屋啦~

「吱吱!吱吱!」
隨即有四隻米奇跑左出黎,雪兒同秋儀嚇到跳起,我即刻踩住一隻,辣椒妹都踩住一隻。

嗷嗚!來福就喪追住另外個兩隻跑,無幾耐來福咬住一隻返黎,另外個隻睇黎係走甩左。

不過我地要唸個方法擺好D鹹魚先得,唔係既話,可能又會有其他米奇黎偷鹹魚。




「來福越來越有狩獵既天份。」
我一邊講一邊摸來福個頭,來福好興奮咁一直擺尾。
我同辣椒妹抓到既老鼠都俾埋來福做午餐。

返到去竹棚,文健依然挨係個位置度,佢依家個樣比起前日算好左好多,前日個樣似要奄奄一息行將就木,依家起碼可以坐返正D,但嘴裡都係發出啊啊既痛聲。

「er⋯啊⋯啊⋯」
文健一直發出低沉叫聲,聽到我都煩。

雪兒同秋儀煮咁午餐,我就將D鹹魚擺上竹棚上先,遲D再唸下有咩方法可以防老鼠。

食完個午餐後,我即刻分配大家既工作,雖然糧食都算充足,但居安思危,都係搵多D會好D,除左廢柴文健做唔到野之外,其他人都有分配到嘢做。



「秋儀雪兒,你地去摘D香蕉返黎啊。」

「好!」

「辣椒妹,你去海邊個度撈D海膽。」

「好啊⋯」

「咁我就去挖D番薯返黎,今日分工就係咁啦,我地出發!」

我攞起旅行袋,帶埋把開山刀同弓箭出去,秋儀同雪兒已經去左香蕉林個邊,我走之前望一望文健,文健仲係一直挨係竹棚一邊,摸住個心口。

我唸一唸依條友會唔會扮曬嘢,但見佢依家既痛苦表情,又唔似係扮出黎喔。

於是我向番薯地個邊出發,經過埋條河,再行多一陣,終於到左番薯地依度,我睇左一陣周圍,確認左邊D係番薯之後,又開始繼續埋頭苦幹。



當我聚精會神咁挖番薯既時候。
咔嚓!
突然聽到附近有動物踩爛樹枝既聲音,嚇到我停止左挖番薯,我即刻爬上樹望一望。

幾秒後,咔嚓!係附近又再聽到動物踩爛樹枝既聲音,唔會又黎多一隻彭彭啊嘛⋯定係會遇到其他猛獸⋯依度係荒島黎,乜嘢猛獸都可能會遇到。

咔嚓⋯咔嚓⋯

我聽到踩爛樹枝既聲音越來越近,我攞起弓箭出黎,如果隻猛獸一出黎,我就即刻瞄準射過去。無幾耐,有個影出現係我前方,而且越來越近。

「大陸仔走左去邊度啊?」





(er?辣椒妹?)
已有 0 人追稿