「阿媽?」
我地五個人都好驚訝,因為走過黎既女人,點樣睇,都大唔過個紫霜幾多,唔通佢十一、二歲就生左佢落黎⋯⋯

「望咩望啊!未見過靚女啊!」
個女人對住我地咆哮。

依個女人接近三十歲,樣貌麻麻地,身材就偏向有少少肉,身高都有米六幾左右,頭髮有D短,好似貴婦專剪個種短髮,總之俾人一望,就可以睇得出係少婦!無錯!係少婦!

「媽⋯」
紫霜好驚青咁望住個少婦,好似驚會俾少婦發現左D咩。



個少婦走到個紫霜身邊,望一望個紫霜身後既煲之後,即刻一巴車落女仔個塊面度,紫霜塊面顯出紅印,可以睇得出個少婦打得好重手。

「紫霜!你竟然煮左我個公仔麵!」

「好對唔住⋯」
紫霜得低頭喊住道歉。

「喂!佢肚餓煮麵食姐,你做咩打你個女啊?點做人老母㗎!」
辣椒妹忍唔住想衝過去打佢,即刻俾雪兒同秋儀抓住。



「我想打佢就打佢!吹啊?而且我同你地講!我唔係佢阿媽!佢係我老公同佢前妻生既女!」
個女人不屑咁講。

「你依個惡毒既後底乸!」
辣椒妹指住個女人大罵。

「紫霜,你無同你爸爸講佢咁對你咩?」
雪兒攬住紫霜問。



「爸⋯爸⋯」
紫霜有口難言。

「同佢老竇講有咩用啊?佢老竇一早就知啦,如果無我屋企背景關係,佢老竇可以有今日既成就?」
個少婦講完後哈哈大笑。

「最毒婦人心。」
秋儀細細聲咁講。

個少婦想再打紫霜,我即刻抓住佢舉起個隻手。
「點啊?你想打女人啊?」

「夠啦,停手!公仔麵係我地食既!最多我地賠返食物俾你,你唔準再打紫霜!」
雪兒推開我同個少婦。



「你地有咩食物可以賠啊?睇死你地都挨餓黎依度搶嘢食啦!」

(狗眼看人低)

「嗱!依個夠賠未!」
雪兒攞出舊燒好食淨既狼腿,個少婦見到係肉,雙眼發出光芒。

「你以為一條狼腿就夠?」
個少婦雖然咁講,但雙眼不時望向狼腿,然後吞口水。

「咁都唔夠賠啊?慳返!」
我正想攞走狼腿,個少婦抓住我手,令我停低係度。

「唉!見你地咁有誠意!咁我就勉為其難咁接受你地既賠償啦!」
個少婦走到雪兒面前攞走狼腿,然後好興奮咁入左佢自己既山洞。



(真係估唔到除左文健之外,我地仲會遇到俾文健更加厚面皮既人,而且仲咁貪婪。)

「我差D忍唔住揼柒佢一鑊!」
辣椒妹講完後踢開一舊石頭。

「算啦,你打佢既話,佢以後趁我地唔係度,打紫霜未更加勁。」
雪兒摸一摸紫霜面上既紅印。

「好⋯對唔住⋯」
我望一望紫霜既手手腳腳,發現佢身上有唔少疤痕,睇黎個潑婦真係經常虐待紫霜,真係好可憐⋯⋯
已有 0 人追稿