荒島日記（新手、後宮甜）（不定期更新）: 蠢材

「好肚餓啊⋯我地仲要行到幾時啊⋯」
辣椒妹一邊行一邊攬住個肚講。

「食住D番薯先啊。」
秋儀遞出個番薯係辣椒妹面前。

「又係食齋⋯我想食肉啊⋯幾時有肉食啊⋯我就黎唔得啦⋯」
辣椒妹變埋聲。

「想食肉啊？上到山頂啊，上到山頂，我就即刻俾肉你食。」


我鼓勵住辣椒妹。

辣椒妹望一望山頂既距離。
「下⋯要上到山頂先有得食肉⋯」

「唔好講咁多啦，我地繼續行啦。」
我拖住雪兒繼續行。

「啊！」
行左十分鐘左右，突然聽到後面有人既尖叫聲。



「大陸仔，有無聽到有人既叫聲啊？」
雪兒抓住我問。

「有啊，我有聽到叫聲。」
我不停咁望住周圍。

「會唔會係鬼啊⋯以前我睇過介紹日本既自殺森林⋯裡面成日傳出怪聲⋯同埋遇到鬼影⋯」
辣椒妹好驚青咁望住我。



秋儀聽完辣椒妹講既恐怖嘢，嚇到躲入我懷裡度震，雪兒就好驚咁攬實我左臂。

「日光日白！唔好嚇大家啦，辣椒妹。」
我真係俾辣椒妹激死。

「啊！」
後面遠處再傳出尖叫聲。

「拿！拿！你聽下⋯又再發出尖叫啦⋯一定係啦⋯」
辣椒妹個嘴開始震。

「荒島邊有咁多⋯⋯」
我未講完，辣椒妹成個吶喊樣指住後面個方向。

我定下神望清楚辣椒妹指個度，見到遠處有個人影不停係樹立中左穿右插，依個熟悉既人，係文健黎。



「啊！救命啊！」
文健一邊跑一邊係咁大嗌。

我望住文健個方向十幾秒後，嚇到我手腳開始係咁震，背隻即刻嚇到出曬汗，將我件衫濕透曬⋯⋯

我望返附近既樹木，發現都有四五米高，好！趁依家未有危險住⋯⋯

「雪兒！秋儀！辣椒妹！快D爬上棵樹度！」

「做咩要爬上樹啊？」
雪兒疑惑咁望住我。

「我等陣再同你解釋，快D聽我話，快D爬上棵樹度。」
我抓住雪兒，然後推雪兒爬上棵樹。



來福走到我身邊，伸曬脷，個嘴發出呵呵呵既聲音，依個傻來福唔知有危險。我抱起來福，然後托俾辣椒妹同秋儀拉佢上樹。

「大家！記得唔好落黎啊！」
我講完後，三女即刻點點頭。

我依家既希望，就係希望文健唔好見到我地，最好離我地越來越遠。我一邊爬樹一邊望文健個方向，見到文健望左依邊一眼。

（唔好啊⋯唔好過黎啊⋯文健⋯我實會殺左你㗎⋯）

「大佬！我終於見到你啦！」
文健好似見到救星，開心到係咁大嗌，然後加速跑黎我地個方向。

（你個死文健⋯點解要跑過黎啦⋯你想害撚死埋我地啊？）



「大佬！大佬！大佬！」
文健向住我地方向跑過黎，然後佢背後⋯有十幾隻餓狼追住佢⋯⋯

「大佬！救我啊！大佬！」
文健一邊跑過黎一邊求我救佢。

後面個十幾隻野狼，各個都咬牙切齒流曬口水咁追住，好似餓左好耐咁⋯你叫我點對付咁多隻餓狼啊⋯⋯