「大佬!大佬!見到你真係好啊!」
文健一邊狂奔一邊揮手。

(好你個頭啊!)

「弓箭呢?弓箭係邊度?」
我望向樹上既三女。

「係度!」
辣椒妹講完就掉落弓同箭俾我。



我攞起弓箭,即刻瞄準二十米遠既文健個方向,十幾隻狼⋯弓箭又唔一定殺得死佢地⋯點解我要有D咁既豬隊友啊⋯我嬲到將箭嘴對住文健。

文健見到箭嘴對住佢,嚇到係咁揮手。
「大佬!大佬!係我啊!文健啊!自己人自己人。」

(自己人?啱啱你先走佬完,依家同我講自己人?)

「大陸仔!小心D啊!D狼越來越近啦⋯」
雪兒係樹上好擔心咁望住。



「唉⋯」
我將箭嘴對住最頭個隻狼,然後放手,熟一聲,枝箭飛快地係文健身邊穿過,一嘢插穿入隻狼個頭度,隻狼走左幾步之後就痛到訓低掙扎,但其他狼仍然繼續跑過黎。

「哎呀⋯」
文健係我十米前,佢俾舊石整跌係地下扑街,佢一轉身,其中有一隻跑最快既狼已經爬左係佢身上,正在咬牙切齒咁望住佢,口水係咁滴落文健個身度,文健嚇到成身係咁震。

「大佬⋯救⋯救⋯救我啊!」
文健用雙手頂住隻狼個頭,隻狼用爪撕開文健件衫袖。



「好恐怖啊⋯」
秋儀係樹上遮住雙眼。

熟!
我瞄準隻狼,放手一射,枝箭直插隻狼右眼裡面,隻狼嗷嗚一叫,文健推開佢起返身,然後攞出收係背後既老牛,一嘢斬落隻狼條頸,隻狼D血巴巴聲咁流,係地下抽搐左幾秒後死去。

「好彩⋯好彩見到大佬你地⋯」
文健未講完,就俾我一巴車左落去。

啪!

「你唔係好威,要離隊既咩?做咩要返黎?仲要搵我地麻煩。」
文健俾我鬧到唔知答咩好。

「大陸仔!依家唔係嘈交既時候啊!D狼已經衝左上黎圍住左你地啊!」


雪兒係樹上大嗌。

「遲D再同你算帳!」
我講完就搶返把開山刀。

「大⋯大佬⋯我無架撐⋯」

「架撐?你仲好意思同我講架撐?用住依把先啦!」
我攞出把瑞士軍刀俾佢。

文健攞起把瑞士軍刀,將個刀身拉出黎,雙眼瞪大望住,幾秒後,個頭滴落幾滴豆粒大既汗水,呼吸變得急促,佢個眼眶充滿住淚水。
「大佬⋯依把嘢⋯咁短⋯」
文健帶一絲哭腔。

「喂!唔好睇小依把嘢,佢短小而精幹,你有無睇過火影?卡卡西用個把苦無都係咁短,你知唔知第四代火影?佢都係用苦無做擅長武器!」



「大佬⋯個D係漫畫黎⋯」

「咁你用唔用啊?唔用我就收返。」

「用⋯用用用!」
文健好緊張咁攞起瑞士軍刀對住狼群。

一個重傷一個失去過多致死,D狼仍然毫不畏懼咁逼近我地,我攞住開山刀個隻手心係咁出汗,我都好驚等陣跣手飛左把刀出去⋯

我望一望身邊既文健,文健好驚慌咁攞住把瑞士軍刀,雙腳震既幅度好勁,唔講仲以為佢學咁貓王跳舞。

其中一隻狼叫左一聲,其他狼即刻發狠上前⋯⋯
已有 0 人追稿