荒島日記（新手、後宮甜）（不定期更新）: 準備

「啊⋯依家幾點啊⋯」
我起身坐係床上，背部同大腿有強烈既酸痛感⋯望一望周圍，得我自己一個。


睇嚟係尋晚太過激烈⋯搞到依家⋯我條腰啊⋯大腿既肌肉不斷微微震動⋯藍醫生講得啱⋯我唔可以操勞過度⋯⋯


點解次次腰酸背痛既人係我，你地就好似完全無發生過事咁⋯




我拖住疲倦酸痛既身軀走出山洞外，見到雪兒同秋儀係山洞口外煮食，雪兒見到我疲倦既樣按住條腰行出嚟，嘴角微微上揚，然後繼續燒嘢食。


「學東哥～你醒啦～」
秋儀走過嚟攬住我實一實。

（啊⋯我條腰⋯）

我忍住條腰既酸痛。
「早晨啊秋儀⋯係啊⋯唔見辣椒妹既⋯佢走左去邊⋯」



「辣椒妹去左執柴，應該好快就返。」

「今日⋯肥佬陳有無派人過嚟？」

「今日無人過嚟。」

我摸一摸秋儀既頭髮。
「秋儀乖⋯你繼續同雪兒整嘢食啊⋯」



「嗯！」
秋儀坐返到雪兒旁邊，望住雪兒燒嘢食。


啊⋯背隻同大腿既酸痛仍然強烈⋯但荒島上無跌打酒同止痛膏既嘢俾我搽⋯真係想走去營地個邊，睇下藍醫生個山洞有無止痛藥食下。


「咦！東哥！你醒啦！」
我向聲音方向望去，達叔笑騎騎迎面而來。

「早晨啊⋯達叔⋯」

達叔見到我用手按住條腰，佢即刻露出淫賤既笑容，然後話。
「掂啦！東哥，三位阿嫂美麗動人，身材又正，尋晚～」



「你仲好意思講⋯你唔嚟救我⋯依家仲要笑我腰痛⋯」


達叔拉我到一邊。
「東哥！我唔係唔想救你，但你諗下雪兒，佢個眼神話我知講得出就做得到，紫霜手上個把刀，真係斬落嚟我就死得啦⋯」

「算啦，我都知你盡左力。」

「東哥，我知你今日實會咁既啦，所以特登帶過嚟俾你用！」
達叔從袋中攞左樣嘢出嚟，透明玻璃樽裝住橙色既液體，係跌打酒嚟！

「嘩！達叔！點解你會有跌打酒㗎？」

「漂流到荒島上個陣，係沙灘到執到㗎！唔好講咁多啦，搽左先，唔係今晚你有排痛啊！」
達叔同我走返山洞到，我躺訓係床上，除去件衫。



達叔塗了些少跌打酒在手，然後就用力按住我酸痛既位置，再繼續不斷咁轉圈。

「啊！達叔⋯痛啊⋯痛啊⋯」

「唔大力啲點滲透跌打酒，忍住先啊東哥，搽完就好快好。」
達叔講完便更加用力幫我搽跌打酒，我痛到緊握住拳頭，腳趾緊縮成一舊，但實在太痛，我忍唔到個痛楚，於是山洞內持續傳出我既慘叫聲。
「啊！」


幾分鐘，達叔幫我搽完跌打酒，我個背隻早已泛紅發熱，原本既酸痛感早已俾熱力覆蓋，令我無一開始咁痛到用手按腰。


我再問達叔攞少少跌打酒搽大腿，幾分鐘後，大腿都泛紅發熱，酸痛感同微微顫抖逐漸消失。




「好返好多啦達叔，多謝曬。」

「兄弟之間洗乜講多謝啊！我走先啦，東哥，我兩位老婆等咁我去執柴煮飯啊。」
達叔講完便揮手離開山洞。


條腰同大腿部位持續發熱，原本我打算今晚去肥佬陳個山洞睇下情況，但依家周身傷痛，而且又咁大陣跌打酒味，偷入去只會俾佢發現，都係第日好返曬先再潛入山洞偷槍。


有一個手上攞住條魚既黑衫女仔，從我山洞前經過，我認得佢！佢係住四眼妹山洞，條魚應該係啱啱打獵返嚟。


我走返入山洞攞一條鰻魚乾，然後走去四眼妹山洞個方向。
「四眼妹！」



「係到！嚟咁！」
四眼妹急急腳咁走出嚟。

四眼妹一見到我就按住個鼻。
「嘩！咁大陣跌打酒味既？你尋晚洗唔洗咁搏命啊？小心操勞過度啊。」

我驚訝咁望住四眼妹。
「你又知⋯」

「你個山洞尋日鬼殺咁嘈，係人都知你地四個係山洞做咩啦。」
四眼妹掃視我成個人，然後見到我手上既鰻魚乾後，露出佢雪白牙齒。

「大陸仔！洗乜咁客氣啊！唔洗下下拎嘢嚟既！」
四眼妹目不轉睛望住我手上既鰻魚乾。

「咁好啦，我攞返去啦。」
我轉身扮走返去自己既山洞。

「喂！大陸仔，我擺明講咁反話啦。」
說罷，四眼妹便攞走我手上既鰻魚乾。

「四眼妹，有樣嘢⋯⋯」

「都知你無咁好死既啦，講啦，睇下姐姐有咩可以幫到你。」
四眼妹托一托佢副眼鏡。

「我想買件衫。」


「衫啊？我大把！入嚟入嚟。」
於是四眼妹帶住我行入山洞，然後佢走到一堆雜物左摷右摷，而佢山洞既其他女仔見到我就點點頭打招呼。


「依件？定係要依件？」
四眼妹攞出一件件西裝、恤衫、衛衣等等出嚟，我認得其中一啲衫褲係潮牌同貴牌子，連郵輪員工制服都有。

「嘩！你山洞真係乜都有wor，不過我唔係要依啲，你有無啲全黑既？」

「全黑er⋯⋯你等等！」
四眼妹走返入堆雜物裡面，搵左成五分鐘先出返嚟。

「依件點啊？」
四眼妹提起手中既黑色衣物。


我走上前望，係潛水衣嚟！依件潛水衣雖然對我嚟講大左少少，唔夠貼身，但都可以保暖，全黑既設計係漆黑既環境可以潛行，方便我潛入肥佬陳個山洞。


四眼妹見我幾鐘意件潛水衣，愛不惜手，於是講。
「老友價，三條鰻魚！」

果然係奸商⋯
「嘩！你唔好去搶？兩條。」

「殺你！」
四眼妹好開心咁將潛水衣交到我手，依家想返，先知中左佢計，佢誇大個價值成三條，然後就等我殺價成兩條⋯


「四眼妹，你依到有無十字架買？」

「十字架？你等等。」
四眼妹又再次走返入個堆雜物到，佢堆雜物就好似叮噹既百寶袋一樣，你想要乜就有乜。

「嗱！十字架！」
四眼妹舉起條銀色手鏈，鏈咀係個細小既十字架，算啦⋯好過無⋯

「個十字架送俾你啦，係啦！大陸仔，你要個十字架做咩？」
四眼妹托一托副眼鏡。

「信仰。」

四眼妹即刻講。
「你講大話！」


咁都俾你發現⋯但我無理由同你講，我係營地撞到長髮女鬼，所以攞個十字架辟邪㗎⋯講完肯定成個營地既人都恐慌⋯⋯


「無呃你，你搵人跟我返山洞攞另外個條鰻魚。」
我講完頭也不回離開四眼妹既山洞，四眼妹就派佢山洞其中一個女仔跟我返去。


返到去既時候，辣椒妹已經返左嚟，佢執返嚟既柴真係少得可憐⋯不過我都預左佢唔會勤力既啦。


「大陸仔，你手上個樣嘢係咩嚟？」
雪兒望住我手上既潛水衣。

「潛水衣！靚唔靚？」
我打開個潛水衣俾三女睇。

三女睇完呆左幾秒。

「你諗住係條河到玩潛水啊？哈！」
辣椒妹嘲笑咁講，雪兒都忍唔住笑左聲。


我都廢事同你地解釋，而且潛入肥佬陳山洞依件事，都係愈少人知就愈好。



待續